ආණ්ඩුව විසින් සිරකොට තබාගන්නා පුද්ගලයන්ට වධ බන්ධන පැමිණවීම සම්බන්ධයෙන් එක්සත් ජාතීන්ගේ බරපතල ප්‍රශ්න කිරීම් වලට මුහුණ දීමට ශ්‍රී ලංකාවේ ජාතික බුද්ධි සේවා ප්රධානියා ට සිදුවිය.
වධ හිංසාවලට එරෙහි ව ක්‍රියාත්මක වීම සම්බන් ධයෙන් ශ්‍රී ලංකාවේ කැපවීම, මේ මස 15 වැනිදා හා 16 වැනි වධ හිංසාවලට එරෙහි එක්සත් ජාතීන් ගේ කමිටුව (UNCAT) මගින් සමාලෝචනය කෙරේ.
වධහිංසා වැලැක්වීම සඳහා ශ්‍රී ලංකාව ගෙන ඇති පියවර සම්බන්ධ ජගත් මණ්ඩළ විමර්ශනයට සහභාගි වීම සඳහා ජිනීවා නුවරට ගොස් සිටින ආණ්ඩුවේ නියෝජිත මණ්ඩලයේ සාමාජිකයකු වන ජාතික බුද්ධි සේවා ප්රධානී සිසිර මෙන්ඩිස් ගෙන් ප්‍රශ්න කරන ලද්දේ යුද්ධාවසානයේ පොලිස් විමර්ශන ඒකක දෙකක් විසින් උතුරේදී දෙන ලද වධහිංසා සම්බන්ධයෙනි.
දේශසීමා රහිත වාර්තාකරුවෝ (RSF), ශ්‍රී ලංකාවේ ප්‍ර‍ජාතන්ත්‍ර‍වාදය සදහා මාධ්‍යවේදියෝ (JDS) සහ ජාත්‍යන්තර සත්‍යය හා යුක්තිය පිළිබඳ ව්‍යාපෘතිය (ITJP) ද විසින් UNCAT කමිටුවට ජාත්‍යන්තර ජනමාධ්‍ය සංවිධාන ලබා දී ඇති තොරතුරු අනුව මෙම විමසීම කරන බව (UNCAT) සාමාජිකා ෆෙලීස් ගෙයර් එහිදී හෙළි කළාය.
2008 මාර්තු මාසයේ සිට 2009 ජුනි දක්වා පොලීසියේ අපරාධ පරීක්ෂණ දෙපාර්තමේන්තුව (CID) හා ත්‍ර‍ස්ත විමර්ශන ඒකකය (TID) පැවතියේ සිසිර මෙන්ඩිස් යටතේය.
මැණික් ෆාම් වධ බන්ධන
වධහිංසාවලට එරෙහි එක්සත් ජාතීන් ගේ කමිටු විමර්ශනය හමුවේ පෙනී සිටින ජාතික බුද්ධි සේවා ප්‍රධානියාගෙන් ෆෙලීස් ගෙයර් විමසා සිටියේ ඔහු එම අංශ ප්රධානියා ලෙස රාජකාරි කළ සමයේ වව්නියාව මැණික් ෆාම් කඳවුරේ සහ වව්නියාව රෝහලේ දී දෙමළ යුද අනාථයන් ට වද දෙන අවස්ථාවලදී සිටියේද යන්නයි.
UNCAT සාමාජිකා ෆෙලීස් ගෙයර් අවධාරණය කළේ මේ ස්ථාන දෙකේදීම CID සහ TID නිලධාරීන් ලිංගික හිංසන ඇතුළු වධහිංසා කළ බවට ජගත් මහලේකම් වරයාගේ විශේෂඥ මණ්ඩලය ශ්‍රී ලංකාවේ යුද සමයේ මානව හිමිකම් සම්බන්ධයෙන් කළ විමර්ශනය ඇතුළු වාර්තා වල සඳහන් වන බවයි.
“2009 මැයි හෝ ජූනි මාසයේ ඔබ මේ ස්ථානවලට පුද්ගලිකව ගොස් සිටියාදැයි පැහැදිලි කළ හැකිද?” යි ෆෙලීස් ගෙයර් විසින් ජාතික බුද්ධි සේවා ප්රධානී සිසිර මෙන්ඩිස් ගෙන් විමසන ලදී.
යුද්ධාවසානයේ මැණික් ෆාම් කඳවුරේ රඳවාගත් දෙමළ ජනකාය ලක්ෂ තුනහමාරකට අධිකය.
එහිදී වධ දීම්, ලිංගික ප්‍රචණ්ඩතා, අතුරුදහන් කිරීම් හා ඝාතන ඇතුළු බරපතල මානව හිමිකම් උල්ලංඝන සිදුකෙරුනු ආකාරය පිළිබඳව එක්සත් ජාතීන්ගේ සංවිධානය ඇතුළු මානව හිමිකම් සංවිධාන වාර්තා වල මෙන්ම ආණ්ඩුවේ උගත් පාඩම් හා සංහිඳියා කොමිසම් වාර්තාවේද (LLRC) එයි.
තිස්සනායගම් ගැන ප්‍රශ්න
නියෝජ්‍ය පොලිස්පති සිසිර මෙන්ඩිස් ගේ නායකත්වය යටතේ CID හා TID පැවතියදී, මාධ්‍යවේදීන් ඇතුළු මාධ්‍ය ප්‍රජාවට සම්බන්ධ පුද්ගලයන්ට වධහිංසා පැමිණවීමට ඔහුගේ වගකීම සම්බන්ධයෙන් ද UNCAT සාමාජිකා ෆෙලීස් ගෙයර් විමසා සිටියාය.
ජ්‍යේෂ්ඨ මාධ්‍යවේදී ජේ එස් තිස්සනායගම්, ලේඛක හා ප්‍ර‍කාශක වී ජසිහරන් හා ඔහු ගේ බිරිය වී වලර්මදී, ජනමාධ්‍යවේදී කේ විජේසිංහ ත්‍ර‍ස්ත විමර්ශන ඒකකයේ එවැනි කෘර සැලකුම්වලට මුහුණ දුන් මාධ්‍යවේදීන් අතර වන අතර බව RSF හා JDS සංවිධාන විසින් UNCAT වත දැනුම් දී ඇත.
“තවත් දෙමළ ජාතික වෛද්‍යවරුන් සිව් දෙනෙක් සමග අපරාධ පරීක්ෂණ දෙපාර්තමේන්තුව විසින් රඳවා තබාගන්නා ලද වෛද්‍ය තුරෙයිරාජා වර්ධරාජා ද ස්වාධීන ජනමාධ්‍යවේදීන්ට තහනම් වූ ලේ වැකි යුද්ධයේ අවසන් අදියරවල දී ජාත්‍යන්තර මාධ්‍යවලට යුද කලාපයේ තොරතුරු සම්පදානය කළ මූලාශ්‍ර‍යක් වීම හේතුවෙන් මෙසේ අමානුෂික සැලකීම්වලට මුහුණ දුන්නෙකි,” යි RSF හා JDS නිකුත් කළ නිවේදනයේ සඳහන් වෙයි.
“සිය අධීක්ෂණය යටතේ රදවා තබාගෙන සිටිය දී මේ ජනමාධ්‍යවේදීන්ට, මාධ්‍ය සේවකයන්ට හා තොරතුරු සම්පාදකයන්ට සිදුවූයේ කුමක්ද යන්න සම්බන්ධයෙන් තමන් නො දන්නා බව කියා සිටීමට මෙන්ඩිස් මහතාට හැකියාවක් නැත,” යි RSF ආසියා-ශාන්තිකර කාර්යාල ප්රධානී බෙන්ජමින් ඉස්මයිල් පවසා තිබේ.
වධ හිංසාවලට එරෙහි එක්සත් ජාතීන් ගේ කමිටුව විසින් සෘජුව අසන ලද කිසිදු ප්‍රශ්නයකට බුද්ධි අංශ ප්‍රධානි සිසිර මෙන්ඩිස් පිළිතුරු දුන්නේ නැත.
ශ්‍රී ලංකාවේ නියෝජිත මණ්ඩලයේ කිසිවකුත් ඔහු වෙනුවෙන් පිළිතුරු දීමට ඉදිරිපත් වූයේත් නැත.
(Radio gagana)
Facebook Comments
