රාජපක්ෂ පාලන සමයේදී මරා දමන ලද දෙමළ මාධ්‍යවේදීන්ට යුක්තිය ඉටු කරන ලෙසට බල කරමින් උතුරේ මාධ්‍ය සංවිධාන විසින් යාපනයේදී විරෝධතාවක් පවත්වා තිබේ.
මරා දැමුණ හා අතුරුදහන් කරවනු ලැබු මාධ්‍යවේදීන් අනුස්මරණය කරමින් පුෂ්පදීප දැල්විමෙන් අනතුරුව විරෝධතාවය ආරම්භ වු අතර උතුරු නැගෙනහිර මෙන්ම දකුණේ මාධ්‍යවේදීන්ට ඊට සහභාගී වී සිටියහ.
අඩුපාඩු සහිතව වුවද සිංහල මාධ්‍යවේදීන් ඝාතනය කිරිම හා අතුරුදහන් කිරීම පිළිබඳව පරීක්ෂණ පැවැතුවුන ද කිසිඳු දෙමළ මාධ්‍යවේදීයෙකු ඝාතනය කිරිම ගැන මෙතෙක් පරික්ෂණ ආරම්භ කර නොමැති බවට විරෝධතාවයට එක් වු වෘත්තිය වෙබ් මාධ්‍යවේදීන්ගේ සංගමයේ සභාපතිවරයා පැවසීය.
යහපාලන රජය බිහි කිරීමට උර දුන් මාධ්‍යවේදීයෙකු ලෙස තමන් ඒ පිළිබඳව ලැජ්ජා වන බව මාධ්‍යවේදී ෆෙඩී ගමගේ යාපනයේ පැවති ව්රෝධතාවයේදී මාධ්‍ය වෙත කියා සිටියේය.
“ලංකා ඉතිහාසයේ වැඩිම මාධ්‍යවේදීන් ගණන් ඝාතනය කරපු පාලකයා හැටියට ඉතිහාස ගත වෙන්නෙ මහින්ද රාජපක්ෂ.” යි කී සභාපතිවරයා එම සමයේ මරා දැමුණු මාධ්‍යවේදීන් 44 දෙනාගෙන් 41 දෙනෙකුම දෙමළ මාධ්‍යවේදීන් බව සඳහන් කළේය.
JDS ලයිස්තුව
රාජපක්ෂ පාලස සමයේ ඝාතනයට හා අතුරුදහන් කිරීමට ලක්වූ මාධ්‍යවේදීන් ගේ ලැයිස්තුවක් 2015 දෙසැම්බරයේ ජාත්‍යන්තර මානව හිමිකම් දිනයේ දී මාධ්‍ය සංසදය විසින් අගමැති රනිල් වික්‍රමසිංහ අතට පත් කළ අතර අග්‍රාමාත්‍යවරයා එහිදි සදහන් කර තිබුනේ එම ලේඛනයේ මාධ්‍යවේදීන් 44 දෙනකුගේ නම් ඇතුලත්ව ඇති බවයි.
අගමැතිවරයාට භාර දෙන ලද ලැයිස්තුව සකස් කොට මුල් වතාවට ප්‍රසිද්ධියට පත් කර තිබුනේ ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසිනි.
සිව් වසරක් ගතව ඇතත් රජය සතුව ඇති එම ලැයිස්තුවේ සඳහන් මාධ්‍යවේදීන් සම්බන්ධයෙන් යුක්තිය ඉටු කිරීමට ගන්නා පියවර තවමත් ප්‍රකාශයට පත් කර නැත.
Facebook Comments
