බටහිර ප්‍රජාතන්ත්‍රවාදී මැතිවරණයක තරග වදිමින් මහජන නියෝජිතයන් වීමට බලාපොරොත්තු වන ජනතා විමුක්ති පෙරමුණ කාන්තාවන් මත්පැන් පරිහරණය කිරිමෙන් ආසියානු වැඩ වසම් සමාජ ක්‍රමය බිඳ වැටෙන බවට කම්පා වී සිටී.
කාන්තාවන්ට මත්පැන් පානය කිරීම හෝ විකිණීමට අවසර ලබා දීම නැවත හකුලා ගැනීමට ජනාධිපතිවරයා ලත් තීරණය දැඩිව අනුමත කරමින් ශ්‍රී ලංකාවේ “පවත්නා සංස්කෘතිය සහ වැඩවසම් සමාජ ක්‍රමය තුළ” මත්පැන් පානය කිරීම හෝ විකිණීම සඳහා කාන්තාවන්ට අවසර දීම පක්ෂය අනුමත නොකරන බව ජවිපෙ ප්‍රචාරක ලේකම් විජිත හේරත් බිබිසීය සමඟ ප්‍රකාශ කර ඇත.
ආණ්ඩුක්‍රම ව්‍යවස්ථාවේ මූලික අයිතිවාසිකම් ප්‍රකාර කාන්තාවන්ට සහ පුරුෂයන්ට ලිංගිකත්වය මත පදනම් වී වෙනස් නීති පැණවීම අනුමත නොකරන නමුත් කිසියම් ප්‍රතිපත්තිමය කරුණක් ගැන තීරණ ගන්නා විට රටේ සංස්කෘතිය මත පදනම් වී පියවර ගැනීම අත්‍යවශ්‍ය කරුණක් බව ඔහු ප්‍රකාශ කළ බව බිබිසීය පවසයි.
“ලංකාවේ සංස්කෘතිය, ආගමික වටපිටාව, ආසියාතික වැඩවසම් සමාජ ක්‍රමය තුළ යුරෝපයේ තියෙන දේවල් ඒ විදියටම කරන්න යාම සමාජය තුළ ගැටලු, අර්බුද මතුවෙන එකක්,” යැයි විජිත හේරත් කියා තිබේ.
ශ්‍රී ලංකාවේ කාන්තා අයිතිවාසිකම් සුරක්ෂිත කිරීම ආණ්ඩුවේ සැබෑ අභිලාෂය නම් උදාහරණයක් ලෙස “මුස්ලිම් කාන්තා අයිතීන් උල්ලංඝනය කරන, ඉතාම යල් පැන ගිය” මුස්ලිම් විවාහ නීතිය සංශෝධනය කළ යුතු බව පෙන්වා දී ඇති මන්ත්‍රීවරයා එසේ නොකර කාන්තාවන්ට මත්පැන් පානය කිරීම හෝ විකිණීමට අවසර ලබා දීම අනවශ්‍ය අර්බුදයක් නිර්මාණය කිරිමක් බව වැඩි දුරටත් ප්‍රකාශ කර ඇත.
Facebook Comments
