ශ්‍රී ලංකාවේ විනිසුරුවන් ද ඇතුලු අධිකරණ පද්ධතිය 2009 යුද්ධයෙන් පසු වඩාත් අගතියට පත්වූ බව දිවයිනේ මුල් පෙලේ මානව හිමිකම් නීතිවේදියකු පවසයි.
දේශපාලන සිරකරුවන් නිදහස් කරගැනීම සඳහා වන දීප ව්‍යාප්ත පෙත්සම් ව්‍යාපාරයකට මුල පුරමින් කොළඹ පැවති සම්මන්ත්‍රණයක් අමතමින් අධිනීතිඥ එස් රත්නවේල් අධිකරණ පද්ධතිය දැඩි විවේචනයකට ලක් කරමින් ප්‍රකාශ කළේ නඩුකාරයන් පවා අගතියෙන් යුතුව කටයුතු කළ බව ප්‍රසිද්ධියේ පැවසීමට තමන් මැලි නොවන බවයි.
රජයට වාසිදායක ආකාරයෙන් නඩු මෙහෙයවන ලෙසට විනිසුරුවන් නීතිඥ වරුන්ට බලපෑම් කරන බව ඔහු ඊට සාක්ෂි වශයෙන් දැක්වීය.
“යුද්ධය පැවති අවස්ථාවේ විනිශ්චයකාරවරුන් වඩා යහපත් ආකල්පයකින් කටයුතු කළ බව මගේ විශ්වාසයයි. එහෙත්, 2009න් පසු අධිකරණයේත්, නිලධාරි තන්ත්‍රයේත් ආකල්ප බරපතල වෙනසකට ලක්වූ,” බවයි දේශපාලන සිරකරුවන් ගණනාවකගේ අයිතිය වෙනුවෙන් උසාවි ගොස් ඇති නීතිවේදී රත්නවේල් මානව හිමිකම් ක්‍රියාධරයන් සමුහයක් අමතා ප්‍රකාශ කළේ.
ත්‍රස්තවාදය වැළක්වීමේ පනත යටතේ සිරගත කර සිටින්නන් බහුතරය හුදු පාපොච්චාරණ පදනම් කොට පමණක් රඳවා සිටින බව පෙන්වා දුන් ඔහු ඔවුන් නිදහස් කිරීම දේශපාලන නායකත්වයේ මැදිහත් වීමකින් සිදු කළ යුතු බව ඔහු අවධාරණය කර සිටියේය.
බියවද්දා ලබා ගන්නා පාපොච්චාරණ
“මේවා බරපතල වැරදි නොවේ, ඇත්තේ පාපොච්චාරණ පමණයි. පාපොච්චාරණ සාමාන්‍ය නීතිය යටතේ පිළිගැනෙන්නේ නෑ. ඒ නිසා ඔවුන්ගේ නිදහස සඳහා දේශපාලන අධිෂ්ඨානයක් තිබිය යුතුයි.”
‘පික්පොකට් කරුවකු වත්’ කැමැත්තෙන් තම වරද සම්බන්ධයෙන් නොකරන පාපොච්චාරණය ලබාගන්නේ බිය වැද්දීමෙන් බව නීතිවේදී රත්නවේල් කියා සිටියේය.
ඒ සඳහා වධ හිංසා පැමිණවීම අත්‍යාවශ්‍ය නොවන බව කී ඔහු ‘පොලිස් නිලධාරියකු සිටීම පමණක්’ අයකු බිය වැද්දීමට ප්‍රමාණවත් බව සඳහන් කළේය.
පාපොච්චාරණ අධිකරණයේ අභියෝගයට ලක් වූ විට ඒ සම්බන්ධයෙන් නීතිමය තීන්දුවක් දීම වසර ගණනාවක් ගතවන සංකීර්ණ ක්‍රියාදාමයක් හෙයින් එතෙක් කල් සිරභාරයේ කල් ගත කරන්නට සිදුවන අය සඳහා දේශපාලන විසඳුමක් දිය යුතු බව එස් රත්නවේල් නීතිවේදියා පෙන්වා දුන්නේය.
‘පියකු මෙන් බලන්න’
දේශපාලන සිරකරුවන් නිදහස් කරගැනීම සඳහා වන ජාතික ව්‍යාපාරය විසින් සංවිධානය කර තිබූ පෙත්සම අත්සන් කිරීමට එක්වූ ජාතික බලය සංවිධානයේ කැඳවුම්කාර හිමියන් ජනාධිපතිවරයාගෙන් ඉල්ලා සිටියේ බන්ධනාගාර ගත කර සිටින දෙමළ රැඳවියන් දෙස පියකු මෙන් බලා ඔවුන් නිදහස් කිරීමට පියවර ගන්නා ලෙසයි.
තමන්ගේ නිල වෙබ් අඩවියට අනවසරයෙන් ඇතුල් වූවන් සම්බන්ධයෙන් ‘දරුවන් ඇති තාත්තා කෙනකු මෙන්’ සලකන බව ජනාධිපති මෛත්‍රිපාල සිරිසේන ප්‍රකාශ කර තිබූ බව සිහිපත් කරදුන් වටරැක විජිත හිමියෝ, දේශපාලන සිරකරුවන් පිළිබඳවද ඒ හා සමාන අයුරින් කටයුතු කරන මෙන් ඉල්ලා සිටියහ.
(Radiogagana)
Facebook Comments
