නාත්තන්ඩියෙන්, මාදම්පෙන් වතුකරයට කෘතිම රා

බෝතල් රා හේතුවෙන් වතුකරයේ ජනතාව මහා ඛේදවාචකයක් දෙසට ගමන් කරමින් සිටින බව වතුකර දේශපාලඥයන් සහ සිවිල් සංවිධාන ක්‍රියාධරයෝ පවසති.

නාත්තන්ඩිය හා මාදම්පේ ප්‍රදේශයෙන් බෝතල් කළ රා ලොරි වලින් කඳු රටට ගෙන එන බවයි සංදේශය සමග අදහස් පළ කළ මස්කෙලියේ තැබෑරුමක සේවය කරන රමේෂ් කුමාර් කියා සිටියේ.

අරක්කු කාලේ බෝතලයක මිල රුපියල් තුන්සිය පනහක් වන අතර මෙම ‘කෘතීම රා’ බෝතලයක් රුපියල් සීයකට අලෙවි වන බැවින් වතුකරයේ කම්කරුවන් මෙම රා බීමට ඇබ්බැහි වී ඇති බවයි ඔහු පවසන්නේ.

ඔහු වැඩි දුරටත් කියා සිටියේ ඇතැම් විට සිය භාර්යාව සතු රන් ආභරණ හෝ වෙනත් වටිනා බඩු භාණ්ඩ පවා ඇපයට තබමින් වතුකර කම්කරුවන් මෙම රා බෝතල් ලබා ගන්නා බවයි.

නුවර එළිය දිස්ත්‍රික් පාර්ලිමේන්තු මන්ත්‍රී අධ්‍යාපන රාජ්‍ය අමාත්‍ය වී රාජක්‍රිශ්නන් බීබීසි සංදේශය කළ විමසීමකදී කියා සිටියේ නූගත් කම, විනෝද වීමේ මාධ්‍යයන්ගේ හිඟ කම සහ ආර්ථික පසුබිම හේතුවෙන් වතුකරයේ ජනතාව මෙම මිලෙන් අඩු බෝතල් කළ රා බීමට ඇබ්බැහි වී ඇති බවයි.

කඳු රට නව ගුරු පෙරමුණේ සංවිධායක ටී ජනාර්තන් ප්‍රකාශ කළේ වතුකරයේ දිළිඳු භාවයට ප්‍රධාන හේතුවද බීමත්කම බවයි.

වතුකරයේ කම්කරුවන් සිය බීමත්කම වෙනුවෙන් විශාල මුදලක් වියදම් කරන විට සිය දරුවන්ට අධ්‍යාපනය ලබා දීමේ අවස්ථාව නැති වී යන බැවින් බොහෝ පාසල් යන වයසේ දරුවන් සිය පියාගේ රකියාවටම යොමු වීමේ ප්‍රවණතාවක් දක්නට ලැබෙන බවයි ඔහු පෙන්වා දෙන්නේ.

එළවලු කොරටු සහ වතුවල කම්කරුවන් ලෙස වැඩ කරන මෙම දරුවන් කුඩා කාලයේ පටන්ම යම් මුදලක් හම්බ කිරීමටත් ඉන් රා බීමටත් පෙළඹෙන බවයි ටී ජනාර්තන් කියා සිටියේ.

බීමත්කම වෙනුවෙන් විශාල මුදලක්

ඔහු වැඩි දුරටත් කියා සිටියේ ඊට අමතරව දිළිඳු භාවය හේතුවෙන් බොහෝ වතුකර පවුල් වල භාර්යාවන් මැදපෙරදිග රැකියා සඳහා විදේශගත වන අතර ඒ හේතුවෙන් කුඩා දරුවන්ට නිසි රැකවරණයක් නොලැබීමද දරුවන්ගේ අධ්‍යාපනය කඩාකප්පල් වීමටත් ඔවුන් දුසිරිතට යොමු වීමටත් බොහෝ අවස්ථාවල ලිංගික අතවර වලට ලක් වීමටත් හේතු වී තිබෙන බවයි.

වතුකරයේ මැතිවරණ ප්‍රචාරණ කටයුතු වලදී දේශපාලනඥයන් මිලෙන් අඩු මත්පැන් සහ රා ලබා දෙන බවට පොරොන්දු ඉදිරිපත් කරන අතර මේ පොරොන්දු තමන්ට මනාප ලබා ගැනීමට භාවිතා කරන ඉත්තෙකු බවට පත් වී ඇති බවයි කඳු රට නව ගුරු පෙරමුණේ සංවිධායක ටී ජනාර්තන් පවසන්නේ.

සංදේශය වෙනුවෙන් අදහස් පළ කළ වතුකරයේ කාන්තාවන් කිහිප දෙනෙකුම කියා සිටියේ සිය පවුල් වලට ඇති ප්‍රධාන ප්‍රශ්නය සිය සැමියන්ගේ රා බීමේ පුරුද්ද බවයි.

(බී.බී.සී. සන්දේශය)