“ආරක්ෂාව දීමට බැරි වී” පොලිස් අත් අඩංගුවේ අයකු මරුට

අත්අඩංගුවට ගන්නා ලද මනුෂ්‍යයකුට ආරක්ෂාව සැපයීමට ශ්‍රී ලංකා පොලීසිය අසමත්වීම හේතුවෙන් තවත් ජීවිතයක් අහිමි වී තිබේ.

සංචරණ නීති කඩකිරීම සම්බන්ධයෙන් වන චෝදනා යටතේ ජූනි 6 ඉරිදා උදේ 9 ට පානදුර වත්තපොල ප්‍රදේශයේදී අත්අඩංගුවට ගත් පුද්ගලයකු පොලිස්ථානය වෙත රැගෙන එන අතරතුරදී පොලිස් ජීප් රථයෙන් බිමට පැනීමෙන් තුවාල ලබා පානදුර රෝහලට ඇතුලත් කර සිටියදී මිය ගොස් ඇති බවයි පොලිසිය පවසන්නේ. ඒ අතරවාරයේ අධිකරණය විසින් සැකකරුට ඇප ලබා දුන් බව පොලිස් මාධ්‍ය ප්‍රකාශක පවසයි.

ප්‍රතිකාර ලබමින් සිටියදීම එදින හවස් කාලයේදී මිය ගොස් ඇති ඔහු වයස අවුරුදු 48 ක පුද්ගලයෙකි. ඔහුගේ නම ඇතුළු වෙනත් විස්තර හෙළි නොකළ පොලිස් මාධ්‍ය ප්‍රකාශක නීතිඥ අජිත් රෝහණ ජීප් රියෙන් බිමට පැන තුවාල ලබා රෝහල්ගතව සිටි අයකු මියයාමට පෙර ඇප ලබා ගත් ආකාරයද පැහැදිලි කළේ නැත.

දින තුනක් ඇතුලත පොලිස් අත් අඩංගුවේ සිදුවූ දෙවැනි මරණය මෙයයි. මඩකලපුවේ 21 හැවිරිදි චන්ද්‍රන් විධූෂන් අත් අඩංගුවේ මියගියේ ජුනි 3 බ්‍රහස්පතින්දාය. පොලිසිය භාරයේ සිටියදී මේ වසර තුලදී මියගිය බවට වාර්තා වන සංඛ්‍යාව මේ සමගින් හතර දක්වා ඉහල යයි.

වත්තපොලදී අත්අඩංගුවට ගන්නා ලද සැකකරුගේ මියයෑමෙන් පසු පානදුර උතුර පොලිසියේ උප පොලිස් පරීක්ෂකවරයකුගේ සහ සැරයන්වරයකුගේ වැඩ වහාම ක්‍රියාත්මක වන පරිදි තහනම් කළ බව පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ පවසයි.

“මෙම අත්අඩංගුවට ගත් පොලිස් නිලධාරීන් විසින් සැකකරුගේ ආරක්ෂාව සම්බන්ධයෙන් නිසි ක්‍රියාමාර්ග ගෙන නොමැති බව බැලු බැල්මට පෙනී යනවා.”

වැඩ තහනමට ලක්වු පොලිස් නිලධාරීන්ගේ ප්‍රකාශ උපුටා දක්වමින් පොලිස් මාධ්‍ය ප්‍රකාශක පෙන්වා දෙන්නේ අත්අඩංගුවට ගත් සැකකරු පොලිස් ජීප් රථයෙන් පැනීම නිසා තුවාල සිදුවී ඇති බවයි.

“මෙම පුද්ගලයා අත්අඩංගුවට ගත් උපපොලිස් පරීක්ෂකවරයා සහ පොලිස් සැරයන්වරයා පවසා සිටින්නේ මොහු පොලීසිය වෙත රැගෙන එන අතරතුර ධාවනය වු ජීප් රථයෙන් පිටුපස දොර විවෘත කරගෙන පිටතට පැනීමක් සිදු කළ බව.”

පොලිස් නිලධාරීන් දෙදෙනාට එරෙහිව විනයානුකුලව ක්‍රියා කිරීම සදහා පොලිස් අධිකාරිවරයකුගෙන් යුත් කණ්ඩායමක් පත් කර විමර්ශනයක් සිදු කරන බව ඔහු වැඩි දුරටත් මාධ්‍යවේදීන් හමුවේ පවසා තිබේ.

පොලිස්පති වෙත යොමු කරන ලද ලිපියක් මගින් ශ්‍රී ලංකා මානව හිමිකම් කොමිෂන් සභාවේ සභාපති ආචාර්ය ජගත් බාලසුරිය පසුගියදා මතක් කර දී තිබුනේ පොලීසිය භාරයේ සිටින සැකකරුවන්ගේ ආරක්ෂාව තහවුරු කිරීම පොලිස් දෙපාර්තමේන්තුවේ වගකීමක් බව පොලිස් දෙපාර්තමේන්තුවේ නියෝග වල මෙන්ම ශ්‍රේෂ්ඨාධිකරණ නඩු තීන්දුවලද අවධාරණය කර ඇති බවයි.

ශ්‍රී ලංකා මානව හිමිකම් කොමිෂන් සභාව පසුගිය වසරේ නිවේදනය කර තිබුනේ 2020 ජුනි මස සිට ඔක්තෝබර් 20 දක්වා කාලය තුළ පොලිස් අත්අඩංගුවේ මරණ අටක් වාර්තා වී ඇති බවයි.