අගමැති-මුදල් ඇමැති සාකච්ඡාවෙන් පසුවත් “ගුරු සටන හමාර නෑ”

ගුරු හා විදුහල්පතිවරුන්ගේ වැටුප් විෂමතා ඉවත්කිරීම සඳහා ඇමැති අනුකමිටුව ඉදිරිපත් කර ඇති යෝජනාව ක්‍රියාත්මක කිරීමට මුදල් අමාත්‍යවරයා පොරොන්දු ලබා දුන්නද ගුරු විදුහල්පති අරගලය තවමත් අවසන් වී නොමැති බව දිවයිනේ ප්‍රමුඛතම ගුරු සංගම් නායකයෙක් පවසයි.

සියලුම වෘත්තීන් පාහේ නියෝජනය කරන වෘත්තීය සමිති එක්වී ගුරු අරගලයට සහාය පල කරමින් සාර්ථක ජාතික විරෝධතා දිනයක් පැවැත්වීමට පසුදාම අගමැති මහින්ද රාජපක්ෂගේ ප්‍රධානත්වයෙන් විශේෂ සාකච්ඡාවක් පාර්ලිමේන්තුවේ කැඳවා තිබුණි.

සාකච්ඡාවෙන් අනතුරුව මාධ්‍ය වෙත අදහස් දක්වමින් ලංකා ගුරු සංගමයේ ප්‍රධාන ලේකම් ජෝසප් ස්ටාලින් අවධාරණය කළේ සුබෝධිනී කමිටු වාර්තාවේ සමස්ත යෝජනා දිනා ගන්නා තෙක් අරගලය අත් නොහරින බවයි.

” මේ අරගලය අපේ අවසන් නෑ. අපේ වැටුප් අරගලය අවසන් නෑ. සමස්ත සුබෝධිනී කමිටු වාර්තාවම ලැබෙන තුරු අරගලය අවසන් වෙන්නේ නෑ. ”

ගුරු හා විදුහල්පතිවරුන්ගේ වැටුප් විෂමතා ඉවත්කිරීම සඳහා ඇමැති අනුකමිටුව ඉදිරිපත් කර ඇති යෝජනාව ක්‍රියාත්මක කිරීමට අගමැති මහින්ද රාජපක්ෂගේ ප්‍රධානත්වයෙන් පාර්ලිමේන්තුවේදී පැවති සාකච්ඡාවේදී මුදල් ඇමැති බැසිල් රාජපක්ෂ නොවැම්බර් 10 බදාදා පෙරවරුවේ ගුරු සංගම් නියෝජිතයන්ට පොරොන්දු වී තිබේ.

ඒ අනුව එලඹෙන අය වැයෙන් යෝජිත වැටුප (වැටුප් විෂමතාව යෙන් 1/3 කොටස) එකවර ලබාදීමට මුදල් ඇමැති බැසිල් රාජපක්ෂ එකඟ වී ඇත.

ගුරු විදුහල්පති වැටුප් විෂමතාවය ඉවත් කරන ලෙස රජයට බල කරමින් දින 118 ක අඛණ්ඩ අරගලයේ නියමුවෙක් වු ලංකා ගුරු සංගමයේ ප්‍රධාන ලේකම් ජෝසප් ස්ටාලින් මාධ්‍ය වෙත වැඩි දුරටත් කියා සිටියේ ගුරු විදුහල්පතිවරුන්ගේ ප්‍රධාන ඉල්ලීම ලබා දීමට ආණ්ඩුව එකඟ වීම සම්බන්ධයෙන් සාකච්ඡාවට එක්ව සිටි ගුරු සංගම් අනුකුලතාව පල කළ බවයි.

“නමුත් අපි මේක පිළිගැනීම නොපිලිගැනිම පිළිබදව ගුරු විදුහල්පති සන්ධානය හැටියට අපි ඒකාබද්ධව ප්‍රකාශයක් කරනවා,” යි ජෝසප් ස්ටාලින් ගුරු සංගම් නායකයා වැඩි දුරටත් සදහන් කළේය.

ශ්‍රී ලංකා පොදු ජන පෙරමුණ නිවේදනය කර ඇත්තේ එම සාකච්ඡාවේදී දරුවන්ගේ සහ රටේ අනාගතය වෙනුවෙන් ගුරු විදුහල්පති වැටුප් විෂමතාව ඉවත් කිරීම සඳහා ලබන අය-වැයෙන් අමතර රුපියල් මිලියන 30000ක් වැය කරන බවත් ඒ අනුව ඉතිහාසයේ පළමු වතාවට මෙරට අධ්‍යාපන සඳහා වැය කරන මුදල සමස්ත අය-වැයෙන් සියයට 7.51ක් වනු ඇතැයි මෙම හමුවේ දී මුදල් අමාත්‍ය බැසිල් රාජපක්ෂ ගුරු-විදුහල්පති වෘත්තිය සමිති නියෝජිතයන්ට දැනුම් දුන් බවයි.

“මේක විෂමතාවක් ඉවත් කිරීමක් මිස වැටුප් වැඩිවීමක් නෙමෙයි. මෙතන සිටින මහා සංඝරත්නය ඇතුළු වෘත්තිය සමිතිවලින් මම ඉල්ලා සිටිනවා අවුරුදු විසි ගණනක් විසඳන්න බැරිව තිබුණ වැටුප් විෂමතාවක් සාධාරණ මට්ටමෙන් විසඳීමක් විධියට දකින්න කියලා. කැබිනට් මණ්ඩලයේ අනුමැතිය අනුව දැනට වෙන් කරලා තියෙන මුදලට අමතරව රු. මිලියන 30000ක් අපි ලබන අය වැයෙන් ගුරු හා විදුහල්පති වැටුප් විෂමතාව ඉවත් කිරීම සඳහා වෙන් කරනවා. අය-වැයටත්, කැබිනට් මණ්ඩලයටත් ඉස්සරවෙලා ඔබතුමාලට කිව්ව එකම රහස ඒක.” මුදල් අමාත්‍ය බැසිල් රාජපක්ෂ සදහන් කර තිබේ.

අමාත්‍යවරුන් වන බැසිල් රාජපක්ෂ,දිනේෂ් ගුණවර්ධන අධ්‍යාපන අමාත්‍යාංශයේ ලේකම් මහාචාර්ය කපිල පෙරේරා, අග්‍රාමාත්‍ය අතිරේක ලේකම් නීතිඥ චමින්ද කුලරත්න,වෘත්තිය සමිති අධ්‍යක්ෂ ජනරාල් සුමිත් විජේසිංහ, හා ගුරු-විදුහල්පති වෘත්තිය සමිති නියෝජිතයෝ මෙම අවස්ථාවට එක්ව තිබේ.

ලංකා ගුරු සංගමයේ ජෝසප් ස්ටාලින්, ලංකා ගුරුසේවා සංගමයේ මහින්ද ජයසිංහ, සමස්ත ලංකා එක්සත් ගුරු සංගමයේ යල්වෙල පඤඤාසේකර හිමි, ශ්‍රී ලංකා ජාතික විදුහල්පති සංගමයේ මොහාන් පරාක්‍රම වීරසිංහ, ශ්‍රේණිධාරී විදුහල්පති සංගම් එකමුතුව සුගීෂ්වර විමලරත්න, විදුහල්පති සේවා සංගමයේ සුනිල් ප්‍රේමතිලක, ස්වාධීන අධ්‍යාපන සේවක සංගමයේ ජගත් ආනන්ද සිල්වා, ඒකාබද්ධ ගුරු සේවා සංගමයේ සංජීව බණ්ඩාර, ලංකා ප්‍රගති ගුරු සංගමයේ මයුර සේනානායක, කතෝලික ගුරු සංගමයේ නිර්මාලා ගමගේ, පුහුණු විද්‍යාපීඨ හා උපාධිධාරි ගුරු සංවිධානයේ ඩබ්.ඩබ්.ජේ.එල්.එච්. රොවෙල්, ලංකා ගෘහ වි. හා කෘෂි වි. ඩිප්ලෝ: සංගමයේ එන්.බී. චුලරත්න, ශ්‍රී ලංකා ඉස්ලාම් ගුරු සංගමයේ එම්.කේ. මොහොමඩ් නියාර්, ස්වාධීන ලංකා ගුරු සංගමයේ පී.එම්. පුංචිහෙට්ටි, ලංකා පිරිවෙන් ගුරු සේවා සංගමයේ මීගහජඳුරේ සීලානන්ද හිමි, සමස්ත ලංකා ගුරු උපදේශකවරුන්ගේ සංගමයේ එස්.ජී.එම්. සමරකෝන්, යන ගුරු සංගම් නායකයන් මාස හතරකට අධික කාලයක් තිස්සේ ගුරු විදුහල්පති වෘත්තිය සමිති සන්ධානය ලෙස ගුරු හා විදුහල්පතිවරුන්ගේ වැටුප් විෂමතා ඉවත්කරගැනීමේ සටනේ නිතරව සිටි.

ශ්‍රී ලංකා ජාතික ගුරු සංගමය, කඳුරට ගුරු පෙරමුණ, ගුරු විමුක්ති පෙරමුණ, ශ්‍රී ලංකා ප්‍රජාතන්ත්‍රවාදී ගුරු සංගමය, ශ්‍රී ලංකා අධ්‍යාපන සමාජ සම්මේලනය, වතු ගුරු සංගමය, ජාතික ගුරු සභාව, එක්සත් ද්‍රවිඩ ගුරු සංගමය යන ගුරු සංගම්ද එම සටහට සහාය ලබා දී තිබුනි.