අවුරුදු දෙකකට වැඩි කලක් ත්‍රස්ත නීති යොදාගෙන රඳවාගෙන සිටින මුස්ලිම් නීතිඥවරයකුට විරුද්ධව සාක්ෂි දෙන ලෙස බලකරමින් වධහිංසා කළ බවට චෝදනා ලබන ත්‍රස්ත පොලිසියේ නිලධාරීන් සම්බන්ධයෙන් වාර්තාවක් ඉදිරි සති දෙක තුල ලබා දෙන ලෙස අධිකරණය පොලිසියට නියෝග කර තිබේ.
අත් අඩංගුවේ සිටින සේව් ද පර්ල්ස් සංවිධානයේ මොහමඩ් සුල්තාන් ඔක්තෝබර් 27 දා කොටුව මහේස්ත්‍රාත්වරයාට දැනුම් දී ඇත්තේ නීතිඥ හෙජාස් හිස්බුල්ලා අපරාධකරුවකු බවට පත් කිරීමට සාක්ෂි දීම සඳහා ත්‍රස්ත විමර්ශන කොට්ඨාශයේ තිදෙනකු වධහිංසා කළ බවයි.
තමන්ට වද දුන් ඒ තුන්දෙනාගේ නම් සැකකරු විසින් කොටුව මහේස්ත්‍රාත් ප්‍රියන්ත ප්‍රනාන්දුට ලබා දී තිබේ.
දහඅට මාසයකට ඉහතදී මොහමඩ් සුල්තාන් අත් අඩංගුවට ගෙන තිබුනේ මද්‍රාසා පාසලක ඉගැන්වීම සම්බන්ධයෙනි.
වධහිංසා නිසා කොඳු ඇට පෙලේ අදටත් ආබාධිත තත්වයක් ඇති බව ඔහු විසින් පැවසීමෙන් අනතුරුව අධිකරණ වෛද්‍ය නිලධාරියකු හමුවට පමුණුවා වාර්තාවක් ලබා දෙන ලෙස අධිකරණය විසින් නියම කර තිබේ.
නීතිඥ හිස්බුල්ලා වරදෙහි පැටලවීම සඳහා සාක්ෂි දෙන මෙන් බලකරමින් වධහිංසා කළ බව මීට ඉහතදී අල් සුහාරියා අරාබි විද්‍යාලයේ ගුරුවරුන් දෙදෙනකු අධිකරණයට දැනුම් දී තිබුණි.
මොහමඩ් සුල්තාන්ට ඇප දීම ත්‍රස්ත මර්දන හා විමර්ශන ඒකකයේ නිලධාරීන් විසින් ප්‍රතික්ෂේප කළ නිසා ඔහු තවදුරටත් නොවැම්බර් 10 දක්වා රිමාන්ඩ් ගතකළ මහේස්ත්‍රාත්වරයා එදිනට වෛද්‍ය හා පොලිස් වාර්තා ලබා දෙන ලෙස නියම කර තිබේ.
පාස්කු ප්‍රහාරයට සම්බන්ධ මරාගෙන මැරෙන බෝම්බ ප්‍රහාරයක් එල්ල කළ බෝම්බකරුවකු සමඟ සබඳතා පැවැත්වු බවට චෝදනා කරමින් නීතිඥ හිජාස් හිස්බුල්ලා 2020 වසරේ අප්‍රේල් මාසයේදී අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් අතර මද්‍රසා පාසලක දේශනයක් පැවැත්වූ බවටත් මේ වන විට ඔහුට චෝදනා එල්ල වී තිබේ.
Facebook Comments
