ශ්‍රී ලංකාවේ රජය ජාත්‍යන්තර යුද අපරාධ අධිකරණය හමුවට ගෙනයන ලෙස ජගත් ප්‍රජාවට බලපෑම් කරමින් යුද පීඩිත දෙමළ ජනයා උතුරු හා නැගෙනහිර ස්ථාන තුනක ආරම්භ කළ උපවාස දිගටම පැවැත්වේ.
ශ්‍රී ලංකාවේ යුද අපරාධ සිදු කළ සියලු දෙනා ජාත්‍යන්තර යුද අපරාධ අධිකරණයට ඉදිරිපත් කර දෙමළ ජනයාට යුක්තිය ඉටු කර දෙන ලෙස ඉල්ලමින් ආගමික නායකයන්, විශ්වවිද්‍යාල සිසුන් හා සිවිල් ක්‍රියාධරයන් පෙබරවාරි 28 ඉරිදා යාපනය නල්ලුර් කන්දසාමි කෝවිල ඉදිරිපිට ආරම්භ කළ උපවාසය අද නම වැනි දිනටත් ක්‍රියාත්මකව පවති.
මඩකලපුව මාමංගම් ගණදෙවි කෝවිල ඉදිරිපිට නැගෙනහිර ජනයා මාර්තු 2 අගහරුවාදා ආරම්භ කළ උපවාසය අද හය වන දිනටත් පැවැත්වෙද්දී, අම්පාර කල්මුනේ ද්‍රෞපදී දේවාලය ඉදිරිපට ආරම්භ කළ උපවාසයට අදට දින දින පහක් සම්පුර්ණ වී තිබේ.
පළාත් බද වාර්තාකරුවන් පවසන්නේ මාර්තු මස 23 වනදා තෙක් අඛණ්ඩව එම උපවාසය දියත් කිරීම දෙමළ ජනයාගේ අපේක්ෂාව බවයි.
ජීනීවා නුවර මානව හිමිකම් කවුන්සලයේ 46 වැනි සැසිවාරය ආරම්භ වී ඇති මේ මොහොතේ ශ්‍රී ලංකාව සම්බන්ධයෙන් වන යෝජනාව ඉදිරිපත් කර ඇති බ්‍රිතාන්‍ය ප්‍රමුඛ රටවල් ශ්‍රී ලංකාව ජාත්‍යන්තර යුද්ධාධිකරණයට යොමු කිරීමට කටයුතු කළ යුතු බවට උපවාස කරුවෝ බල කර සිටිති.
යුද අපරාධ හේතුවෙන් වින්දිතයන් බවට පත් වු උතුරු නැගෙනහිර දෙමළ ජනතාවට සාධාරණය හා යුක්තිය ඉටු විය යුතු බව ඔවුන්ගේ ඉල්ලීම් අතර ප්‍රමුඛ වේ.
සති තුනකට අධික කාලයක් තිස්සේ යාපනයේ ක්‍රියාත්මක වීමට නියමිත උපවාසය සදහා විශ්වවිද්‍යාල සිසුන් කණ්ඩායම් වශයෙන් වරින් වර සහාය ලබා දීමට නියමිත බව යාපනයේ මාධ්‍යවේදීහු පවසති.
අගනගරයේදී මාධ්‍ය හමුවක් පවත්වමින් මෙරට සිවිල් සංවිධාන කිහිපයක්ම පසුගියදා ඉල්ලා තිබුනේ ශ්‍රී ලංකාවේ යුද අපරාධ සිදු කළ සියලු දෙනා ජාත්‍යන්තර යුද අපරාධ අධිකරණයට ඉදිරිපත් කර යුක්තිය ඉටු කර දෙන ලෙසයි.
“ජාත්‍යන්තර යුද අපරාධ අධිකරණයට යුද අපරාධ කළ සියලු දෙනා ඉදිරිපත් කරන ලෙසටත් අපට යුක්තිය ඉටු කර දෙන ලෙසටත් අපි ඉල්ලා සිටිනවා.”
මාරිමුත්තු සතිවේල් පියතුමා ඒ බව සදහන් කර තිබුනේ පෙබරවාරි 14 බදාදා කොළඹදී පැවැති මාධ්‍ය හමුවක් අමතමිනි.
එක්සත් ජාතීන්ගේ මානව හිමිකම් කොමසාරිස් වන චිලී රටේ හිටපු ජනාධිපති මිෂෙල් බැෂලේ පසුගියදා ඇයගේ වාර්තාවෙන් ශ්‍රී ලංකාව ‘බරපතල මානව හිමිකම් උල්ලංඝනය කිරීම්’ සිදු කර ඇති බවට පුළුල් ලෙස චෝදනා කර ඇති අතර යුද්ධය අතරතුර සිදු වූ අපරාධ සම්බන්ධයෙන් වගවීමක් ඉල්ලා තිබුනි.
“ජාත්‍යන්තර පරිමානයේ අපරාධ සම්බන්ධයෙන් යුක්තිය සලසා ලීම සඳහා ජාත්‍යන්තර ක්‍රියාමාර්ගයක් ගැනීමට කාලය එළැඹ තිබේ,” යි කොමසාරිස්වරිය ඇගේ පිටු 17 ක වාර්තාවේ සඳහන් කර ඇත.
මහා පරිමාන මානව හිමිකම් උල්ලංඝන චෝදනා ලබන ශ්‍රී ලාංකිකයන්ට එරෙහිව විදේශ වලදී දේපල සහ සංචාර තහනම් කිරීම ඇතුළු පියවර ගන්නා ලෙසද මානව හිමිකම් කොමසාරිස්වරිය සාමාජික රටවලින් ඉල්ලා තිබුනි.
වැරදි තොරතුරු අනුව ගොඩනංවන ලද චෝදනා මත පදනම් වූ නිර්දේශ රැගත් එකක් ලෙස හඳුවමින් ආණ්ඩුව විසින් මහකොමසාරිස් වාර්තාව ප්‍රතික්ෂේප කර තිබේ.
Facebook Comments
