දෙමළ-මුස්ලිම් එක්සත් කමට ශ්‍රීලනිපයෙන් බාධා

0
1

දේශපාලන ඉල්ලීම් දිනාගැනීම සඳහා දෙමළ කතාකරන පක්ෂ එක්සත් වී දරන වෑයමට බාධා පැමිණවීමට ආණ්ඩුවේ හවුල්කාර පක්ෂයක් පියවර ගෙන තිබේ.

උතුරු නැගෙනහිර පළාත් ඒකාබද්ධ කිරීමට සඳහා දෙමළ දේශපාලන පක්‍ෂ කරන ඉල්ලීම සම්බන්ධයෙන් ශ්‍රී ලංකා නිදහස් පක්ෂය පවසා ඇත්තේ මුස්ලිම් දේශපාලන පක්‍ෂ ඊට සහයෝගය ලබා නොදිය යුතු බවයි.

“දෙමළ මුස්ලිම් දේශපාලන පක්‍ෂ එකතුවෙලා තීන්දු ගන්න එක හොඳයි. මුස්ලිම් ජනයාගේ ප්‍රශ්න ගැන මුස්ලිම් මන්ත්‍රීවරුන්ට වඩා සුමන්තිරන්, ශානක්‍යන් වැනි දෙමළ මන්ත්‍රීවරු තමයි කතා කරන්නේ. ඒක අපි අගය කරනවා. ඒත් උතුරු නැගෙනහිර ඒකාබද්ධ කරන්න දෙමළ පක්‍ෂ විසින් මුස්ලිම් පක්‍ෂ වලින් සහාය ඉල්ලුවත් ඒකට ඉඩ දෙන්න බැහැ,“ යැයි සිය නිවසට මාධ්‍යවේදීන් කැඳවූ ශ්‍රීලනිප කොළඹ දිස්ත්‍රික් සංවිධායක හිටපු අමාත්‍ය ෆයිසර් මුස්තාපා පවසා තිබේ.

ශ්‍රී ලංකාවේ සියලුම මුස්ලිම් සංවිධාන සහ පක්ෂ නියෝජනය කරන දහස් සංඛ්‍යාත ජනකායක් 2003 දී අග්නිදිග විශ්ව විද්‍යාලයට රැස්වී සිය දේශපාලන අභිලාෂය කැටි කොට සම්මත කරගත් ‘ඔලුවිල් ප්‍රකාශනය’ ඉල්ලා සිටියේ ඒකාබද්ධ උතුරු නැගෙනහිර පළාත තුල ඔවුන්ගේ පාරම්පරික වාසභූමි සඳහා භූමියෙන් එකට යාවී නොමැති ස්වයංපාලන ඒකකයකි.

13 වැනි ව්‍යවස්ථා සංශෝධනය ප්‍රකාර පළාත් සභා පිහිටවූ 1988 සිට ඒකාබද්ධව පැවති උතුර හා නැගෙනහිර 2006 මහින්ද රාජපක්ෂ පාලන සමයේ දෙකඩ කරන ලද්දේ ජනතා විමුක්ති පෙරමුණ විසින් ශ්‍රේෂ්ඨාධිකරණයේ ගොනු කරන ලද පෙත්සමක් විභාග කළ අග විනිසුරු සරත් නන්ද සිල්වා ප්‍රමුඛ පංච පුද්ගල විනිසුරු මඩුල්ලක තීන්දුවකිනි.

හිටපු ඇමැති මුස්තාපාගේ අදහස උතුරු හා නැගෙනහිර පළාත් යළි ඒකාබද්ධ කිරීමෙන් මුස්ලිම් ජනතාව එහි සුළුතරයක් වන බවයි.

ශ්‍රී ලංකා නිදහස් පක්ෂය ඒකාබද්ධයට විරුද්ධව නැවත පෙරට පැමිණ ඇත්තේ දෙමළ බස වහරන පක්‍ෂ නායකයන් එකතුව සාකච්ජා වට කිහිපයකින් අනතුරුව 13 වැනි ව්‍යවස්ථා සංශෝධනය පුර්ණ බලතල සහිතව ක්‍රියාත්මක කරන ලෙස ඉල්ලා ඉන්දීය අගමැතිවරයාට ඉදිරිපත් කිරීම සඳහා ඒකාබද්ධ ලියවිල්ලක් සකස් කරමින් සිටියදීය.

එම සාකච්ඡා සඳහා සම්බන්ධ නොවූ හිටපු ඇමැති ෆයිසර් මුස්තාපා මාධ්‍යවේදීන්ට කියා ඇත්තේ උතුරු නැගෙනහිර ඒකාබද්ධ කිරීම ගැන එහි සඳහන් වන බැවින් මුස්ලිම් පාර්ශව ඊට අත්සන් කිරීම ප්‍රතික්ෂේප කර ඇතැයි තමාට දැන ගන්නට ලැබුණු බවයි.

“නැගෙනහිර පලාතට වඩා මුස්ලිම් ජනයා අනෙක් පළාත් වල සිංහල ජනයා සමග ජිවත් වෙනවා. දෙමළ මිනිස්සු වැඩිපුර ඉන්නේ උතුරු නැගෙනහිර පළාත් වල, කඳුකරය පදනම් කරගෙන ජිවත්වෙන දෙමළ ජනතාවගේ දේශපාලන ගමන වෙනස්. මුස්ලිම් දේශපාලන පක්‍ෂ මොන තීන්දු ගත්තත්, ඒවා කළ යුත්තේ අනෙකුත් පළාත් වල ජීවත්වෙන මුස්ලිම් අයට හානියක් නොවන අයුරින්,“යැයි ද ශ්‍රී ලංකා නිදහස් පක්‍ෂයේ කොළඹ දිස්ත්‍රික් සංවිධායක මුස්තාපා පවසා තිබේ.

මුස්ලිම් දේශපාලන පක්‍ෂ ක්‍රියාකාරිත්වය දැඩි ලෙස විවේචනයට ලක් කළ ෆයිසර් මුස්තාපා චෝදනා කළේ එම පක්‍ෂ මුස්ලිම් ජනයාගේ විකුණමින්, මුස්ලිම් සමාජය උගසට තබමින් දේශපාලනයේ නිරත වන බවයි.

“මොන ආණ්ඩුව ආවත් ඇමැතිකම් අරගෙන මුස්ලිම් ජනතාවගේ අවශ්‍යතා හා සංවර්ධනය කරනවා නම් හොඳයි. ඒත් ඒ වගේ කිසිවක් වෙලා නැහැ. ඒගොල්ලන්ගේ වාසිය විතරයි. 20 වැනි සංශෝධනයට මුස්ලිම් පක්‍ෂ නායකයෝ විරුද්ධ වුනත්, මන්ත්‍රීවරු ආණ්ඩුවට ජන්දය දුන්නා. ඒත් මුස්ලිම් සමාජයේ මුලික අයිතිවාසිකම්වත් ලබා දෙන්න මේ ගොල්ලන්ට බැරි වෙලා තියෙනවා,“යැයි ඔහු චෝදනා කළේය.

ඉන්දු – ලංකා ගිවිසුමට අනුකූලව පළාත් සභා පිහිටුවා බලය බෙදීමට විරුද්ධව ජවිපෙ ලේ වැකි සන්නද්ධ කැරැල්ලක් දියත් කරද්දී ඊට සහාය පල කරමින් ශ්‍රීලනිපය විසින් පළමු පළාත් සභා මැතිවරණය වර්ජනය කරන ලදී. ඉන් අනතුරුව පැවති සෑම පළාත් සභාවකම ඒ දෙපක්ෂය නියෝජනය වුනා පමණක් නොව ඔවුන් එක්ව පළාත් ආණ්ඩු ද පිහිටුවන ලදී.

Facebook Comments

wedding people