බලහත්කාරයෙන් අතුරුදහන් කරවුවන් සොයා දෙන ලෙස අඛණ්ඩව සිදු කරන විරෝධයට දින 300 සපිරෙන දිනයේම දෙමළ ජනයාගේ ගැටලු වලට විසඳුම් වෙනුවට රූපවාහිනි නාළිකාවක් ලබා දෙන බවට රජය නිවේදනය කරයි.
දෙමළ ජනතාවගේ ඉල්ලීම් සම්බන්ධයෙන් දකුණේ මතුවන විරෝධතා එසේ තිබියදී ආණ්ඩුව සංහිඳියාව උතුරට බෙදා දීම සඳහා දෙමළ භාෂාව කතා කරන ජනතාව හට “සංහිඳියාවේ නාලිකාව” නමින් නව රූපවාහිනි නාලිකාවක් ශ්‍රී ලංකා රූපවාහිනි සංස්ථාව මගින් ආරම්භ කරන බව 20 බදාදා පැවති කැබිනට් තීරණ දැනුම් දෙන මාධ්‍ය හමුවේදී සම කැබිනට් ප්‍රකාශක අමාත්‍ය රාජිත සේනාරත්න කියා සිටියේය.
ඒ සඳහා වෙනම සංඛ්‍යාතයක් ද ලබාදී ඇති අතර නව නාලිකාවට අවශ්‍ය තාක්ෂණික උපකරණ මේ වන විටත් ඇනවුම් කොට ඇති බවද ඔහු ප්‍රකාශ කළේය.
මෙම නාළිකාවට මැදිරි සංකීරණයක් ඉදිකිරිම සඳහා යාපනයේ දිස්ත්‍රික් ලේකම්වරයා විසින් චාවකච්චේරිය ප්‍රදේශයේ මීසාලෛයි වීරසිංහම් මධ්‍ය විද්‍යාලය පවත්වාගෙන යනු ලබන ඉඩමෙන් පර්චස් 100ක භූමි ප්‍රමාණයක් වෙන් කර දී තිබේ.
ජාතික සංහිඳියාව ගොඩනැංවීමේ දී පිටුවහලක් වන බැවින් “සංහිඳියාවේ නාලිකාව” ආරම්භ කිරීමට රජය තීරණය කළ බවයි සම කැබිනට් ප්‍රකාශක අමාත්‍ය රාජිත සේනාරත්න පෙන්වා දෙන්නේ.
සංහිඳියාව වැඩිපුරම ඇති කිරීමට කටයුතු කළ යුත්තේ උතුරේ නොව දකුණේ බව ජාතික සමඟිය හා සංහිඳියා කාර්යාංශයේ සභාපතිනිය හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මීට පෙර කියා තිබුණි.
Facebook Comments
