ක්ෂුද්‍ර මුල්‍ය සමාගම් වලට හසුවු පිරිස් වලට සහන ලබා දෙන බවට සහ එම සමාගම් නියාමනයට ජුනි මාසය තුල නීති රිති ඇති කරන බවට මුදල් හා ජනමාධ්‍ය අමාත්‍යවරයා ප්‍රකාශ කර තිබේ.
“මයික්‍රො ෆිනෑන්ස් කොම්පැණි වලට අහුවෙච්ච කාන්තාවන්ට මේ මාසේ ඇතුලත අපි විශේෂ සහනයක් ජුනි මාසේ 22 දා අපි ප්‍රකාශයට පත් කරන්න බලාපොරොත්තු වෙනවා. ඒ සහනය අනුව රුපියල් එක්ලක්ෂ පනස් දහසට වඩා අඩුවෙන් ණය ගත්ත අයගේ සියලුම පොළිය කපා හැරලා රජය ඒ පොළිය දරා ගන්නවා.” යි අමාත්‍ය මංගල සමරවීර පාර්ලිමේන්තුවේදී 7 බ්‍රහස්පතින්දා කියා සිටියේය.
ආර්ථිකය කඩා වැටීම හා මූල්‍ය ආයතන බිඳ වැටීම් සම්බන්ධයෙන් සභාව කල්තබන අවස්ථාවේ යෝජනාව ඉදිරිපත් කරමින්, ජනතාවගේ මුදල් ආපසු ලබාගැනීමට කඩිනම් විසදුමක් ලබදිය යුතු බවත්, එවැනි මූල්‍ය ආයතනවලට එරෙහිව නීතිය දැඩිව ක්‍රියාත්මක කළ යුතු බවට කල්තැබීමේ යෝජනාව ඉදිරිපත් කරමින් මන්ත්‍රී අනුර කුමාර දිසානායක නැඟු පැණයකට පිළිතුරු දෙමින් අමාත්‍යවරයා මේ බව ප්‍රකාශ කළේය.
ශ්‍රී ලංකා මහ බැංකුව විසින් ඉදිරියේදී ක්ෂුද්‍ර මුල්‍ය සමාගම් වල පොලී අනුපාතය සියයට තිහක උපරිමයකට යටත් කිරිමට පියවර ගන්නා බව ද ඇමැති මංගල සමරවීර විසින් අවධාරණය කරන ලදී.
ක්ෂුද්‍ර මූල්‍ය සමාගම් ඇති කළ තත්ත්වය ඛේදජනක බව පෙන්වා දුන් අමාත්‍යවරයා උතුරේ, උතුරු මැද පළාතේ, නියඟය පවැති දිස්ත්‍රික්කය තුළ මේ ප්‍රශ්නය ඉතාමත්ම තදබල ලෙස තිබෙන බව මෙන්ම මෙම සමාගම් වල ඉලක්කය වී ඇත්තේ අහිංසක කාන්තාවන් බව ද කියා සිටියේය.
දිගුකාලීන විසඳුම්
ක්ෂුද්‍ර මුල්‍ය සමාගම් වලින් ගත් ණය ගෙවා ගත නොහැකිව සිය දිවි හානි කර ගත් සිද්ධින් පිළිබඳව ද සිය අවධානය යොමු කර ඇති බව පෙන්වා දුන් ඇමැතිවරයා මෙම ගැටලුවට ක්ෂණික හා දීර්ඝ කාලීන විසඳුම් සෙවිය යුතු බවට යෝජනා කළේය.
ආර්ථිකයේ දැඩි අර්බුදයක් නැති වුවත් මූල්‍ය ක්ෂේත්‍රයට සම්බන්ධ ආයතන කීපයක අස්ථාවර බව ඇති වී තිබෙන බව ද අමාත්‍යවරයා විසින් පාර්ලිමේන්තුවේදී අනාවරණය කරන ලදී.
“ආර්ථිකයේ දැඩි අර්බුදයක් නැති වුණත්, මේ මූල්‍ය ක්ෂේත්‍රයට සම්බන්ධ ආයතන කීපයක අස්ථාවර බව ඇති වී තිබෙනවා. මූල්‍ය ආයතන කඩා වැටීමට විවිධ හේතු බලපාන්න පුළුවන්. නිසි මූල්‍ය කළමනාකරණයක් නොමැති වීම, අදූර දර්ශී ලෙස ණය නිකුත් කිරීම, දුර්වල කළමනාකරණය, වංචනික ක්‍රියා ද ආයතන කඩා වැටීමට බලපානවා.”
ජනතාවට වංචා කළ මූල්‍ය සමාගම්වල අධ්‍යක්ෂවරු 155ක් හඳුනාගෙන තිබෙන බව සඳහන් කල මුදල් අමාත්‍යවරයා තැන්පත්කරුවන්ට වන්දි ලබාදීමෙන් පසුව අදාළ මූල්‍ය සමාගම් ඈවර කිරීමට පියවර ගන්නා බව ද කියා සිටියේය.
තැන්පත්කරුවන්ට රටේ සංවර්ධනයට සහ ජනතා සුබසාධනයට වෙන් කර තිබෙන රටේ මූල්‍ය සම්පත් විවිධ වාංචනික හෝ අයතා ක්‍රියා හෝ කළමනාකරණ දුර්වලතා නිසා අර්බුදයන්ට ලක් වූ ආයතන වෙනුවෙන් වන්දි විදියට ගෙවීම කෙතරම් සාධරණ දැයි නැවතත් සිතිය යුතු යැයි අමාත්‍ය මංගල සමරවීර වැඩි දුරටත් පැවසීය.
Facebook Comments
