සැකකාර බුද්ධි නිලධාරින් නිදහස් කරන්න යන ගෝටාට විරුද්ධව පැමිණිල්ලක් (VIDEO)

0
ඡායා -රොෂාන් චතුරංග

රාජපක්ෂ පාලන සමයේ සිදුවු අපරාධ වලට චුදිත හමුදා බුද්ධි අංශ නිලධාරින් තමන් බලයට පත්වු වහාම නිදහස් කරන බවට පොහොට්ටු ජනපති අපේක්ෂකයා කරන ලද ප්‍රකාශයෙන් තම මානව හිමිකම් කඩවු බව පවසමින් අතුරුදහන් මාධ්‍යවේදියකුගේ බිරිඳක් පැමිණිලි කර තිබේ.

තම සැමියා වු ප්‍රගීත් එක්නැළිගොඩගේ අතුරුදහන් කරවීමට සැක කෙරෙන්නේ හමුදා බුද්ධි අංශ නිලධාරින් බව පෙන්වා දෙන සන්ධ්‍යා එක්නැළිගොඩ එම ප්‍රකාශය තමන් ඇතුළු සැකකාර බුද්ධි නිලධාරින් සම්බන්ධ වින්දිතයන්ගේ අයිතීන් උල්ලංඝන කිරීමක් බවයි අවධාරණය කරන්නේ.

“ඒ අය අපරාධකාරයින්. ඒ අයව එහෙම නිදහස් කරනවා නම් මේ රටේ අධිකරණයේ ස්වාධීනත්වය, නීතියේ ආධිපත්‍ය, වින්දිතයින්ගේ මානව හිමිකම් මේ සියල්ලම නොසලකා හැරලා තමයි එයා එහෙම නිදහස් කරනවා නම් කරන්න වෙන්නෙ,” යැයි ඇය කියා සිටියාය.

මහින්ද රාජපක්ෂ පාලන සමයේදී සිදුවු අපරාධ සම්බන්ධයෙන් අත් අඩංගුවට ගෙන සිටින හමුදා භටයන් තම පාලනයක් තුල නිදහස් කරන බවට පොහොට්ටු පක්ෂ ජනපති අපේක්ෂක ගෝඨාභය රාජපක්ෂ ඔක්තෝම්බර් 09 වනදා අනුරාධපුර සල්ගාදු ක්‍රිඩාංගණයේ පැවති ජන හමුවක දී පැවසීය.

“අද මේ රටේ ජනතාව අපෙන් ඉල්ලන්නේ වසර පහක් තිස්සේ කඩා බිඳදැමු රට යලි ගොඩගන්නා ලෙසයි. මේ සඳහා එදා ඇප කැප වුන රණවිරුවන් විශාල ප්‍රමාණයක් හිරගෙවල් වල ඉන්නවා අභුත නඩු චෝදනා ඉදිරිපත් කරලා. මම මේ අවස්ථාවේදී කියන්නට කැමති 17 වෙනිදා උදෑසන වෙනකොට මේ සියලු දෙනාම නිදොස් කොට නිදහස් කරනවැයි කියන එක.” යි ඔහු කියා තිබුනි.

මෙම ප්‍රකාශයට විරුද්ධව සන්ධ්‍යා එක්නැළිගොඩ 06 බදාදා ශ්‍රී ලංකා මානව හිමිකම් කොමිසම හමුවේ පැමිණිල්ලක් ගොණු කළ අතර ඒ පිළිබඳව සොයා බලා මානව හිමිකම් කොමිසම විසින් ඊට එරෙහිව පියවර ගනු ඇතැයි ඇය වැඩි දුරටත් විශ්වාසය පළ කළාය.

Facebook Comments

wedding people