ශ්‍රී ලංකාව සඳහා යෝජනා කරන රාජ්‍යයේ ස්වභාවය පිළිබඳව සජිත් ප්‍රේමදාස තම මැතිවරණ ප්‍රකාශනයෙන් ඉදිරිපත් කරන අදහසට උතුරේ හිටපු මහ ඇමැතිවරයා දක්වන විරෝධය හිටපු ජනාධිපතිවරයා ද අනුමත කර තිබේ.
එම ප්‍රතිපත්ති ප්‍රකාශයේ “මව්බිමේ ඒකීයත්වය” යන වචනය යොදා ගනිමින් “ඒකීය රාජ්‍යයක්” යන අදහස පෙන්වා සිංහල ජනතාව නොමඟ යැවීමට ක්‍රියා කර ඇති බවට චෝදනා කරන විපක්ෂ නායක මහින්ද රාජපක්ෂ හිටපු මහ ඇමති සී.වී. විග්නේෂ්වරන් පවා වංචනික වචන හරඹවලින් එක් එක් අර්ථ දැනවීමට උත්සාහ කිරීම ප්‍රතික්ෂේප කර ඇති බවයි නිවේදනය කරන්නේ.
මධ්‍යම ආණ්ඩුවේ බලය උපරිම ලෙස පළාත්වලට බෙදාහරින බවට සජිත් ප්‍රේමදාසගේ ප්‍රතිපත්ති ප්‍රකාශයේ ඇතුලත් බව පවසන මහින්ද රාජපක්ෂ එය පසුගිය ජනවාරි මාසයේ අග්‍රාමාත්‍යවරයා පාර්ලිමේන්තුවේ සභාගත කළ නව ව්‍යවස්ථා කෙටුම්පතේ අන්තර්ගතයට බොහෝ දුරට සමාන බව ද සඳහන් කර ඇත.
ඒ අනුව සජිත් ප්‍රේමදාසගේ ප්‍රතිපත්ති ප්‍රකාශය අගමැතිවරයාගේ ව්‍යවස්ථා කෙටුම්පතටත් වඩා දැඩි ෆෙඩරල්වාදී නැඹුරුවක් ඇති බව විපක්ෂ නායකවරයා සිය නිවේදනයෙන් කියා සිටී.
හංසාය ලකුණින් ජනපතිවරණය තරඟ කරන අපේක්ෂකයාගේ ප්‍රතිපත්ති ප්‍රකාශනයේ “ඒකීය රාජ්‍ය සංකල්පය” අතහැර “නොබෙදුනු සහ වෙන්කළ නොහැකි රාජ්‍යයක්” පිළිබඳ සංකල්පයක් හඳුන්වා දීමට යෝජනා වී බවද හෙතෙම නිවේදනය කරයි.
පළාත් සභා මන්ත්‍රිවරුන්ගෙන් සමන්විත දෙවැනි මන්ත්‍රි මණ්ඩලයක් ඇති කිරීමෙන් පාර්ලිමේන්තුවේ බලය සීමා කිරීම සහ මධ්‍යම හා පළාත් ආණ්ඩු අතර ආරවුල් විසඳීමට ව්‍යවස්ථා අධිකරණයක් ඇති කිරීම වැනි යෝජනාවල පරමාර්ථය වන්නේ ලිහිල් ෆෙඩරල් රාජ්‍යයක් ඇති කිරීම බවයි මහින්ද රාජපක්ෂ හිටපු ජනාධිපතිවරයා වැඩි දුරටත් පෙන්වා දෙන්නේ.
Facebook Comments
