මහර බන්ධනාගාරයේ ඇති වු ගැටුමේදී සිය සොයුරාට හිතා මතාම වෙඩි තබා ඝාතනය කර ඇති බවට මිය ගිය රැඳවියකුගේ නැගනියක් චෝදනා කරයි.
“එයාට වෙඩි තියලා තියෙන්නේ. වෙඩි වැදුනා නෙමෙයි එයාට වෙඩි තියලා. මට එයාගේ වෙඩි වැදුන එක මට පෙන්නන්න කියලා මම කිව්වම මට කිව්වා ඒවා පෙන්නන්න බෑ. මරණ පරික්ෂණයේදී තමයි එයා ගැන කියන්න පුළුවන් කියලා ඉවරවෙලා. ඉතින් මට ඕන මගේ අයියව මැරුන් නෑ. මැරුවා. මට ඒක ගැන සැකයි. ”
මහර ගැටුමේදී මිය ගොස් ඇති නාහේනේ අමිත් සුබසිංහගේ නැගනිය වන ලක්මාලි දිලුෂානි එම චෝදනාව කළේ ශ්‍රී ලංකා මානව හිමිකම් කොමිෂන් සභාව වෙත පැමිනිල්ලක් කිරීමෙන් පසු මාධ්‍ය වෙත අදහස් දක්වමිනි.
ඇය ඇතුළු මහර බන්ධනාගාරයේ නොවැම්බර් 29 දා ඇති වු ගැටුමෙන් තුවාල ලැබු හා මිය ගිය රැදවියන් කිහිපදෙනෙකුගේ පවුල් වල සාමාජිකයන් දෙසැම්බර් 7 සදුදා ශ්‍රී ලංකා මානව හිමිකම් කොමිෂන් සභාව වෙත පැමිනිලි ඉදිරිපත් කරමින් ඉල්ලා තිබුනේ තුවාල වුවන්ට සහ මිය ගිය අයට යුක්තිය ඉටු කරන ලෙසයි.
සිරකරු අයිතිවාසිකම් සුරැකීමේ කමිටුවේ සහායෙන් එම පැමිණිලි ඉදිරිපත් කර තිබුනි.
ඝාතනයට ලක් සිටින සිය සොයුරාගේ මළ සිරුර දෙසැම්බර් 6 වැනි ඉරිදා දැක ගැනීමට හැකි වු බව පවසන ලක්මාලි දිලූෂානි එහිදී වැඩි දුරටත් සදහන් කළේ අඩි හතක පමණ දුරක සිට එය හදුනාගැනීමට අවස්ථාව ලබා දුන් බවයි.
මහර බන්ධනාගාරයේ ඇති වු ගැටුමෙන් පසු රැදවියන් 25ක් වැලිකඩ බන්ධනාගාරයට රැගෙන ගිය බවක් සදහන් වුවත් සිය පුතු සම්බන්ධයෙන් කිසිදු තොරතුරක් නොමැති බව, පැමිණිලි කිරීම සදහා පැමිණ සිටි සන්ධ්‍යා සුමංගලී මාතාව එහිදී මාධ්‍යවේදීන් හා පවසා තිබුනාය.
“පුතාට තව වෙනතුරු මොකද උනේ කියලා මම දන් නැහැ. මට එයත් එක්ක කතා කරන්න ඕනේ. මගේ පුතා ඉන්න තැනකින් මට පෙන්නන්න,” මහර බන්ධනාගාරයේ රදවා සිටි දෙදරු පියකු වන රාගම සබීත දිනේෂ් කුමාර ගේ මෑනියන් හැඩු කදුලින් යුතුව සඳහන් කළාය.
ඇය වැඩි දුරටත් මාධ්‍යවේදීන් හමුවේ පවසා තිබුනේ බොරු චෝදනා නගා රිමාන්ඩ් භාරයට පත් කර සිටි සිය පුතු මහර ගැටුමට සම්බන්ධ බවට අසත්‍ය තොරතුරු පුවත්පත් වල පළ වී තිබු බවයි.
සිරකරු අයිතිවාසිකම් සුරැකීමේ කමිටුවේ සභාපති නීතිඥ සේනක පෙරේරා මාධ්‍යවේදීන් හා පවසා තිබුනේ මහර ගැටුමින් මියගිය රැදවියන් 11 දෙනාට යුක්තිය ඉටු කිරීමට පෙර ඔවුන්ගේ සිරුරු පුළුස්සාදැමීමේ සුදානමක් පැවැති පසුබිමක් තුළ සිය සංවිධානයට ඒ සදහා මැදිහත් වීමට වු බවයි.
ගැටුමෙන් තුවාල ලැබු රැදවියන් පිරිසට හරියාකාරව ඹෟෂධ හා අනෙකුත් සනීපාරක්ෂක පහසුකම් මෙන්ම ආහාර හිගයක් පවතින බවට තොරතුරු වාර්තා වන බවත් ක්‍රියාකාරී මානව හිමිකම් නීතිඥයා එහිදී සදහන් කළේය.
මහර ගැටුමට අදලාව අපරාධ විමර්ෂණ කටයුතු නිසි ආකාරයෙන් සිදු නොවන බවට සදහන් කළ නීතිඥවරයා මරණ පරීක්ෂණ සිදු කර නැතිව තිබියදී ලොහාන් රත්වත්ත අමාත්‍යවරයා මරණ සම්බන්ධයෙන් අසත්‍ය හේතු දැක්වීමට පාර්ලිමේන්තුව යොදාගැනීම දැඩි දෝෂ දර්ශනයට ලක් කළේය.
“මොකද විෂය භාර ඇමතිතුමාම පාර්ලිමේන්තුවේ කියනවා මේ සිද්ධියේ දෙපිරිසක් අතර ගහ ගත්ත දෙයක් තමයි තියෙන්නේ. එහෙම නැතුව වෙඩි තැබීමක් වෙලාම නැහැල්ලු මරණ පරීක්ෂණය අනුව. කිසිම මරණ පරීක්ෂනයක් මේ වෙලාවේ ඒ වෙනකොට කරලා නොතිබිච්ච පසු බිමක විෂයභාර ඇමති ලොහාන් රත්වත්තේ පාර්ලිමේන්තු වරප්‍රසාදවලට මුවාවෙලා තනි බොරුවක් කීම සම්බන්ධයෙන් අපි අපේ විරෝධතාවය පළ කර සිටිනවා.”
සත්‍යය යටපත් කිරීම රජයේ උවමනාව වී ඇති බවට චෝදනා කළ නීතිඥ සේනක පෙරේරා මහර ගැටුමේ වින්දිතයන්ට ශ්‍රී ලංකා මානව හිමිකම් කොමිසමින් යුක්තිය ඉටුවනු ඇති බවට විශ්වාසය පල කළේය.
මහර බන්ධනාගාරයේ කළහකාරී සිද්ධියෙන් මියගිය රැඳවියන් 11 දෙනාගෙන් 6 දෙනෙකුගේ අනන්‍යතාවය මේ වන විට තහවුරු කරගෙන ඇතැයි පොලිස් මාධ්‍ය ප්‍රකාශක කාර්යාලය සදහන් කරයි.
Facebook Comments
