උතුරේ පවුල් ගණනාවක ජීවන පැවැත්ම රඳා පවතින මුහුදු තීරයක් වන සංරක්ෂණ දෙපාර්තමේන්තුවට පවරා දීමට ගෙන ඇති තීරණයක් හේතුවෙන් ප්‍රදේශවාසි ධීවරයන් නොසන්සුන්තාවයට පත්ව සිටින බව උතුරු පළාතේ හිටපු ප්‍රාදේශීය ජනතා නියෝජිතයෙක් පවසයි.
යාපනය මාධ්‍ය සමාජයේදී මාධ්‍ය හමුවක් පවත්වමින් නොවැම්බර් 29 දා උතුරු පළාත් හිටපු මන්ත්‍රී එස්. කුගදාස් සදහන් කළේ යාපනයේ දිස්ත්‍රික්කයේ සංගානේයි ප්‍රාදේශිය ලේකම් කොට්ඨාසයට අයත් අරාලි සිට පොන්නාලි දක්වා පවතින වෙරළ තීරය වන සංරක්ෂණ දෙපාර්තමේන්තුවට අයත් ප්‍රදේශයක් ලෙස වෙන් කර ඇති බව සදහන් කරමින් යාපනය දිස්ත්‍රික් ලේකම් කාර්යාලය මගින් සංගානේයි ප්‍රාදේශිය ලේකම්වරයාට ලිපියක්ද යොමු කර ඇති බවයි.
වෙරළ තීරයේ සිට ගොඩ බිම දෙසට කිලෝ මීටර් එක හමාරක පළලින් යුතුව කිලෝ මීටර් 10 ක් දිග භුමි ප්‍රදේශයක් මෙලෙස වන සංරක්ෂණ දෙපාර්තමේන්තුවට පවරා දෙමින් ජනජීවිතය අදාළ කිරීමේ සැලසුමක් ඇති බවට එස්. කුගදාස් චෝදනා කර තිබුනි.
“ මේ කාරණය ප්‍රදේශයේ ජනතාව සම්පූර්ණයෙන්ම ප්‍රතික්ෂේප කරනවා. ඒ ජනතාවගේ ජීවනෝපාය සහ ජීවන රටාව රඳා පවතින්නේ මේ වෙරළ තීරයේ. වෙන් කිරීමට නියමිත, අරාලි බටහිර, දකුණ සහ නැගෙනහිර වෙරළබඩ ප්‍රදේශ, වට්ටු දකුණ වෙරළ තීරය, පොන්නාලෙයි බටහිර සහ දකුණ යන ප්‍රදේශ මීට ඇතුළත් වෙනවා. මේකට කිලෝ මීටර් 10 ක පමණ දුරක් ආවරණය වෙනවා.“
උතුරු පළාත් හිටපු මන්ත්‍රීවරයා මාධ්‍ය හමුවේදී වැඩි දුරටත් සදහන් කර තිබුනේ වන සංරක්ෂණ දෙපාර්තමේන්තුව අත්පත් කර ගැනිමට සුදානම් වන ප්‍රදේශය තුළ ජනතාවගේ පොදු ස්ථානද ඇතුලත්ව ඇති බවයි.
“ මුළු ප්‍රදේශයේම ජීවත් වන්නේ මුහුදු කර්මාන්ත මත පදනම් වූ මිනිස්සු. කනත්ත, ක්‍රීඩා පිටිටනි, ඒ වගේම කෘෂිකාර්මික ප්‍රදේශත් මේකට ඇතුලත් වෙනවා. ඉතින් මේ යෝජනාව ජනතාවගේ මුලික ජීවනෝපායන් අඩාල කිරීමේ වැඩ පිළිවෙලක්.“
උතුරු පළාත් හිටපු මන්ත්‍රීවරයා සිදු කළ අනාවරණය සම්බන්ධයෙන් මාධ්‍යවේදින් කළ විමසීමකට පිළිතුරු දෙමින් ප්‍රදේශයේ ඉඩම් බලධාරියා පවසා ඇත්තේ එවැනි යෝජනාවක් වන සංරක්ෂණ දෙපාර්තමේන්තුව මගින් සිදු කර ඇති නමුත් එම ඉඩම් පවරා දීමට තීන්දු කර නොමැති අතර හිටපු මන්ත්‍රීවරයා මාධ්‍ය හමුවේ කරුණු පවසා ඇත්තේ කරුනු නිසි ලෙස වටහාගැනීමකින් තොරව බවයි.
වන සංරක්ෂණ දෙපාර්තමේන්තුව මගින් සිදු කර තිබෙන යෝජනාව සම්බන්ධයෙන් තමන් ප්‍රදේශයේ ජනතාවගෙන් අදහස් විමසීම ආරම්භ කර ඇති බව පැවසු යාපනය දිස්ත්‍රික් ලේකම් අම්බලවානර් සිවබාලසුන්දරන් වැඩි දුරටත් සදහන් කර ඇත්තේ ජනතා කැමැත්තට පිටින් කටයුතු නොකරන බවයි.
“සාමාන්‍ය ජනතාවගේ කැමැත්ත නැතිව මේක කරන්න බැහැ. ඒක ගැසට් නිවේදනයක් හෝ පවරා ගැනීමේ නිවේදනයක් නෙමෙයි. මේක යෝජනාවක්. මේ සම්බන්ධයෙන් සාමාන්‍ය ජනතාවගේ මතය දැනගැනීමේ කටයුතු මම ආරම්භ කරලා තිබෙනවා. මේක තමයි සිදු උනේ. වන සංරක්ෂණ දෙපාර්තමේන්තුව ඉල්ලනවා කියලා ඉඩම් දෙන්න බෑ. එය කළ හැක්කේ පොදු මහජනතාවගේ කැමැත්ත ඇතුව පමණයි.“
උතුරු නැගෙනහිර දෙමළ ජනයාගේ ඉඩම් බලහත්කාරයෙන් අත්පත්කරගන්නා බවට වන සංරක්ෂණ දෙපාර්තමේන්තුවට පසු ගිය කාලය තුළ චෝදනා රැසක්ම එල්ල වී තිබුනි.
Facebook Comments
