අසත්‍ය චෝදනා එල්ල කර මාධ්‍යවේදීන්ට එරෙහිව අධිකරණ ක්‍රියාමාර්ග ගැනීම හරහා සිදු කරන මාධ්‍ය මර්දනය වහාම නතර කරන ලෙස පොලීසියට බලකරමින් වන්නියේදී විරෝධතාවයක් දියත් කර තිබේ.
දෙසැම්බර් 02 වැනි සෙනසුරාදා වව්නියාව පරන බස් නැවතුම් පොළ ඉදිරිපිටදී දියත් කළ විරෝධතාවය සංවිධානය කර තිබුනේ වව්නියාව මාධ්‍ය සමාජය විසින් බවයි පළාත් බද වාර්තාකරුවන් පවසන්නේ.
“මාධ්‍ය මර්දනයට එරෙහිව එක්වෙමු“ යනුවෙන් සිංහල, දෙමළ හා ඉංග්‍රීසි බසින් සදහන් ප්‍රධාන බැනරය යටතේ දියත් කළ විරෝධතාවයට දේශපාලන නියෝජිතයන් සහ ප්‍රදේශයේ ව්‍යාපාරිකයන්ට අමතරව බලහත්කාරයෙන් අතුරුදහන් කළ පවුල් වල සාමාජිකයන්ද කළුකොඩි අතැතිව සහාය පළ කර තිබුනි.
විරෝධතාවයට එක්ව සිටි පිරිස චෝදනා කළේ දෙමළ මහවිරු දිනයට පසුදා වව්නියාව තැපැල් කාර්යාලය සමීපයේ සවිකර තිබු බැනරයක් හා ඡායාරූප ප්‍රදර්ශනයක් සම්බන්ධයෙන් වාර්තාකරණය සදහා පැමිණ සිටි මාධ්‍යවේදියෙකුට අසත්‍ය චෝදනා නගා පොලීසිය අධිකරණ ක්‍රියාමාර්ග ගෙන ඇති බවයි.
ඝාතනයට ලක්වු ඉන්දිය අගමැති රජිවි ගාන්ධි, හිටපු අමාත්‍ය ලක්ෂ්මන් කදිරගාමන්, මානව හිමිකම් ක්‍රියාධාරිනියක සහ විශ්ව විද්‍යාල කථිකාචාර්ය වරියක් වූ රාජිනී තිරාණගම, ඊ.පී.ඩී.පී සංවිධානයේ සාමාජිකයන් ඇතුළු කිහිප දෙනෙකුගේ ඡායාරූප යොදා ගනිමින් සකස් කළ බැනරයක් නොවැම්බර් 28 වැනිදා වන විටත් එම ස්ථානයේ ප්‍රදර්ශනය කර තිබී ඇත.
එම බැනරයේ දෙමළ භුමියේ සැබැ නායකයන් යනුවෙන් සදහන් වැකියක්ද ලියා තිබු අතර එම බැනරයේ ජායාරූප වල සිටින පිරිස ඝාතනය කළ බවට දෙමළ ඊලාම් විමුක්ති කොටි සංවිධානයට චෝදනා එල්ල කර තිබු බවයි පළාත් බද වාර්තාකරුවන් පවසන්නේ.
හිටපු එල්.ටී.ටී.ඊ සංවිධානයේ සාමාජිකයකු මෙන්ම, මේ වන විට වව්නියාව හිටපු සටන්කාමීන්ගේ සුභසාධක සංගමයේ සභාපති ලෙස කටයුතු කරන එස්. අරවින්දන් එම ස්ථානයට පැමිණ ඉහත ඝාතන එල්.ටී.ටී.ඊ සංවිධානය විසින් සිදු කළ බවට ඇති සාක්ෂි කවරේදැයි එහි සංවිධායකයන්ගෙන් විමසනු දකින්නට ලැබුණි.
ඒ ගැන පිළිතුරක් දීමට අසමත් වූ සංවිධායකයන් පවසා තිබුනේ ආරක්ෂක අංශ මෙහෙයවීමෙන් තමන් එම ඡායාරුප ප්‍රදර්ශනයට තැබූ බවයි. ඉන්පසුව සංවිධායකයා සිය ජංගම දුරකතනයෙන් ඇමතු ආරක්ෂක අංශ නිලධාරියකු බව කී අයකු හා කතාකළ අරවින්දන් කියා සිටියේ එල්ටීටීඊයට එල්ලවන එම චෝදනා අදත් අධිකරණයකින් ඔප්පු කොට නැති බවයි. එමනිසා එම ප්‍රදර්ශන භාණ්ඩ ඉවත් කරන ලෙස අරවින්දන් ආරක්ෂක අංශ සාමාජිකයාට දුරකතනයෙන් පවසනු ප්‍රදේශයේ මාධ්‍යවේදීන් විසින් පටිගත කර තිබේ.
බැනරය හා ඡායාරූප සංවිධායකයන් විසින් ඉවත් කරගෙන යන විට පැමිණි පොලිස් නිලධාරීන් එම ස්ථානයේ සාමය කඩ කළ බවට චෝදනා කරමින් අරවින්දන් අත්අඩංගුවට ගෙන පසුව පොලිස් ඇප මත මුදා හැර තිබුනි.
එම අවස්ථාවේ එම ස්ථානයේ වාර්තාකරණයේ යෙදී සිටි වව්නියාව මාධ්‍ය සමාජයේ සභාපති මෙන්ම නිදහස් මාධ්‍යවේදියෙකු වන පරමේෂ්වරන් කාර්තීපන් ද එස්. අරවින්දන්ට සහාය පළ කළ කරමින් ස්ථානයේ සාමය කඩ කළ බවට පොලීසිය අධිකරනයේ නඩුවක් ගොනු කර ඇති බවයි පළාත් බද වාර්තාකරුවන් පවසන්නේ.
ඔවුන් තව දුරටත් සදහන් කරන්නේ පොලීසිය අධිකරණය හමුවේ ගොනු කළ කරුණු අනුව මාධ්‍යවේදියා අත්අඩංගුවට ගැනීමට වව්නියාව මහේස්ත්‍රාත් වරයා නියෝග කර ඇති බවයි.
පොලීසිය අසත්‍ය චෝදනා එල්ල කරමින් මාධ්‍යවේදීන් දඩයම් කිරීමේ යෙදී සිටින බවට චෝදනා කරමින් දියත් කළ විරෝධතාවයේදී මාධ්‍යවේදීන්ගේ නිදහස තහවුරු කරනු, මාධ්‍යවේදීන්ගේ ඝාතන වලට යුක්තිය ඉටු කරනු, ජනතාවෙග් නිදහස යනු අදහස් ප්‍රකාශ කිරිමේ නිදහසයි යනුවෙන් සදහන් සටන් පුවරුද ප්‍රදර්ශනය කර තිබේ.
පසුගිය සමයේ ඝාතනයට සහ පැහැර ගැනිමට ලක්වු සියළු මාධ්‍යවේදීන් වෙත යුක්කිය ඉටු කරන ලෙසත් මෙම විරෝධතාවයේදී වව්නියාව මාධ්‍ය සමාජය ඉල්ලා සිටි බව පළාත් බද වාර්තාකරුවෝ වැඩි දුරටත් පවසති.
මාධ්‍යවේදීන් 44 ක්
ජනාධිපති ගෝඨාභය රාජපක්ෂ ආරක්ෂ ලේකම් ධුරය දරන සමයේදී ඝාතන සහ පැහැරගැනීම් ඇතුළු පීඩාවලට රට තුලදී ලක්වූ මාධ්‍යවේදීන් ගණන 44 ක් බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසින් සම්පාදනය කරන ලද වාර්තාවක දැක්වේ.
ඉන් වැඩි ප්‍රමාණයක් උතුරේ දෙමළ මාධ්‍යවේදීන්ය. ඔවුන් කිසිවෙකුටත් මේ තාක් යුක්තිය ඉටු වී නොමැත.
වත්මන් ජනාධිපති රනිල් වික්‍රමසිංහ අගමැතිවරයා ලෙස කටයුතු කළ සමයේ එම මාධ්‍යවේදීන් වෙනුවෙන් යුක්තිය ඉටු කරන බවට වු පොරොන්දු මේතාක් ඉටු කර නොමැති බවටත් විරෝධතාකරුවන් එහිදී අවධාරණය කර තිබේ.
බිංගිරිය නගරයේ වාර්තාකරණයේ යෙදෙමින් සිටියදී බිංගිරිය පොලිස් ස්ථානයට අනුයුක්ත නිලධාරීන් විසින් නොවැම්බර් 30 වැනි බ්‍රහස්පතින්දා අත්අඩංගුවට ගෙන බරපතල ලෙස පහර දුන් කුලියාපිටිය, උඩුබද්දාව රූපවාහිනී වාර්තාකරු දිනෙත් කුමාර, හෙට්ටිපොළ මහේස්ත්‍රාත් උසාවිය විසින් දෙසැම්බර් 01 දින ඇප මත නිදහස් කළ බව ද ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ සංවිධානය වාර්තා කර ඇත.
Facebook Comments
