හතලිස් දෙවසරක සිය දේශපාලන දිවියට සමුදීමට එක්සත් ජාතික පක්ෂ නායකයා තීරණය කර ඇතැයි වෙබ් අඩවියකට ප්‍රකාශ කර තිබේ.
පාර්ලිමේන්තුවේ වාරවසාන වන විට දේශපාලන දිවියට සමුදෙන බවට හිටපු අගමැති රනිල් වික්‍රමසිංහ පැවසු බව ලංකා නිවුස් වෙබ් අඩවිය වාර්තා කරයි.
එක්සත් ජාතික පක්ෂයේ ඇතිව තිබෙන අර්බුදය අවසන් කිරීමට ඔහු මෙම තීරණය ගෙන ඇති බවටයි එම වෙබ් අඩවිය වැඩි දුරටත් සඳහන් කරන්නේ.
පක්ෂ රැක ගත හැකි නායකයෙකු හට බාර දීමට රනිල් වික්‍රමසිංහ තීරණය කර ඇති අතර එවැනි නායකයෙක් හමු නොවුනද තම තීරණයේ වෙනසක් නැති බව අවධාරණය කර ඇත.
ජනාධිපතිවරණය පරාජය වීමට හේතුව ඉක්මන් තීරණ බව පෙන්වා දී ඇති එජාප නායකයා දේශපාලනයේදී ඉවසීමෙන් කටයුතු කළ යුතු අතර එය තරුණ දේශපාලකයන්ට ඉතා වැදගත් බව පවසා තිබේ.
දේශපාලනයේදී ඉතා ඉවසීමෙන් හා කල් යල් බලා කටයුතු කිරීම ඉතා වැදගත් බව තරුණ දේශපාලකයන්ට තමන් දෙන උපදේශය වන්නේ ද එය බවයි එජාප නායක රනිල් වික්‍රමසිංහ වැඩි දුරටත් පවසා ඇත්තේ.
මේ අතර මහ මැතිවරණයට මුහුණදීම සඳහා එක්සත් ජාතික පක්ෂය වහාම ප්‍රතිසංවිධානය කළ යුතු බව හා මැතිවරණ සටන සජිත් ප්‍රේමදාස වෙත පවරන්නැයි පක්ෂයේ ජ්‍යෙෂ්ඨ නායකයින් පිරිසක් රනිල් වික්‍රමසිංහට යෝජනා කර තිබේ.
සජිත් ප්‍රේමදාස වෙත පක්ෂ නායකත්වය පවරා මහ මැතිවරණය තෙක් පාර්ලිමේන්තුවේ විපක්ෂනායකයා ලෙස කටයුතු කරන ලෙස ඉල්ලා ඇති එම පිරිස දේශපාලනයෙන් සමු නොගෙන පක්ෂයේ යාවජීව අනුශාසක ලෙස කටයුතු කරන්නැයි වැඩි දුරටත් ඉල්ලා ඇත.
Facebook Comments
