යුද අපරාධ ඇතුළු බරපතල මානව හිමිකම් උල්ලංඝන සිද්ධ වූ බවට එක්සත් ජාතීන්ගේ සංවිධානය හා දෙමළ ජනතාව ඇතුළු බොහෝ දෙනකුගේ චෝදනාවට ලක්ව සිටින යුද්ධයේ දී “වැරදි සහ අඩුපාඩු” සිදුවූ බව හිටපු ආරක්ෂක ලේකම් වරයා පිළිගෙන තිබේ.
ඒවා මොනවාදැයි කියා නැතත් “දස ප්‍රතිපදා” නම් සිය මැතිවරණ ප්‍රකාශය එලි දක්වමින් පොහොට්ටු අපේක්ෂක ගෝඨාභය රාජපක්ෂ පවසා ඇත්තේ එහි “වගකීම සහ වගවීම” තමන් බාර ගන්නා බවයි.
කෙසේ වෙතත්, පසුගියදා හින්දු පුවත්පතේ මාධ්‍ය වෙදිනී මීරා ශ්‍රී නිවාසන් ගේ ප්‍රශ්න කිරීම් හමුවේ හිටපු ආරක්ෂක ලේකම් කියා සිටියේ යුද්ධය මෙහෙයවන ලද්දේ එවක හමුදාපති බවයි.
“අපි කිසිවටකත් උතුරේ චෙමළ ජනතාවට එරෙහිව යුද්ධ කළේ නැත. අපගේ අරමුණ වුයේ තිස් වසරක් ත්‍රස්තවාදයෙන් බැට කෑ ජනතාව නිදහස් කර ගැනීම සඳහා මානුෂිය මෙහෙයුමක් දියත් කිරීම පමණි. එයත් දැන් අතීතයට අයිති දෙයක් පමණක් වුවත් ඒ සම්බන්ධයෙන් අපගේ වගකීම සහ වගවීම අප කිසිසේත් සුළු කොට සලකන්නේ නැත. මානුෂිය මෙහෙයුමේදී සිදුවී ඇති වැරදි අඩුපාඩු සකස් කර ගැනීම සඳහා අවශ්‍ය ක්‍රියාමාර්ග ගන්නා අතරම දැන් අපට අවශ්‍ය වන්නේ වියලුණු රළු පොළවේ දුවිලි මතින් නැඟී සිටින බියෙන් සැකෙන් තොරව සුව පහසුවෙන් ජිවත් විය හැකි සමෘද්ධිමත් ප්‍රදේශයක් ලෙස උතුර හා නැගෙනහිර පළාත් නඟා සිටු වීමයි.” යනුවෙන් ගෝඨාභය රාජපක්ෂ 25 සිකුරාදා නෙළුම් පොකුණ රඟහලේ එළි දැක්වු සිය ප්‍රතිපත්ති ප්‍රකාශනයේ ඇතුලත්ව ඇත.
ශ්‍රී ලංකා ආරක්ෂක අංශ ඡන්ද ව්‍යාපාරය වෙනුවෙන් යොදාගැනීම නීති විරෝධී බව මැතිවරණ කොමසාරිස් මහින්ද දේශප්‍රිය ප්‍රකාශ කර තිබියදී ගෝඨාභය රාජපක්ෂ සිය ජනාධිපතිවරණ ප්‍රකාශය සඳහා ශ්‍රී ලංකා යුද හමුදාවේ ඡායාරූප පාවිච්චි කර තිබුණි.
Facebook Comments
