ඇවන්ට්ගාඩි පාවෙන ආයුධ නැව සම්බන්ධ නඩුවෙන් ගෝඨාභය රාජපක්ෂ ඇතුළු සැකකරුවන් නිදහස් වී ඇත්තේ නීතිපති දෙපාර්තුමේන්තුවට කෝටි ගණනක අල්ලසක් ලබා දී බවට එම දෙපාර්තුමේන්තුවේ හිටපු ජ්‍යෙෂ්ඨතම නිලධාරියෙක් ආන්දෝලනාත්මක හෙළිදරව්වක් කර තිබේ.
එම සිද්ධිය සම්බන්ධ පරික්ෂණ සිදු කරන ලද පොලිස් නිලධාරින් විශාල අල්ලසක් දී නම්මා ගැනීමට නොහැකි වු තැන නීතිපති දෙපාර්තමේන්තුවට ඊට අඩු මුදලක් දී ඔවුන් නිදහස් වු බවට හිටපු සොලිසිටර් ජෙනරාල් වසන්ත නවරත්න බණ්ඩාර චෝදනා කරයි.
“එක නිලධාරියෙක් මට කිව්වා මේක පුලුවන් තරම් පරක්කු කරන්න එයාට ලක්ෂ 800ක අල්ලසක් මේගොල්ලො දෙන්න කැමැත්ත ප්‍රකාශ කරළා තියෙනවා. ඒ තැනැත්තා සල්ලි වලට ගන්න බැරි නිලධාරියෙක්. මේ සියල්ලොම නිදහස් කළාට පස්සේ අපරාධ පරික්ෂණ දෙපාර්තුමේන්තුවේ ආපු නිලධාරියා කදුලු පුරෝගෙන ඇස් දෙකේ මා ළඟට ඇවිත් කිව්වා මේකට සම්බන්ධ ප්‍රබල ව්‍යාපාරියෙක් එයාට ටෙලිෆෝන් කරළා කිව්වා තමුසෙට ලක්ෂ 800 දෙන්න හැදුවා තමුසේ බාර ගන්න බැහැ කිව්වා අපි නීතිපති දෙපාර්තුමේන්තුවට 260ක් දීලා වැඩේ කරගත්තා කියලා.”
ඇව්න්ට්ගාඩ් පාවෙන ආයුධ නැව සම්බන්ධව නීතිපති දෙපාර්තුමේන්තුවේ කටයුතු කළේ තමන් බව පවසන නීතිවේදී වසන්ත නවරත්න බණ්ඩාර, ගෝඨාභය රාජපක්ෂ ඇතුළු එම නඩුවේ අනෙකුත් සැකකරුවන් පස් දෙනා අත් අඩංගුවට ගන්නා ලෙස තමන් නිර්දේශ කළ බවද කියා සිටියේය.
තම නිර්දේශ පිළිබඳව අදහස් විමසීමට එවක නීතිපතිව සිටි යුවන්ජන් විජේතිලක කමිටුවක් පත් කළ බවත් ඔවුන්ද තම නිර්දේශ වලට එකඟත්වය පළ කල බව කොළඹ පැවති මාධ්‍ය හමුවක දී හිටපු සොලිසිටර් ජෙනරාල් වසන්ත නවරත්න බණ්ඩාර අනාවරණය කළේය.
තමාගේ නිර්දේශ සහිත වාර්තාව නීතිපතිවරයා වෙතට යොමු කිරිමෙන් පසුව එයට සිදුවුයේ කුමක්ද යන්න ගැන තමන්ද නොදන්නා බව ද ඔහු කියා සිටියේය.
විජේදාස කිව්වේ බොරුවක්
ගෝඨාභය රාජපක්ෂ අත් අඩංගුවට පත්විමට යාමේදී බේරා ගනු ලැබුවේ තමන් බවට විජයදාස රාජපක්ෂ මන්ත්‍රීවරයා කරන ලද ප්‍රකාශය අසත්‍යය්ක බව පවසන නීතිපති දෙපාර්තුමේන්තුවේ හිටපු සොලිසිටර් ජෙනරාල් වසන්ත නවරත්න බණ්ඩාර මන්ත්‍රීවරයා කියන ආකාරයට නීතිපති දෙපාර්තුමේන්තුවේ නිලධාරියෙකු යම් වැරද්දක් කර ඇත්නම් එවක අධිකරණ ඇමැතිවරයා ලෙස කිසිදු ක්‍රියා මාර්ගයක් නොගත්තේ ඇයි දැයි වැඩි දුරටත් ප්‍රශ්න කර සිටී.
ත්‍රස්තවාදය වැළැක්විමේ පනත යොදා ගනිමින් ගෝඨාභය රාජපක්ෂ අත්අඩංගුවට ගැනීමේ උත්සාහය තමන් විසින් වැළැක්වු බව ව්‍යවස්ථා විරෝධි ලෙස මහින්ද රාජපක්ෂ අගමැති ධුරයට පත් කිරිමට ගත් උත්සාහයට සහාය දීම නිසා එක්සත් ජාතික පක්ෂ සාමාජිකත්වය අහිමි වු විජේදාස රාජපක්ෂ මන්ත්‍රීවරයා පොහොට්ටු අපේක්ෂකයාට එක්වු බවට දැනුම් දීමට කැඳවු මාධ්‍ය හමුවක දී කියා සිටියේය.
ගෝඨාභය රාජපක්ෂ අත් අඩංගුවට ගැනීමට යාම පළිගැනීමක් ලෙස හැඳින්වු මන්ත්‍රීවරයා එය වැළැක්වීම සඳහා ජනපති අගමැති දෙපල සහාය දුන් බව ද සඳහන් කළේය.
Facebook Comments
