වාමවාදී දේශපාලන තුළ ස්වයං නීර්ණය පිළිගත්ත ද ශ්‍රී ලංකාවේ ජාතික ප්‍රශ්නයට ස්වයං නීර්ණය විසඳුමක් නොවන බව පෙරටුගාමී සාමාජවාදී පක්ෂයේ විශ්වාසය යැයි එම පක්ෂයේ සංවිධායක ලේකම්වරයා සදහන් කරයි.
සුලුතරය වීම හේතුවෙන් දෙමළ ජනයාට ජාතික පීඩනය මත දේශපාලන ගැටලු පවතින අතර ඒවාට විසඳුම් ලබා ගත හැක්කේ සියලු ජන කොටස් වල විශ්වාසය තහවුරු කර ප්‍රජාතන්ත්‍රවාදී ලෙස සමානාත්මතාව ඇති කිරීම මඟින් ජාතික ප්‍රශ්නය විසඳා බවයි කුමාර් ගුණරත්නම් පෙන්වා දෙන්නේ.
දෙමළ ජනයාගේ දේශපාලන අරගලය ඒ සඳහා බව පෙන්වා දෙන සංවිධායක ලේකම් වරයා ස්වයං නීර්ණ අයිතිය ජාතික ප්‍රශ්නයට විසඳුමක් නොවන බවට ප්‍රකාශ කර සිටියේ පසුගියදා පැවති දෙරණ රූපවාහිනි නාළිකාවේ වැඩසටහනකට එක් වෙමිනි.
රටේ පවතින ජාතිවාදී, ආගම්වාදී ප්‍රශ්න ඇතැම් පිරිස් තම ජාතිකත්වය මත ඇති වු ප්‍රශ්න ලෙස අර්ථ දැක්වුව ද එය එසේ නොව සෑම ජන කොටසක්ම ධනේෂ්වර දේශපාලන තුළ මුහුණ දෙනු ලබන්නේ එකම පීඩනයකට බවයි ඔහු එහිදී අවධාරණය කර සිටියේ.
දේශපාලනය වෙනුවටට විශ්වාසය
මහින්ද රාජපක්ෂ බලයට ගෙන ඒම සඳහා 2005 වසරේ ජවිපෙ තම සහය දැක්වු අතර දෙමළ ජනයාට එරෙහිව ගෙන ගිය යුද්ධයේදීද එකල ජවිපෙ සාමාජිකයන් වු කුමාර් ගුණරත්නම් ඇතුලු පෙරටුගාමීන්ද මහින්ද රජයේ කොටස්කරුවන් විය.
ස්වයං නීර්ණය හෝ ෆෙඩරල් විසඳුමකින් ජාතික ප්‍රශ්නයට දේශපාලන විසඳුමක් නොලැබෙන බව විශ්වාස කරන පෙරටුගාමීන් ජාතික ප්‍රශ්නය විසඳිමට අනෙකාගේ විශ්වාසය දිනා ධනපති පාලනය එරෙහිව සටන් කිරීම තුළීන් ජාතික ප්‍රශ්නය විසඳිය හැකි බවටයි විශ්වාසය පල කරන්නේ.
ජාතිවාදී චෝදනා
කුමාර් ගුණරත්නම් බන්ධනාගාර ගතව සිටි අවධියේදි ඔහුගේ බිරිඳ සිය ෆේස් බුක් පිටුවේ සටහනක් තබමින් ජවිපෙ සහ පෙරටුගාමීන් ජාතිවාදයට යට වු බවට බරපතල චෝදනාවක් එල්ල කර තිබුණි.
ජවිපෙ විසින් මහින්ද රාජපක්ෂ හා එක්ව විමුක්ති කොටි සංවිධානයට එරෙහිව ගෙන ගිය යුද්ධයට සහය පළ කල අතර එවකට ජවිපෙ තුළ බහුතර බලය හිමිවු තිබු තම සැමියා වන කුමාර් ඇතුළු පෙරටුගාමීන් දෙමළ ජනයාට එරෙහි යුද්ධයට සහය පළ කල බව ගුණරත්නම්ගේ බිරිඳ සිය සටහන මගින් හෙළි කළාය.
Facebook Comments
