යෝජිත නව ආණ්ඩුක්‍රම ව්‍යවස්ථාව සදහා ජනමත විචාරණයක් පැවැත්වීමට ආණ්ඩුව සූදානම් බව සභානායක අමාත්‍ය ලක‍ෂ්මන් කිරිඇල්ල ඊයේ (09) පාර්ලිමේන්තුවේදී කියා සිටියාය.
නව ආණ්ඩුක්‍රම ව්‍යවස්ථාවක් නිර්මාණය කිරීම රජයේ ස්ථාවරය බවත් ශ්‍රී ලංකා නිදහස් පක්ෂයේද සහය ඇතිව නව ව්‍යවස්ථාව සම්බන්ධයෙන් ජනමත විචාරණයකට යෑමට බලාපොරොත්තු වන බවයි සභානායකවරයා පෙන්වා දෙන්නේ.
ආණ්ඩුක්‍රම ව්‍යවස්ථාවක් සැකසීම සම්බන්ධයෙන් අවශ්‍ය සාකච්ඡා සිදුවුව ද මෙතෙක් නව ව්‍යවස්ථාවේ එකම වගන්තියක් හෝ සකස් කර නොමැති පවසන ඇමතිවරයා සියලු යෝජනා ඉදිරිපත් වු පසු එය පාර්ලිමේන්තුවට හා මහජනතාවට ලබා දෙන බවයි අමාත්‍ය ලක‍ෂ්මන් කිරිඇල්ල අවධාරණය කරන්නේ.
ජාතික ප්‍රශ්නය විසඳීම සඳහා දහතුන් වැනි ආණ්ඩුක්‍රම ව්‍යවස්ථාව ප්‍රමාණවත් නොවන බැවින් ඊට එහා ගිය (13+) විසඳුමක් ලබාදෙන බවට හිටපු ජනාධිපති මහින්ද රාජපක්ෂ ප්‍රකාශ කළ බවද අමාත්‍යවරයා මෙහිදී සිහිපත් කළේය.
අමාත්‍යවරයා පාර්ලිමේන්තුවේ දී මේ බව පැවසුවේ විදේශ ඇමතිවරයා විදේශ මාධ්‍යවේදීන් හමුවේ කර ඇති ප්‍රකාශයක් පිළිබඳව මන්ත්‍රී විමල් වීරවංශ මන්ත්‍රීවරයා පාර්ලිමේන්තුවේ දී සිදුකළ විමසිමකට පිළිතුරු දෙමිනි.
නව ආණ්ඩුක්‍රම ව්‍යවස්ථාවක් සැකසිම සම්බන්ධයෙන් විවිධ පක්ෂ තම මතය ඉදිරිපත් කර ඇතත් ඇතැම් පක්ෂ මේ සම්බන්ධයෙන් සිය යෝජනා භාරදීමට නියමිත බවත් සභානායකවරයා පැවසීය.
Facebook Comments
