ශ්‍රී ලංකා මහා බැංකු බැඳුම්කර වංචාව සම්බන්ධයෙන් පරීක්ෂණ පැවැත්වීමට සහ ඒ සම්බන්ධයෙන් ගතයුතු ක්‍රියාමාර්ග පිළිබඳව සොයා බැලීම සඳහා ජනාධිපති විශේෂ කොමිසමක් පත් කරන බව ජනාධිපති මෛත්‍රිපාල සිරිසේන පවසයි.
ජනාධිපතිවරයා සිය පෞද්ගලික ට්විටර් ගිණුමට පණිවුඩයක් එක්කරමින් මේ බව ප්‍රකාශ කර තිබේ.
මෙම සතිය තුළ දී එම විශේෂ ජනාධිපති කොමිසම පත් කරන බවයි ජනාධිපතිවරයා සිය ට්වීටර් ගිණුමේ තැබූ සටහනේ වැඩිදුරටත් සඳහන්ව ඇත්තේ.
මහ බැංකු බැඳුම්කර සිද්ධිය සම්බන්ධයෙන් සකස් කළ කෝ්ප් කමිටුවේ වාර්තා පිළිබඳ පාර්ලිමේන්තු විවාදය හෙට පැවැත්වඹීට නියමිතය.
මහා බැංකු බැඳුම්කර වංචාව සම්බන්ධයෙන් හිටපු මහා බැංකු අධිපති අර්ජුන මහේන්ද්‍රන් වෙත සහ ඔහුගේ බැනනුවන්ගේ තැරැවිකාර සමාගමට චෝදනා එල්ලවූ අතර ඒ පිළිබඳව විධිමත් පරික්ෂණයක් මෙතෙක් නොපැවැත්වීම සහ චුදිතයන් අත්අඩංගුවට නොගැනීම සම්බන්ධයෙන් රජයට දැඩි චෝදනා එල්ලවී තිබේ.
අදාල ගනුදෙනුව පිළිබඳව පරීක්ෂණ පැවැත්වීම සඳහා 2016 වසරේ මාර්තු මාසයේ දීද ජනධිපතිවරයා විසින් ත්‍රිපුද්ගල කමිටුවක් පත්කරනු ලැබීය.
එසේම මේ සිද්ධිය වෙනුවෙන් සකස් කරනු ලැබූ කෝප් කමිටු වාර්තාවද නීතිපති උපදෙස් සඳහා යොමු කර තිබේ.
Facebook Comments
