දොළොස් වසරකට වැඩි කාලයක් තිස්සේ බලහත්කාරයෙන් අතුරුදහන්කර සිටින අය වෙනුවෙන් යුක්තිය ඉටු කිරීම සදහා ගන්නා ක්‍රියාමාර්ගය සම්බන්ධයෙන් උතුරේදී මතු කරන ලද ප්‍රශ්න වලට පැහැදිලි පිළිතුරක් දීමට විපක්ෂ නායකයා අසමත්ව තිබේ.
මාධ්‍යවේදීන් සජිත් ප්‍රේමදාසගෙන් වන්නියේදී විමසා තිබුනේ යුද සමයේ බලහත්කාරයෙන් අතුරුදහන්කර සිටින සිය සමීපතමයන් වෙනුවෙන් යුක්තිය ඉටු කරගැනීම සදහා උතුරේ මව්වරුන් ගෙන යන අරගලය සම්බන්ධයෙන් විපක්ෂ නායකයා ලබා දෙන විසඳුම කුමක්ද යන්නයි.
යුද සමයේ සිදුවු සියළුම ක්‍රියාදාමයන් සඳහා ‘අවසානයක්’ තිබිය යුතු බව විපක්ෂ නායකගේ පිළිගැනීමයි. සජිත් ප්‍රේමදාස අවධාරණය කරන්නේ එම අවසානය නිර්මාණය කිරීම වෙනුවෙන් ‘ක්‍රමවේදයක්’ අවශ්‍ය බවයි.
“සංහිදියාව හරහා ජනතාව තුළ තිබෙන ඒ දුක, කදුල, වේදනාවට, ඒ කනගාටුවට විසදුම් සපයමින් විශේෂයෙන්ම ඒ පවුල් වල අහිමි වු අයට යම් වැඩ පිළිවෙලක් දියත් කරමින් නැවතත් වරක් සියළුම ජාතීන්, සියළුම ආගම්, අතර එකමුතුභාවය, සංහිදියාව, සහෝදරත්වය, වර්ධනය වෙන සමාජීය, දේශපාලනික, සංවර්ධන, සුබසාධන වැඩ සටහනක් අවශ්‍යයි.”
ළඟ එන ඡන්දයකදී දෙමළ ජනතාවගේ ඡන්ද දිනා ගැනීමේ වෑයමක් බවට දිස්වන සංචාරයක මේ දිනවල උතුරේ නිරතව සිටින මෛත්‍රී, රනිල් පාලනයේ නිවාස, ඉදිකිරීම් සහ සංස්කෘතික කටයුතු අමාත්‍යවරයා වු වත්මන් විපක්ෂ නායක සජිත් ප්‍රේමදාස ඒ බව සදහන් කළේ මුලතිව් මාධ්‍ය සමාජයේ දී පැවැත්වු මාධ්‍ය හමුවකදීය.
කෙසේ වෙතත්, තමන්ද බලවත් තනතුරු දැරූ ආණ්ඩුවක් විසින් ද විසඳා නැති ගැටලු වල අවසානයක් දැකීම වෙනුවෙන් දියත් කරන ක්‍රමවේදය කවරේදැයි විපක්ෂ නායකයා පැහැදිලි කළේ නැත.
පළාත්බද මාධ්‍යවේදීන් විසින් අනාවරණය කර ඇති පරිදි බලහත්කාරයෙන් අතුරුදහන් කර සිටින සිය සමීපතමයන් සොයා ගැනීම සදහා ජාත්‍යන්තර වශයෙන් යුක්තිය අපේක්ෂාවෙන් උතුරේ දියත් කර ඇති අඛණ්ඩ අරගලයට එක්ව සිටි දෙමාපියන් 108 දෙනකු සිය දරුවන්ට අත්වු ඉරණම නොදැනම මේ වන විට දිවි ගමන නිමා කර තිබේ.
දෙමළ මාධ්‍යවේදීන්ගේ පැනයට විපක්ෂ නායක සජිත් ප්‍රේමදාස ලබා දුන් පිළිතුර පහත වීඩියෝවෙන් නරඹන්න,
Facebook Comments
