ප්‍රවෘත්ති අධ්‍යක්ෂ එපා කී ආරක්ෂක ප්‍රධානී අත් අඩංගුවට ගැනීමට රහස් පොලිසියට ඕනෑ

0

අත්අඩංගුවට ගැනිමේ සුදානමක් හෝ අවශ්‍යතාවයක් නැතැයි රජයේ ප්‍රවෘත්ති අධ්‍යක්ෂකවරයා විසින් පවසන ලද ආරක්ෂක මාණ්ඩලික ප්‍රධානියා අත්අඩංගුවට ගන්නා බව අපරාධ පරීක්ෂණ දෙපාර්තුමේන්තුව අධිකරණයට දන්වා තිබේ.

රාජපක්ෂ පාලන සමයේ කොළඹ සහ ඒ අවටින් පැහැරගනු ලැබූ 11 දෙනකු නාවික හමුදා කඳවුරු වල රඳවා ගෙන වධහිංසා කොට අතුරුදහන් කිරීම සම්බන්ධයෙන් අවශ්‍යව සිටි ලුතිනන් කොමදෝරු චන්දන ප්‍රසාද් හෙට්ටිආරච්චිට අධිකරණයෙන් වසං වී සිටීමට ආරක්ෂක මාණ්ඩලික ප්‍රධානී අද්මිරාල් රවින්ද්‍ර විජේගුණරත්න අනුබල දුන් බවට රහස් පොලිසිය විසින් අධිකරණයට වාර්තා කරනු ලැබීය.

ආරක්ෂක මාණ්ඩලික ප්‍රධානි අත්අඩංගුවට ගැනීමට ප්‍රමාණවත් කරුණු ඇති බවත් ඔහුව ඉදිරි සතිය තුළදී අපරාධ පරීක්ෂණ දෙපාර්තමේන්තුවට කැඳවීමට අවශ්‍ය ලිපි සකස් කර ඇති බව 19 සිකුරාදා රහස් පොලිසිය විසින් කොළඹ කොටුව මහේස්ත්‍රාත් වෙත වාර්තා කරන ලදී.

දෑවුරුද්දකට වැඩි කාලයක් යුක්තිය මගහැර සිටි වරෙන්තුකරුවකු වන සැකකරු අගෝස්තු 14 දා කොළඹදී අත් අඩංගුවට ගැනීමට පෙර රහසිගතව විදේශගත කිරීම සඳහාද හිටපු නාවික හමුදාපති වශයෙන් සිටි අද්මිරාල් වරයා ආධාර කළ බව රහස් පොලිසිය විසින් දැනුම් දී තිබුනි.

එම කරුණු විමසා බැලීමෙන් අනතුරුව ආරක්ෂක මාණ්ඩලික ප්‍රධානි අද්මිරාල් රවි විජේගුණරත්න අත්අඩංගුවට ගෙන අධිකරණය හමුවට පැමිණ වීමට කොළඹ කොටුව මහේස්ත්‍රාත් ලංකා ජයරත්න රහස් පොලිසියට අවසර දුන්නේය.

කෙසේ වෙතත් ආරක්ෂක මණ්ඩලික ප්‍රධානී රහස් පොලිසියට ප්‍රකාශයක් ලබා නොදී රටින් පිටවු අතර එ් අතරතුර ජනපති හදිස්සියේ කැඳවු කැබිනට් හමුවේදී ද මේ පිළිබඳව සාකච්ඡා වු බවට මාධ්‍ය වාර්තා කර තිබුණි.

ආරක්ෂක මාණ්ඩලික ප්‍රධානියා මුල් වරට සැප්තැම්බර් මාසයේ රහස් පොලිසියට කැඳවු අවස්ථාවේදී ඔහුව අත්අඩංගුවට ගැනිමේ සුදානමක් හෝ අවශ්‍යතාවයක් රහස් පොලිසියට නැතැයි රජය ප්‍රකාශ කළේය.

“ආරක්ෂක අංශයේ ඉහළ නිලධාරයකු අත්අඩංගුවට ගැනීමේ සුදානමක් පිළිබඳ දැඩි ප්‍රචාරයක් ලබාදෙමින් වත්මන් රජය රණවිරුන් දඩයම් කරන බවට” මතයක් නිර්මාණය කරමින් සිටින බවට රජයේ ප්‍රවෘත්ති අධ්‍යක්ෂක නීතිඥ සුදර්ශන ගුණවර්ධනගේ අත්සනින් යුතුව නිකුත් කළ එම නිවේදනයේ සඳහන්ව තිබුණි.

ආරක්ෂ මාණ්ඩලික ප්‍රධානී අද්මිරාල් රවින්ද්‍ර විජේගුණරත්න හට එල්ල වී ඇති චෝදනා වලින් ඔහුව ආරක්ෂ කරමින් සිටිනුයේ ජනාධිපති මෛත්‍රීපාල සිරිසේන බවට යහපාලන රජය බිහි කිරිමට උර දුන් සිවිල් සංවිධාන කිහිපයක්ම චෝදනා කරයි.

Facebook Comments