අත්අඩංගුවට ගෙන අධිකරණයට ඉදිරිපත් කරන ලෙස නියෝග කර ඇති ආරක්ෂක මාණ්ඩලික ප්‍රධානි අද්මිරාල් රවි විජේගුණරත්න අත්අඩංගුවට ගැනිමේ සුදානමක් හෝ අවශ්‍යතාවයක් රහස් පොලිසියට නැතැයි රජයේ ප්‍රවෘත්ති දෙපාර්තමේන්තුව පවසයි.
ඒ සම්බන්ධයෙන් “කරුණු පැහැදිලි කිරීමක් කළයුතුව ඇතැ,” යි නිවේදනයක් නිකුත් කරන රජයේ ප්‍රවෘත්ති අධ්‍යක්ෂ ජනරාල්වරයා පවසන්නේ අපරාධ පරීක්ෂණ දෙපාර්තුමේන්තුවට අද්මිරාල් විජේගුණරත්න අවශ්‍ය වී ඇත්තේ ප්‍රකාශයක් ගැනීම සඳහා පමණක් බවටයි.
ප්‍රකාශයක් ලබාදෙන ලෙස ඉල්ලා අපරාධ පරීක්ෂණ දෙපාර්තමේන්තුව විසින් 2018.09.02 දාතම ලිපියක් මගින් දැනුම් දී ඇතැයිද අධ්‍යක්ෂ ජනරාල් අධ්‍යක්ෂ නීතිඥ සුදර්ශන ගුණවර්ධන නිකුත් කළ විශේෂ නිවේදනයක දැක්වේ.
රාජපක්ෂ පාලන සමයේ කොළඹ සහ ඒ අවටින් පැහැරගනු ලැබූ 11 දෙනකු නාවික හමුදා කඳවුරු වල රඳවා ගෙන වධහිංසා කොට අතුරුදහන් කිරීම සම්බන්ධයෙන් අවශ්‍යව සිටි ලුතිනන් කොමදෝරු චන්දන ප්‍රසාද් හෙට්ටිආරච්චිට අධිකරණයෙන් වසං වී සිටීමට ආරක්ෂක මාණ්ඩලික ප්‍රධානී අද්මිරාල් රවින්ද්‍ර විජේගුණරත්න අනුබල දුන් බවට රහස් පොලිසිය විසින් අධිකරණයට වාර්තා කරනු ලැබීය.
දෑවුරුද්දකට වැඩි කාලයක් යුක්තිය මගහැර සිටි වරෙන්තුකරුවකු වන සැකකරු අගෝස්තු 14 දා කොළඹදී අත් අඩංගුවට ගැනීමට පෙර රහසිගතව විදේශගත කිරීම සඳහාද හිටපු නාවික හමුදාපති වශයෙන් සිටි අද්මිරාල් වරයා ආධාර කළ බව රහස් පොලිසිය විසින් දැනුම් දී තිබුනි.
එම කරුණු විමසා බැලීමෙන් අනතුරුව ආරක්ෂක මාණ්ඩලික ප්‍රධානි අද්මිරාල් රවි විජේගුණරත්න අත්අඩංගුවට ගෙන අධිකරණය හමුවට පැමිණවීමට කොළඹ කොටුව මහේස්ත්‍රාත් ලංකා ජයරත්න රහස් පොලිසියට අවසර ලබා දෙන ලදී.
කෙසේ වෙතත් ආරක්ෂක මණ්ඩලික ප්‍රධානී රහස් පොලිසියට ප්‍රකාශයක් ලබා නොදී රටින් පිටවු අතර පසුගිය සතියේ ජනපති හදිස්සියේ කැඳවු කැබිනට් හමුවේදී ද මේ පිළිබඳව සාකච්ඡා වු බවට මාධ්‍ය වාර්තා කර තිබුණි.
පසුගිය දිනවල විපක්ෂය සහ ඔවුන්ගේ මතය සමාජගත කිරීමේ කාර්ය ඉටුකරමින් සිටින විවිධ පුවත්පත් මෙන්ම විද්‍යුත් මාධ්‍ය හරහා ”ආරක්ෂක අංශයේ ඉහළ නිලධාරයකු අත්අඩංගුවට ගැනීමේ සුදානමක්” පිළිබඳ දැඩි ප්‍රචාරයක් ලබාදෙමින් වත්මන් රජය රණවිරුන් දඩයම් කරන බවට මතයක් නිර්මාණය කරමින් සිටින බවටයි රජය චෝදනා කරන්නේ.
පුද්ගලයන් 11 දෙනා පැහැරගැනීමේ විමර්ශනය වත්මන් ආණ්ඩුව විසින් ආරම්භ කළ පරීක්ෂණයක් නොවන බව පවසන රජයේ ප්‍රවෘත්ති දෙපාර්තුමේන්තුවේ අධ්‍යක්ෂ නීතිඥ සුදර්ශන ගුණවර්ධන පරීක්ෂන කටයුතු සඳහා ආරක්ෂක මාණ්ඩලික ප්‍රධානී අද්මිරාල් රවි විජේගුණරත්නගෙන් කරුණු විමසීම රණවිරු දඩයමක් වන්නේ කෙසේ දැයි ප්‍රශ්න කර සිටි.
නීතිඥ ගුණවර්ධන ආණ්ඩුව බලයට පත්වීමට පෙර පුද්ගලයන් අතුරුදහන් කිරීම ඇතුළු මානව හිමිකම් උල්ලංඝන සම්බන්ධයෙන් යුක්තිය ඉටු කිරීම වෙනුවෙන් ජාත්‍යන්තර වශයෙන් ද උද්ඝෝෂණය කළ අයෙකි.
එවැනි අපරාධයක් සඳහා අවශ්‍ය වී සිටින රටේ ඉහලම හමුදා නිලධාරියා රහස් පොලිසිය මගහැර විදේශ ගත වූයේ කෙසේදැයි ඔහුගේ නිවේදනයේ පැහැදිලි කර නැත.
Facebook Comments
