උතුරු නැගෙනහිර පුද්ගලික ඉඩම් මේ වසර අවසානය වීමට පෙර මුල් අයිතිකරුවන්ට බාර දෙන ලෙස ජනාධිපතිවරයා දී ඇති නිර්දේශය ක්‍රියාත්මක කිරීමට රජයේ ආරක්ෂක අංශ මුදල් ඉල්ලීම බාධාවක් වී තිබේ.
වසර ගණනාවක් තිස්සේ යුද, නාවික හමුදා සහ පොලිසිය විසින් අත්පත් කරගෙන සිටින අන්සතු භූමියෙන් ඉවත් වීමට මුදල් ඉල්ලා සිටින බව හෙළිවූයේ ඔක්තෝබර් 16 අඟහරුවාදා යාපනය දිස්ත්‍රික් ලේකම් කාර්යාලයේ දිස්ත්‍රික් ලේකම් නාගලිංගම් වේදනායගම්ගේ මෙහෙයැවීමෙන් පැවති සාකච්ඡාවකදීය.
උතුරු නැගෙනහිර ජනතාවට නීත්‍යානුකූලව හිමි ඉඩම් දෙසැම්බර් 31 දාට මත්තෙන් “සියලු ගැටලු නිරාකරණය කර ගනිමින්” නිදහස් කිරීමට පියවර ගන්නා ලෙස ජනාධිපති මෛත්‍රිපාල සිරිසේන මේ මස 3දා පැවති උතුරු හා නැගෙනහිර පළාත් සංවර්ධනය පිළිබඳ පත්කළ ජනාධිපති කාර්ය සාධන බලකා රැස්වීමේදී උපදෙස් දී තිබුනි.
ජනාධිපති උපදේශය ක්‍රියාත්මක කිරීම සඳහා ඉඩම් මිලට ගැනීමටත්, අලුත් ඉදිකිරීම් සඳහාත් ප්‍රතිපාදන නොමැති බව යාපනය දිසා ලේකම් කාර්යාලයේ පැවති සාකච්ඡාවේදී හමුදා සහ පොලිස් බලධාරීන් විසින් දැනුම් දෙන ලදැයි දෙමළ ජාතික සන්ධානය පවසයි.
“වෙනත් ස්ථාන වලට යන්න සහ අලුතින් ගොඩනැගිලි හදන්න ආණ්ඩුව සල්ලි දුන්නොත් යන්න පුළුවන් කියලා ඔවුන් පවසනවා.” යි සාකච්ඡාවෙන් අනතුරුව මාධ්‍යවේදීන් හමුවූ එම් ඒ සුමන්දිරන් මන්ත්‍රීවරයා කියා සිටියේය.
යුද්ධයෙන් උන්හිටි තැන් අහිමි කරන ලද උතුරු නැගෙනහිර ජනතාවගේ නැවත පදිංචිය හා ගොඩනැගිලි ප්‍රතිසංස්කරණ කටයුතු සඳහා යෙදවිය යුතු මුදල් රජයේ ආරක්ෂක අංශ වල අවශ්‍යතා සඳහා යොදාගැනීම ගැන දෙමළ ජාතික සන්ධානය යාපනයේ පැවති ඉඩම් සාකච්ඡාවේ දී විරෝධය පළකර තිබේ.
වාඩිලාගෙන සිටින භූමියේ පවත්වාගෙන යන ව්‍යාපාර වලින් උපයන ලාභය අලුත් ස්ථානයකට යාම සඳහා යොදාගත නොහැකිදැයි උතුරේ මාධ්‍යවේදියකු කළ විමසීමකට පිළිතුරු දෙමින් සුමන්තිරන් මන්ත්‍රීවරයා ප්‍රකාශ කළේ, ආරක්ෂක අමාත්‍යාංශයට ලැබෙන එම මුදල් ඉල්ලා ගැනීම හමුදාවේ වගකීමක් බවයි.
Facebook Comments
