සාස්තරයි සූත්තරයයි දෙකම දන්න එක්කෙනා ‘Irrfan Khan’

භරත මුණිගෙ ‘නාට්‍ය ශාස්ත්‍ර ඇස්’ , ඇරිස්ටෝටල්ගෙ ‘කාව්‍ය ශාස්ත්‍ර අත්’ දෙකම එකට කෙනෙක්ට පිහිටන්නෙ මාර කලාතුරකින්. ඉන්දියාවෙ මෙන්න මේ සාස්තර දෙකම එකට ගළපන ‘සූත්තර නළුවෙක්’ ඉන්නව. ඒ ‘Irrfan Khan’

මං ආසම මිනිහ බලන බැලිල්ලට – හැරෙන හැරිල්ලට – රවන රැවිල්ලට – ප්‍රේක්ෂක හිත් කරකවන කැරකැවිල්ලට !

‘Irrfan’ කියන්නෙ සඳුන් මිටක් අතින් අරං ආව බටිල්ලෙක් නෙමෙයි. මනුස්සය අදටත් මහ පොළොවෙ ඇවිදිනව; එළි පහළියෙ මිනිස් හුස්ම විඳිනව ; පරිසරය එක්ක සැරිසරනව ; අහස දිහා බලාගෙන ආදරෙන් හිනාවෙනව ; ගැඹුරු චරිත හරි ලස්සනට තුනී කරල – ජීවිතේ පොඩි වෙච්ච තැන් පිරිමදිනව. අපි එතකොට හුස්ම ගන්නව කියල දැනෙනව !

පොඩි කාලෙ Irrfanගෙ අරමුණ වෙලා තියෙන්නෙ ‘ක්‍රිකටර්’ කෙනෙක් වෙන එක. ඒත් ඒකට ගෙදරින් බර බරේ වැටෙනව. පස්සෙ කාලෙක නිරායාසයෙන් Irrfanගෙ මුළු ලෝකෙම වෙන්නෙ ‘නාට්‍ය කලාව.’ නාට්‍ය කලා පාසලට ඇතුළත් වෙලා නාට්‍ය හදාරන්න වරම් ලබන මේ කොල්ලා ඒ වෙනකොටත් ‘ප්‍රායෝගික සිනමා වින්දනය’ අත්විඳල අවසානයි. ඒ ගෙදට්ට හොරෙන් සිනමා ශාලාවන් ගානෙ පිස්සු වැටිල දුවපු කාලෙන් !

ඔන්න ඔහොම නාට්‍ය කලාව හදාරනකොට කලා පාසලේ අවසන් වසරෙදි Irrfanට හැකිවෙනව ‘Mira Nair’ කියන මානවවාදී සිනමාකාරියගෙ ‘Salaam Bombay’ සිනමාපටයෙ ඉතාම සුළු චරිතෙකට පණ පොවන්න. මේ මෑතකත් මං ඒක බැලුව. අද මේ වගේ තැනක ඉන්නෙ එදා ඒ වගේ තැනකින් ආව ‘ඇත්ත නළුවෙක්.’

Irrfanගෙ සැබෑ නම ‘Sahabzade Irfan Ali Khan.’ඒත් මනුස්සයා භාවිතා කරන නම ‘Irrfan Khan’. අපිට පේනව උපන් නමේ තියෙන්නෙ එක R අකුරයි. ඒත් ඉර්ෆාන් ‘R’ සවුන්ඩ් එකට ආසම හින්ද ‘Irrfan’ වුණාලු. එතකොට නම ප්‍රනවුන්ස් වෙන විදිය අමුතුයි ! මෙයා මේ වගේ හරි සියුම් තැන් පවා සීරියස්ලි හිතන හාදයෙක්.

බොලිවුඩයෙ ඉන්න ‘උසම නළුවන්’ කිහිපදෙනා අතරෙ ‘උසම නළුවෙක්’ තමයි Irrfan . බුවා ‘The Lunchbox’ සිනමාපටය පුරා දියත් කරන ගැඹුරු රංගනය මාව තාම කළඹනව. ‘Slumdog Millionaire – D Day – Qissa – Paan Singh Tomar – Jazbaa – Piku’ සිනමාපට වල ඔහුගෙ ‘අයිකන් මුහුණ’ ඔබට තවම හොඳට මතක ඇති ! ළඟ ළඟම ආවා ලොක්කගෙ ‘Madaari.’ ඒකත් බලමු !

මේ වෙනකොට බොලිවුඩයේ විතරක් නෙමෙයි හොලිවුඩය පුරාවටත් කතාබහට ලක්වෙලා ඉන්න ආසියාතික නළු ‘Irrfan’ ඉන්දීය – විදේශීය සම්මාන ගණනාවක්ම ලබාගෙන තියෙනව. ඉහළම රාජ්‍ය ගෞරව සම්මානය වන ‘පද්ම ශ්‍රී සම්මානයත්’ ඔහු සතුයි.

රාජ්‍ය සම්මාන – ජනතා සම්මාන – ‘මේ අපේ ආදර සම්මාන’ ඔක්කොම තුරුල් කරන් ‘Irrfan’මෙහෙම කියනව.

‘ජුරාසික් පාක්’ මුල්ම සිනමාපටය ප්‍රදර්ශනය වෙනකොට මං කොලුගැටයෙක්. එතකොට ඒක බලන්න මාර උණකින් – පිස්සුවකින් මං හිටියෙ. ඒත් සිනමා ශාලාවට ඇතුල් වෙන්න ටිකට් ඕනිනෙ. ඒ ටිකට් එක ගන්න මට සල්ලි තිබුණෙ නැහැ. ඒ එදා. දැන් මං මෑත කාලීන ‘Jurassic World’ සිනමාපටයෙ චරිතයක් කරනව.

ජීවිතේ වෙන්න බැරි දෙයක් නැහැ ! අපිට Irrfan ආදරෙන් මතක් කරල දෙන්නෙ ඒක.

අපි හැමෝටම වීරයෙක් ඉන්නව වගේ අපි හැමෝගෙම ලෝකෙ හැමදාම මතක් වෙන ‘Irrfan Khan’ කරපු චරිතයක් ඇති. මං ආසයි ඔබ මේක කියවල ‘ඔබ ආසම චරිතෙ’ ගැන මෙතැන ලියනවනං. මං මුලින් කියන්නං මං ආසම එක. මෙන්න මේක !

මං අදටත් පෞද්ගලිකව මානව වේදනාවෙන් පෙළෙන ‘නඩු’ කිහිපයක් තියෙනව. ඒ අතරෙ ප්‍රධානයි ඉන්දියාවෙ ‘ආරුෂි තල්වාර්’ දැරියගෙ මරණය හා නඩුව. මේ ඇත්ත සිද්ධියෙදි ඒක යුක්තිගරුකව විසඳන්න මාර ගේමක් දෙන්නෙ ‘අරුන් කුමාර්’ කියන CDI නිලධාරියා. අන්න ඒ තියුණු චරිතය – සිද්ධිය පාදක කරගෙන හැදුව ‘Talvar’ සිනමාපටයෙ ඒ නිලධාරියා ‘Irrfan.’ මට අනුව මේ මුළු සිනමාපටයම කියන්නෙ ‘Irrfan’ගෙ චරිතය. ඒක ඒ තරං ප්‍රබලයි.

මට ඒක මතක් කරගෙන නිදහස් කල්පනාවකට වැටෙන්න පුළුවන් ! මේ දක්ෂකම ගැන හිතල මාර හුස්මක් ගන්න පුළුවන් ! ඒ චරිතෙ ඇතුළට ගිහින් අඬන්න පුළුවන් ! ‘අපරාධයක සම්පාදක ධාතු’ හොයාගෙන යන්න පුළුවන් ! වැදගත්ම දේ අනාගතේ බිහිවෙන ඕනිම නළු බට්ටෙකුට ‘Irrfan’ වගේ ලොක්කෙක් වෙන්න’ කියන්න පුළුවන් !

කසුන් මහේන්ද්‍ර හීනටිගල