උතුරේ යුද්ධයෙන් පීඩාවට පත් මුලතිව් දිස්ත්‍රික්කයේ දෙමළ මාධ්‍යවේදීන් තවමත් බලධාරීන්ගේ විවිධාකාර හිරිහැරයන්ට ලක්ව සිටියදී, පොලිසිය අබිබවා යුද්ධ හමුදාවත් ඔවුන්ගේ රාජකාරි ගමන් බිමන් වලට සීමා පමුණුවා තිබේ.
රටේ සංචරණ සීමා පනවා ඇති කාලසීමාව තුලදී ජනමාධ්‍ය රාජකාරි කටයුතු වෙනුවෙන් ගමන් කිරීමට පොලිසිය අවසර ලබා දී තිබුනද, පසුගිය සති අන්තයේදී ප්‍රවෘත්ති රැස් කිරීම සඳහා මුලතිව් නගරයට යමින් සිටි, යාබද ප්‍රදේශ වල පදිංචි මාධ්‍යවේදීන්, ව්ට්රාපලෙයි තුන්වැනි සැතපුම් කණුව අසල මුරපොලේ දී නවතා තිබේ.
යුද්ධයෙන් වැඩිපුරම පීඩාවට පත් මුලතිව් දිස්ත්‍රික්කය පුරා, කොළඹ නගරය ඇතුලු දිවයිනේ වෙනත් කිසිඳු ප්‍රදේශයකටත් වඩා අතිමහත් යුද හමුදා භටයන් පිරිසක් සේවයේ යොදවා තිබේ.
දෙමළ මාධ්‍යවේදීන්ට තම රාජකාරි සඳහා ගමන් කිරීමට අවසර දීම ප්‍රතික්ෂේප කර තිබෙන්නේ එම හමුදා විසිනි.
කොරෝනා වසංගත තත්වය යටතේ, සංචරණය පාලනය කිරීම සඳහා යොදා ඇති බව පෙනෙන මෙම මුර කපොල්ල හරහා යාමට, අත්‍යවශ්‍ය සේවා යටතේ පැමිණෙන පුද්ගලයන්ට ඉඩ ලබා දී තිබේ.
නමුත් දෙමළ මාධ්‍යවේදීන්ට පමණක් ප්‍රවෘත්ති රැස් කිරීමේ සිය රාජකාරිය ඉටු කිරීම සඳහා ඉන් ඉදිරියට යාමට ඉඩ ලබා දී නොමැත.
රාජකාරි සදහා ගමන් කිරිමට පොලිසිය තමන්ට අවසර දී ඇති බව දිවයිනේ ජනප්‍රිය රූපවාහිනී නාලිකාවක් වන හිරු නාලිකාවේ මාධ්‍යවේදී, ෂන්මුගම් තවසීලන් විසින් හමුදා භටයන්ට දැනුම් දුන් විට ඔවුන් පවසා ඇත්තේ, එසේ ගමන් කිරීමට ඔහුට හමුදා අවසරය නොමැති බවයි.
පසුව මාධ්‍යවේදියා මුල්ලියාවලෙයි පොලිස් ස්ථානයේ ස්ථානාධිපති අමතා, තමන් මෙසේ හමුදාව විසින් නවතා ඇති බව දන්වා තිබේ.
ඒ අනුව මුරපොල භාර හමුදා නිලධාරීන් ඇමතූ පොලිස් ස්ථානාධිපති, මාධ්‍යවේදීන්ට ගමන් කිරීමට ඉඩ සලසා දෙන ලෙස ඔවුන්ගෙන් ඉල්ලා ඇත.
එවිට ස්ථානාධිපතිවරයා වෙත හමුදා නිලධාරීන් විසින් දැනුම් දී ඇත්තේ, “මොවුන්ට යන්න ඉඩ දෙන්න එපා කියලා ඉහල මූලස්ථානයෙන් නියෝග ලැබී තිබෙනවා,” යනුවෙනි.
“පොලිසියෙන් කිව්වත් යන්න දෙන්න බැරිදැ,” යි විමසු මාධ්‍යවේදියාට මුර කපොල්ලේ සොල්දාදුවා “දෙන්නේ නෑ’” යි පවසනු වීඩියෝ ගතවී තිබේ.
මාධ්‍යවේදීන්ට අවසර නොදුන් යුද හමුදාව වෙනත් වාහනවල ගමනාගමනයට කිසිදු බාධාවක් නොකර සිටින ආකාරය වීඩියෝ දර්ශනවල දැකගත හැකිය.
සැලකිය යුතු ප්‍රමාදයකින් පසුව ජ්‍යෙෂ්ඨ නිලධාරීන් විසින්, මෙම මාධ්‍යවේදීන්ගේ සියලු විස්තර සටහන් කරගැනීමෙන් පසුව ගමන් කිරීමට අවසර ලබා දී ඇත.
එම කල් ගතවීම නිසා ඔවුන්ට ප්‍රවෘත්ති එකතු කර ගැනීමට තිබූ කාලය බොහෝ දුරට අවම වී ඇති අතර, මේ ප්‍රමාදයේ බලපෑම නිසා අදාල ප්‍රවෘත්ති රූගත කරගැනීමේ අවස්ථාව අහිමි වී තිබේ.
මාධ්‍ය ක්‍රියාකාරීන් පෙන්වා දෙන්නේ, සංචරණ සීමා පැනවූ අවස්ථා වලදී පවා, ප්‍රවෘත්ති වාර්තාකරණය කිරීමේදී බහුතර සිංහල මාධ්‍යවේදීන්ට එවැනි හිරිහැරවලට මුහුණ පාන්නට සිදු නොවන බවයි.
ප්‍රදේශවාසීන්, මාධ්‍යවේදීන් සහ දේශපාලන නායකයන් පෙන්වා දෙන්නේ, මුලතිව් හි සම්පූර්ණ පාලනය හමුදාව යටතේ පවතින අතර, පොලීසියට ඇත්තේ එයට යටත් භූමිකාවක් පමණක් බවයි.
මුලතිව් හි මාධ්‍යවේදීන්ට පනවා ඇති සීමා දිගින් දිගටම ඉහල යමින් පවතින අතර, නිරන්තරයෙන් බාධා කිරීම් සහ කිසිදු හේතුවක් නොමැතිව ආපසු හරවා යැවීම් වලට මුහුණ දීමට සිදුව තිබේ.
ප්‍රදේශවාසීන් චෝදනා කරන්නේ , පුරාවිද්‍යා ගවේෂණ මුවාවෙන් සිදු කරන ඉඩම් කොල්ලය, මුලතිව් වනාන්තර වල නීතිවිරෝධී ලෙස ගස් කැපීම ආදිය සම්බන්ධයෙන් මෙන්ම ආණ්ඩුවට එරෙහිව සිදුවන තවත් විවිධ විරෝධතා මාධ්‍ය හරහා වාර්තා වීම වැළැක්වීම සඳහා, මෙම බාධා කිරීම් හිතාමතාම සිදුකරන බවයි.
Facebook Comments
