ජාති ආගම් වශයෙන් නම් කොට ඇති පාසල් වෙනුවට මිශ්‍ර පාසල් ක්‍රමයක් රට තුළ ගොඩනැගිය යුතු අතර ඒ තුළින් බෙදී වෙන්වීමේ සංස්කෘතිය ඉවත් වී එක රටක් තුල එකම ජාතියක් ලෙස ක්‍රියාත්මක වීමට දැයේ දූ දරුවන්ට අවස්ථාව හිමිවෙන බව තැපැල් , තැපැල් සේවා සහ මුස්ලිම් ආගමික කටයුතු අමාත්‍ය එම්. එච්. අබ්දුල් හලීම් කියා සිටී.
“සිංහල, දමිල, මුස්ලිම් වශයෙන් පාසල් වර්ග කිරීමෙන් ඔවුනොවුන්ගේ අදහස් ,හැඟීම් සිසු දරුවන්ට හඳුනා ගැනීමට ඇති අවස්ථාව මගහැරී යනවා. එයින් ආගම්, ජාති හා භාෂා වශයෙන් ප්‍රශ්න රැසක් නිර්මාණය විය හැකියි. මේ අපි හැමෝගේම මව්බිමයි. ඒ නිසා අනාගතයේ වර්ගවාදී අරගලවලට තවදුරටත් ඉඩ ලබා දෙන්න අප ලැහැස්ති නැහැ”. අමාත්‍යවරයා සදහන් කරයි.
අමාත්‍යවරයා මෙසේ අදහස් දැක්වුයේ අංකුඹුර පරාක්‍රම ජාතික පාසලේ සහ උඩගම දේවානන්දම් විද්‍යාලයේ පැවැති 2017 පාසල් නිවාසාන්තර ක්‍රීඩා උත්සවයන්ට 06 සදුදා දිනයේ සහභාගී වෙමිනි.
තවදුරටත් එහිදී අදහස් දක්වමින් අමාත්‍යවරයා කියා සිටියේ ඉතා දුෂ්කර ප්‍රදේශයක පිහිටා ඇති මෙම පාසල් මගින් මේ වන විටත් උගතුන් බුද්ධිමතුන් හා ක්‍රීඩකයන් රැසක් ජාතියට දායාද කොට ඇති බවයි.
“නගරයේ පාසල්වලට පමණක් සීමා වී පැවැති සුමෝ,මල්ලව පොර හා ජුඩෝ වැනි ක්‍රීඩාවලින් පළාත් , ජාතික හා ජාත්‍යන්තර වශයෙන් ජයග්‍රහණ අත්කර ගැනීම පාසලට කීර්තියක් වගේම රටට විශාල ගෞරයක්. ඒවගේම 2017 වසරේ ජාතික සුමෝ ශූරතාවලියේ දක්ෂතම ක්‍රීඩකයා හා ක්‍රීඩිකාව මේ පරාක්‍රම ජාතික පාසලෙන් බිහිවුණා . එය අප සැමට ආඩම්බරයක්”. ඔහු වැඩි දුරටත් සදහන් කළේය.
Facebook Comments
