මිග් යානා ගණුදෙනුව සම්බන්ධ නඩුවේ පලමු සැකකරු වන රුසියාවේ හිටපු ශ්‍රී ලංකා තානාපති උදයංග වීරතුංග මෙරටට පැමිණ නඩුවට පෙනී සිටීමට අපේක්ෂා කරන බව ඔහුගේ නීතීඥයින් අධිකරණයට දන්වා තිබේ.
කෙසේ වෙතත් හිටපු තානාපතිවරයා එක්සත් අරාබී එමීර් රාජ්‍යයේ අජ්මාන් බන්ධනාගාරයේ රඳවා සිටින බව අධිකරණයට දන්වා ඇති නීතිපති දෙපාර්තුමේන්තුව මෙරටට පැමිණීමට කැමැත්තක් ඇත්නම් ඒ බව එක්සත් අරාබි එමීර් රාජ්‍යයේ ෆෙඩරල් අධිකරණයට සඳහන් කර අවසර ලබා ගන්නා බවට රජයේ නීතිඥ උදාර කරුණාතිලක පවසා ඇත.
උදයංග වීරතුංග පනවා ඇති විදෙස් ගමන් තහනම ඉවත් කළ නොහැකි බව දන්වා ඇති රජයේ නිතීඥවරයා ඔහු සිරකරුවෙකු බැවින් ශ්‍රී ලංකාවේ ආරක්ෂක අංශ එක්සත් අරාබි එමීර් රාජ්‍යයට ගොස් එහි ආරක්ෂක අංශ සමග එක්ව උදයංග වීරතුංග මෙරටට ගෙන ඒම ක්‍රමවේදය බවයි අධිකරණයට දන්වා ඇත්තේ.
බැංකු 7ක ගිණුම් 40ක්
එම අයථා ගණුදෙනුවට සැකකටයුතු ආකාරයෙන් මැදිහත් වූ බව කියන ගුවන් හමුදා කමාන්ඩර්වරයෙකු ඇතුලු ඉහල නිලධාරීන් සිව් දෙනෙකුගේ බැංකු ගිණුම් 40 ක් සම්බන්ධයෙන් විස්තර පොලිස් මූල්‍ය අපරාධ කොට්ඨාශය හමුවට ලබාදෙන ලෙස කොටුව මහේස්ත්‍රාත් ලංකා ජයරත්න 29 සිකුරාදා බැංකු 07 කට නියෝග කළේය.
උදයංග වීරතුංග අයත් බව පැවසෙන බැංකු ගිණුම් කිහිපයක ගණුදෙනු අක්‍රීය කිරීමට ශ්‍රී ලංකා මහ බැංකුව කටයුතු කල අතර ඉන් දින 7 කට පසු එක්තරා රාජ්‍ය බැංකුවක තිබූ උදයංග වීරතුංගගේ බැංකු ගිණුමකින් රුපියල් තුන් කෝටි හැට හත් ලක්ෂයකට ආසන්න මුදලක් එක්සත් අරාබි එමීර් රාජ්‍යයේ බැංකු ගිණුමක් වෙත හුවමාරු වී ඇතැයිද අධිකරණය හමුවේ අනාවරණ වී තිබේ.
නඩුව යලි ලබන අගෝස්තු 28 වනදා කැදවීමට කොටුව මහේස්ත්‍රාත් ලංකා ජයරත්න නියෝග කළේය.
Facebook Comments
