ජනාධිපතිවරයා ප්‍රමුඛ වන්මන් යහපාලන රජය සංහිදියාව ගොඩනැගීම සඳහා සීමාව ඉක්මවා ගිය දැඩි කැපකිරීමක් සිදුකරමින් සිටින බව කැළණිය රජමහා විහාරාධිපති හිමියන් ප්‍රකාශ කර තිබේ.
විරුද්ධ මත සහ විරුද්ධ ක්‍රියාකාරකම් ඉවසමින් දැඩි සංයමයකින් යුතුව සංහිඳියාවේ නාමයෙන් සිදුකරන එම කැපකිරීමට සමාජයෙන් වටිනාකමක් හිමිවුවාද යන්න සියලූදෙනා හෘද සාක්ෂියෙන් විමසිය යුතුව ඇති බවයි විහාරාධිපති කොල්ලූපිටියේ මහින්ද සංඝරක්ඛිත හිමි පවසන්නේ.
“සංහිඳියාව ඇති කිරීම සඳහා පුදුම විදියෙ කැප කිරීමක් කලා. සීමාවන් ඉක්මවා දැඩි ඉවසීමෙන් යුක්තව පර මත ඉවසමින්, ඒවගේම පර ක්‍රියාකාරකම් ඉවසමින් යමි කිසි මෙහෙවරක් සංහිඳියවේ නාමය වෙනුවෙන් සිද්ධ කරපු බව අපි සඳහන් කරන්න අවශ්‍ය වෙනවා.” යි උන්වහන්සේ පැවසුහ.
දකුණේ ඡන්ද පදනම ද පටුකොට ගනිමින්, ජනපති විසින් ඉටුකරන්නේ පහසු කාර්යයක් නොවන අතර ඒ පිළිබඳ නිසි අවබෝධයකින් යුතුව කැපවීමෙන් සහ අවංක හිතෛෂිභාවයෙන් ඒ වටා ඒකරාශිවන්නැයි සමස්ත මහා සංඝරත්නය වෙනුවෙන් තමන් නැවතත් මේ රටේ සියලූ පාර්ශවවලට ආරාධනා කරන බව උන්වහන්සේ කියා සිටියේ 19 සෙනසුරාදා ඓතිහාසික කැළණිය රජමහා විහාරස්ථානයේදී පැවැත්වුණු යුද්ධයෙන් මියගිය හමුදා සෙබලුන් වෙනුවෙන් පැවති පහන් පූජාවක විශේෂ අනුශාසනාවක් සිදු කරමිනි.
සංහිඳියාව වෙනුවෙන් වූ වගකීම එක් පාර්ශවයකට පමණක් ඉටු කළ නොහැකි අතර ඒ සඳහා සියලූ පාර්ශ්වයන් එක්වීමේ වැදගත්කම උන්වහන්සේ අවධාරණය කල අතර සාමයෙන්, සංහිඳියාවෙන් සහ සහෝදරත්වයෙන් යුත් අනාගතයක් රටට උදාකර දීම වෙනුවෙන් තම වගකීම් ඉටුකිරීමට සියලූ පුරවැසියන්ද එක්විය යුතු බව කැළණිය රජමහා විහාරාධිපති කොල්ලූපිටියේ මහින්ද සංඝරක්ඛිත හිමි වැඩි දුරටත් අවධාරණය කළහ.
Facebook Comments
