හිටපු ජනපති මහින්ද රාජපක්ෂ මහතාට පසුගිය ජනපතිවරණ සමයේදී හම්බන්තොට වරාය ගිණුමෙන් ඩොලර් මිලියන 7.6ක් ලබාදීම පිළිබඳව නිව්යෝක් ටයිම්ස් අනාවරණය සම්බන්ධයෙන් නියෝජ්‍ය අමාත්‍ය රන්ජන් රාමනායක පොලිස් මූල්‍ය අපරාධ ඒකකයට (FCID) පැමිණිල්ලක් ඉදිරිපත් කර තිබේ.
නිව්යෝක් ටයිම්ස් පුවත්පතේ පළ වූ ගවේෂණාත්මක මාධ්‍ය වාර්තාවක් පදනම් කරගෙන තමා මෙම පැමිණිල්ල කරන බව රන්ජන් රාමනායක 28 බ්‍රහස්පතින්දා ඒ පිලිබඳව පැමිණිළි කිරිමෙන් අනතුරුව මාධ්‍ය වෙත කියා සිටියේය.
“මම දන්න විදිහට මේ පැමිණිල්ල භාගයක් දුර ගිහින් නැවතිලා තියෙනවා. මේකේ බී වාර්තාවක් තිබෙනවා. මම අභියෝග කරනවා පුළුවන් නම් මම දුන්නා වගේ දිවුරුම් ප්‍රකාශයක් දෙන්න චයිනා හාබර් එකෙන් චයිනා මර්චන්ට් එකෙන් කිසිඳු මුදලක් අරන් නෑ වගේම ඔවුන්ට මේ කරපු අපහාසයට නිව්යෝක් ටයිම්ස් පුවත්පතට ඩොලර් මිලියන ගාණක් ඉල්ලලා වන්දි නඩුවක් දාන්න පුළුවන්.”
“නිව්යෝක් ටයිම්ස් එකට අදාළ නෑ පොහොට්ටුවද? පුටුවද? අලියද? කඩුවද? අතද? කියන එක. ඇල්ලකට කිට්ටුව ඉන්න ගුණවත් හාමුදුරුනමක් ඩොලර් 38000ක් අරන් තියෙනවා.” යි ඇමැතිවරයා කියා සිටියේය.
ජාත්‍යන්තර බැංකුවක ඇති චීන වරාය සංවර්ධන ව්‍යාපෘතියට අයත් ගිණුමකින් පසුගිය ජනාධිපතිවරණ සමයේදී මහින්ද රාජපක්ෂගේ මැතිවරණ ව්‍යාපාරයට අවම වශයෙන් ඩොලර් මිලියන 7 යි දසම 6 ක මුදලක් බැර කර ඇති බව නිව්යෝක් ටයිම්ස් පුවත්පත අනාවරණය කළේය.
මහින්ද රාජපක්ෂගේ මැතිවරණ ව්‍යාපාරයට සහය පළකල ප්‍රකට බෞද්ධ භික්ෂූන් වහන්සේ නමක් වෙනුවෙන් ඩොලර් 38 දහසක මුදලක් ලබා දී ඇත්තේද මෙම මුදල්වලින් බවයි එම වාර්තාවේ වැඩි දුරටත් දැක්වෙන්නේ.
Facebook Comments
