නිල ජන්ද ප්‍රතිඵල නිකුත් වීමට පෙරම ගෝඨාභය රාජපක්ෂ ශ්‍රී ලංකාවේ අට වැනි ජනාධිපතිවරණයෙන් ජයලත් බව ප්‍රකාශයට පත් කර ඇති අතර සජිත් ප්‍රේමදාස පරාජය බාර ගෙන තිබේ.
“නිල වශයෙන් ප්‍රතිඵල නිකුත් නොවුවද අපි මේ පසු කරමින් සිටින්නේ ශ්‍රී ලාංකික රාජ්‍යයේ අතිශය තීරණාත්මක විජග්‍රාහී බිම්කඩ මතිනි.” යැයි ඩලස් අලහප්පෙරුමගේ අත්සනින් නිකුත් කළ නිවේදනයක දැක්වේ.
ගෝඨාභය රාජපක්ෂගේ ජයග්‍රහණයෙට සුබ පැතුම් එක් කරන නව ප්‍රජාතන්ත්‍රවාදි පක්ෂයේ ජනපති අපේක්ෂකයා ජනතා මතයට ගරුකරමින්, වහාම ක්‍රියාත්මක වන පරිදි, එක්සත් ජාතික පක්ෂයේ උප නායක ධුරයෙන්ද ඉල්ලා අස්වන බව නිවේදනය කර සිටී.
තමා වෙනුවෙන් පෙනී සිටි ජනතාව හා සිය ආදරණීයයන් සමගින් සාකච්ඡා කර දේශපාලන දිවියේ අනාගතය සම්බන්ධයෙන් ගන්නා තීන්දුවට එළඹෙන බව පවසන සජිත් ප්‍රේමදාස පශ්චාත් මැතිවරණ සමයේදී සිය ආධාරකරුවන්ගේ ආරක්ෂාව තහවුරු කරන ලෙස ගෝඨාභය රාජපක්ෂගෙන් ඉල්ලා ඇත.
විදුලි සංදේශ, වි‍දේශ රැකියා සහ ක්‍රීඩා කටයුතු අමාත්‍ය ධුරයෙන් මෙන්ම පක්ෂයේ සියලු තනතුරු වලින් ද තමා ඉල්ලා අස්වන බවට හරීන් ප්‍රනාන්දු සිය ටිවිටර් ගිණුමේ සටහනක් තබා තිබේ.
මේ අතර මුදල් අමාත්‍ය මංගල සමරවීර ද සිය අමාත්‍ය ධුරයෙන් ඉල්ලා අස්විමේ ලිපිය ජනාධිපති සිරිසේන වෙත යොමුකර ඇති අතර එහි පිටපතක් අග්‍රාමාත්‍ය රනිල් වික්‍රමසිංහ වෙත යොමුකර ඇත.
ප්‍රකාශිත මැතිවරණ ප්‍රතිඵල වලට අනුව උතුරු හා නැගෙනහිර ජය ලබා ගැනීමට සජිත් ප්‍රේමදාස සමත් වු අතර දකුණේ බහුතර බලය හිමි වුයේ ගෝඨාභය රාජපක්ෂ වෙතය.
ශ්‍රී ලංකාවේ අට වන විධායක ජනාධිපතිවරයා ලෙස ගෝඨාභය රාජපක්ෂ 18 සඳුදා පෙරවරුවේ යෙදී ඇති සුබ නැකතකට දිවුරුම් දීමට නියමිත බවයි පොහොට්ටු පක්ෂයේ ආරංචි මාර්ග පවසන්නේ.
Facebook Comments
