යුද පීඩිත වන්නියෙන් මතු වු සමුහ මිනී වලෙන් ගොඩගත් මිනිස් අස්ථි වල හිමිකරුවන්ගේ වයස තීරණය කිරීම සදහා අවශ්‍ය මුලික කටයුතු මේ වන විටත් ආරම්භ කර ඇති බව සිරුරු ගොඩගැනීමේ කටයුතු භාරව සිටින අධිකරණ වෛද්‍ය නිලධාරීයා පවසයි.
මුලතිව් මාධ්‍ය සමාජයේ දී ඔක්තෝබර් 30 වැනිදා මාධ්‍ය හමුවක් පවත්වමින් මුලතිව් දිස්ත්‍රික් රෝහලේ අධිකරණ වෛද්‍ය නිලධාරී කනගසභාපති වාසුදේව සදහන් කළේ සමුහ මිනි වලෙන් හමුවු දත් ආශ්‍රයෙන් වයස තීරණය කිරීමේ කටයුතු සිදු කිරීමට නියමිත බවයි.
“දැනට, ගොඩගත් අස්ථි කොටස් දිස්ත්‍රික් රෝහලේ ව්‍යවච්ඡේදක විද්‍යාගාරයේ ආරක්ෂිතව ගබඩා කරලා තියනවා. මුලින්ම අපි ඔවුන්ගේ වයස තක්සේරු කිරීම සඳහා ඔවුන්ගේ දත්වල එක්ස්රේ ගැනීමට තීරණය කරලා තියනවා. ඒ වගේම මේ පරීක්ෂණ සඳහා අපි පේරාදෙණිය විශ්වවිද්‍යාලයේ දන්ත වෛද්‍ය විද්‍යාව පිළිබඳ මහාචාර්යවරයකුගේ සහය ඉල්ලලා තිබෙනවා. ඉදිරියේදී සියලුම එක්ස්රේ ලබාගත්තාට පස්සේ ඔහු පැමිණ මේ ඇටසැකිල්ල ඔක්කොම පරීක්ෂා කරන කොට අපිත් එයාලත් එක්ක එකතු වෙලා අපිට අදාල විෂයන් සම්බන්ධයෙන් කටයුතු කරනවා.”
කොක්කුතොඩුවායි සමුහ මිනිවලේ ඉදිරි කැනිමේ කටයුතු නොවැම්බර් 20 වැනිදා සිට යලි ආරම්භ කිරීමට ඔක්තෝබර් 30 වැනිදා මුලතිව් අධිකරණය තීරණය කර තිබුනි. ඉදිරි කැනීම් කටයුතු වෙනුවෙන් රුපියල් ලක්ෂ 25 ක පමණ මුදලක් ඉතිරිව ඇති බව අධිකරණ වෛද්‍ය නිලධාරියා මාධ්‍ය හමුවේදී සදහන් කර තිබේ.
මේ වන විට ගොඩ ගෙන තිබෙන ඇටසැකිලි සම්බන්ධයෙන් එළැඹ ඇති නිගමනය කුමක්දැයි මුලතිව් මාධ්‍ය සමාජයේ මාධ්‍යවේදියකු නැගු පැනයකට පිළිතුරු දෙමින් අධිකරණ වෛද්‍ය නිලධාරී කනගසභාපති වාසුදේව වැඩි දුරටත් සදහන් කළේ සියළු අස්ථි කොටස් ගොඩ ගැනීමෙන් පසු ඒ සම්බන්ධයෙන් විශ්ලේෂණය කර තොරතුරු ලබා දීමට තීරණය කර ඇති බවයි.
“මේ තීරණය සම්බන්ධයෙන් මෙවැනි පොඩි පොඩි වැඩ දැනටමත් ආරම්භ කරලා තියනවා. ගොඩගත් ඇටසැකිලි වල එක්ස්රේ දැනටමත් අරන් තියනවා. වලේ තියන ඇටසැකිලි සම්පුර්ණයෙන් ගොඩ ගමු. ඊට පස්සේ අපි මේ ගැන විශ්ලේෂණය කරලා ඒ් සම්බන්ධයෙන් දැනුම් දෙනවා කියලා තීරණයක් අරන් තියනවා. මේක ගැන ආරම්භයේදීම කිව්වොත් යම් යම් ගැටළු මතු වෙන්න පුළුවන්. අතුරුදහන්කරපු අයගේ ඥාතීන් සහ එයාලගේ නීතිඥයන් කියලා තියෙන්නේ වලේ තියන ඇට සැකිලි ඔක්කොම ගනිමු, ඊට පස්සේ ඉතිරි වැඩ කටයුතු සිදු කරමු කියලා.”
සිරුරු ගොඩගැනීමේ කටයුතු විමර්ශනයට පුරෝගාමී වී සිටි වෝහාරික පුරාවිද්‍යාඥ මහාචාර්ය රාජ් සෝමදේව සැප්තැම්බර් 15 වැනි දා කැනීම් කටයුතු තාවකාලිකව නිමා කරමින් සඳහන් කර තිබුනේ ගොඩගත් සාක්ෂි විශ්ලේෂණය සදහා කැනීම් තාවකාලිකව නතර කරන බවයි.
“දැනට ලැබී තිබෙන සාක්ෂි ක්‍රමානුකුලව විශ්ලේෂණය කිරීම සදහා මාස 2 ක පමණ කාලයකට මේ පරීක්ෂා කිරීම නතර කරලා තියනවා. ඉතින් මේ මුලික විශ්ලේෂණ කටයුතු වලදී අධිකරණ වෛද්‍ය නිලධාරීතුමන්ලගෙත්, අපි කරපු ඒ සොයා ගත්තු ද්‍රව්‍යමය සාක්ෂිත් විශ්ලේෂණයට ලක් කරලා අපි ගරු අධිකරණයට වාර්තාවක් ලබා දීමට නියමිතව තිබෙනවා. ඊට පස්සේ අපි මේ සමීක්ෂණය, පරීක්ෂණය තවදුරටත් කරගෙන යනවද නැද්ද කියන එක ගරු අධිකරණය තීරණය කරනතුරු අපි බලාපොරොත්තුවෙන් ඉන්නවා.”
මුලතිව්, කොක්කුතොඩුවායි සමූහ මිනීවලේ කැනීම් කටයුතු යළි ආරම්භ කර දින නමයක් ගත වෙද්දී, පුද්ගලයන් දාහත් දෙනකුට අයත් අස්ථි කොටස් ගොඩ ගෙන තිබුනි. ඒ අතර එල්.ටී.ටී.ඊ සාමාජිකාවන්ගේ බවට සැක කෙරෙන සාක්ෂි කිහිපයක් ද විය.
කොක්කුතොඩුවායි මහාවිද්‍යාලයේ සිට කෝකිලායි දෙසට මීටර් 200ක් පමණ දුරකින් ජුනි 29 වැනි බ්‍රහස්පතින්දා හවස් යාමයේ මිනිස් සිරුරු කොටස් සහ ඇඳුම් කොටස හමුවී තිබුනේ ජල සම්පාදන දෙපාර්තමේන්තුවේ කාර්ය මණ්ඩලය ජලනල එළීමට පොළව හාරමින් සිටියදී ය.
Facebook Comments
