ආචාර්ය ලෙස්ටර් ජේම්ස් පීරිස් 99 වන ජන්ම දිනය සමරන්න ජනපති එකතු වෙයි

0

ජාත්‍යන්තර කීර්තිධර මහා සිනමාවේදී ආචාර්ය ලෙස්ටර් ජේම්ස් පීරිස්ගේ 99 වන ජන්ම දිනය අදට යෙදී තිබෙන අතර, ඒ නිමිත්තෙන් 05 බ්‍රහස්පතින්දා තිඹිරිගස්යායේ පිහිටි ඔහුගේ නිවස වෙත ගිය ජනපති සිය ජන්ම දින සුබපැතුම් පිළිගන්වා තිබේ.

අනතුරුව ආචාර්ය ලෙස්ටර් ජේම්ස් පීරිස්ගේ සුවදුක් විමසමින් සුහද කතා බහක නිරත වූ ජනාධිපති මෛත්‍රීපාල සිරිසේන ආචාර්යවරයා වෙත වෙත නිදුක් නිරෝගි සුවය ප‍්‍රාර්ථනා කළ බවයි ජනාධිපති මාධ්‍ය අංශය පවසන්නේ.

එමෙන්ම ආචාර්ය ලෙස්ටර් ජේම්ස් පීරිස් සහ සුමිත‍්‍රා පීරිස් සමග එක්ව කේක් කපා ජන්ම දිනය සැමරීමට ද ජනපති එක්විය.

දේශීය සිනමාව අන්තර්ජාතික කීර්තියට පත් කිරීමට සිය නිර්මාණ දායකත්වය සැපයූ ජ්‍යෙෂ්ඨතම ලාංකේය සිනමාකරුවා වන ආචාර්ය ලෙස්ටර් ජේම්ස් පීරිස් ඉටු කළ මෙහෙවර අගයමින් ඔහුගේ වෛද්‍ය ප‍්‍රතිකාර කටයුතු ඇතුළු සෙසු වියදම් සඳහා විශේෂ මාසික දීමනාවක් ලබාදීමට ජනාධිපතිවරයා පසුගියදා කැබිනට් මණ්ඩලයේදී අනුමැතිය ලබා ගත් බවයි ජනාපති මාධ්‍ය අංශය නිවේදනය කරන්නේ.

යුග මෙහෙවරක් ඉටුකළ යුග පුරුෂයෙකුට පමණක් පිරිනැමෙන මෙම විශේෂ මාසික දීමනාවට අදාළ ලිපි ලේඛන සහ ඊට අදාළ පළමු චෙක්පත ද මෙහිදී ජනාධිපති අතින් ආචාර්ය ලෙස්ටර් ජේම්ස් පීරිස් වෙත පිළිගැන්විණි.

අමාත්‍ය රංජිත් මද්දුමබණ්ඩාර, ආචාර්ය සෝමරත්න දිසානායක, රේනුකා බාලසූරිය පිරිසක් මෙම අවස්ථාවට එක්ව තිබේ.

Facebook Comments

wedding people