ජාතික ආණ්ඩුව ඉදිරියට ගෙන යාම සඳහා ජනපති, අගමැති හා ශ්‍රීලනිප, එජාප කණ්ඩායම් පැවති සාකච්ඡා සාර්ථකව පැවැත්වු බව ඇමැති දුමින්ද දිසානායක පවසයි.
ජනාධිපතිවරයා සහ අගමැතිවරයා අතර අවිස්වාසයක්, විරසකයක්, සැකයක් නොමැති බවද ඇමැතිවරයා 06 බදාදා අමාත්‍යාංශයේ පැවැති සාකච්ඡාවකින් අනතුරුව මාධ්‍ය වෙත අදහස් දක්වමින් කියා සිටියේය.
ජාතික ආණ්ඩුව ඉදිරියට ගෙනයාම පිළිබඳව සොයා බැලීමට පත් කල එක්සත් ජාතික පක්ෂයේ සහ ශ්‍රී ලංකා නිදහස් පක්ෂයේ කමිටු ජුනි 05 අඟහරුවාදා මෙසේ හමුවු බව මෙන්ම එයට ජනාධිපතිවරයා සහ අගමැති වරයාත් සහභාගිවු බව කී අමාත්‍ය දුමින්ද දිසානායක ඉදිරියේදී කරන වැඩ සටහන් පිළිබඳව ජනතාවට ලබා දෙන සහන පිළිබඳව එහිදී සාකච්ඡා කල බවයි පෙන්වා දෙන්නේ.
“ශ්‍රීලනිපයේ සභාපතිවරයා ජනාධිපතිවරයායි. මේ ආණ්ඩුවේ ප්‍රධානියාත් ජනාධිපතියි. අප ජනාධිපති අපහසුවට පත්වන ආකාරයට කටයුතු කරන්නෙ නැහැ. අප උත්සාහ කරන්නෙ රටේ ජනතාවගේ අනාගත බලාපොරොත්තු ඉෂ්ඨ කරන්න. අප විශ්වාස කරනවා මෙම සම්මුතිවාදී ආණ්ඩුවේ තිබෙන අඩු පාඩු කම් හදා ගෙන ජනතා බලාපොරොත්තු වරප්‍රසාද වෙනුවෙන් හඩ නැගීමට කාලය උදා වී තිබෙන බව.” යැයි අමාත්‍යවරයා වැඩි දුරටත් ප්‍රකාශ කළේය.
Facebook Comments
