ශ්‍රී ලංකාව තුළ ජාතීන් අතර සංහිඳියාව වර්ධනය කිරීම සඳහා අවශ්‍ය සෑම සහයෝගයක්ම ලබා දෙන බවට ජාත්‍යන්තර සංවිධාන දෙකක් සහතික වී ඇත.
එක්සත් ජාතීන්ගේ සංවිධානයේ සම්බන්ධීකාරක උනා මැකෝලි සහ යුරෝපා සංගමයේ තානාපතිවරියක වන ටූලයි මාර්ග් ඊයේ (15) උතුරු පළාතේ සංචාරයක් අතර තුරු උතුරු පළාත් මහ ඇමති සී.වී.විග්නේස්වරන් හමුවේ ඔවුන් මෙසේ ප්‍රතිඥා දී තිබේ.
ශ්‍රී ලංකාවේ පවතින දේශපාලන තත්ත්වය පිළිබඳව මෙන්ම උතුරු පළාත් සභාවේ කටයුතු සම්බන්ධයෙන් ද විදේශීය නියෝජිතයෝ මහඇමති විග්නේශ්වරන් සමග දීර්ඝ වශයෙන් සාකච්ඡා කල බවයි උතුරු පළාත් මහ ඇමති කාර්යාලය පවසන්නේ.
ජාතීන් අතර සංහිදියාව වර්ධනය කිරීම පිණිස රජය ගෙන යන වැඩ පිළිවෙලත් ඊට උතුරු පළාත් සභාව දක්වන සහයෝගයත් ප්‍රධාන අමාත්‍යවරයා සමග කළ සාකච්ඡාවේදී ඉස්මතු වූ බව එක්සත් ජාතීන්ගේ සංවිධානයේ සම්බන්ධිකාරකවරයා හමුවෙන් අනතුරුව මාධ්‍යවේදීන් ඉදිරියේ කියා සිටියේය.
බලය බෙදන ආණ්ඩුක්‍රමයක්
යෝජිත නව ආණ්ඩුක්‍රම ව්‍යවස්ථාව මඟින් බලය බෙදා හැරීමේ අවශ්‍යතාවය සහ එවැනි ක්‍රියාමාර්ගයක් මගින් ජාතික ප්‍රශ්නයට විසඳුම් ලබා ගන්නා ආකාරය සම්බන්ධවද මෙම හමුවේදී දෙපාර්ශයේම අවධානයට ලක් වී ඇත.
බලය බෙදා හැරීම සම්බන්ධව උතුරු පළාතේ මහඇමති සී.වී.විග්නේස්වරන් ඉදිරිපත් කළ යෝජනා හා අදහස් ඉතා ප්‍රශස්ත මට්ටමක පවතින බව යුරෝපා හවුලේ තානාපතිවරිය මෙම හමුවෙන් අනතුරුව පැවති මාධ්‍ය හමුවේදි කියා සිටියාය.
Facebook Comments
