හැත්තෑ වසරකට පෙර එජාපයේ නිර්මාතෘ ඩී.එස් සේනානායක මහතා 1946 දී සිංහල, දෙමළ, මුස්ලිම්, බර්ගර් අපි එකම ජාතිකයක් ලෙස සිටිය යුතු බවට කළ ප්‍රකාශය අදත් අපිට කියන්න සිදුව ඇති බවද ඩී.එස් සේනානායක, එස්.ඩබ්ලිව් ආර්.ඩී බණ්ඩාරනායක, චෙල්වනායගම් වැනි නායකයින් අදින් අවුරුදු ගාණකට කලින් සිදුකළ එම ප්‍රකාශ අදටත් අපට කියන්න සිදුව ඇත්තේ මේ රටේ සියලූ ජාතීන් සංහිඳියාව වෙනුවෙන් කටයුතු නොකළ නිසා බවයි ජනාධිපති අවධාරණය කරන්නේ.
එජාප 70 වන සංවත්සරයේ ප්‍රධාන ආරධිත අමුත්තා ලෙස සහභාගී වෙමින් බෙරැල්ල කැම්බල් පිටියේ පැවති උත්සවයේදී ජනාධිපති මෛත්‍රීපාල සිරිසේන මේ අදහස් පළ කළේය.
2015 ජනාධිපතිවරණය ජයග්‍රහණයේ වැඩිම කොටස්කරුවන් සිටින පක්ෂයේ සංවත්සරයට ආරාධනා ලැබීම සතුටක් බවද ජනාධිපතිවරයා පැවසුවේය.
පසුගිය ජනාධිපතිවරණයේදී හැට දෙලක්ෂයක් ජනතාව ජන්දය ලබා දුන්නේ අප විසින් රටට ඉදිරිපත් කළ මැතිවරණ ප්‍රකාශනයේ කරුණු ඉටු කිරීමට බවත් ඒවා දිවි හිමියෙන් ඉටුකිරීමට තමන් බැඳි සිටින බවට ජනාධිපතිවරයා පැවසීය.
රට ගොඩනැඟීමට කාළය එළඹ ඇති බව පෙන්වා දෙන ජනාධිපතිවරයා පවසන්නේ ශ්‍රීලනිපයටත් එක්සත් ජාතික පක්ෂයට එකට හිටිගෙන රට ගොඩනැංවිය හැකි බවයි.
“එදා අනගාරික ධර්මපාලතුමා කිව්වේ සිංහලයිනි නැගිටිව් කියලා අද පොදු ජනතාවගේ සේවකයා විදියට මම කියනවා ලාංකිකයිනි නැගිටිව් කියලා” යැයිද ජනාපති සිරිසේන මෙහිදී පවසා සිටියේය.
මාධ්‍යයට ඉල්ලීමක්
ජාතික අපරාධ නොකරන ලෙසත් ඒ ඛේදවාචකය සිදු නොකර ශ්‍රී ලංකාව ලොව විශිෂ්ට රාජ්‍යක් ලෙස පත් කිරීමට සහය වන ලෙසට ජනාධිපතිවරයා සියලු මාධ්‍ය ආයතන වලින් ඉල්ලීමක් සිදු කළේය.
“දූෂණය, වංචාව, හොරකම පවුල්වාදය, ජාතික සංහිඳියාව ගොඩනැඟීමට අපි කැපවී ඉන්නවා. සිංහල, දෙමළ, මුස්ලිම් ජනතාවට පිළිගත හැකි ආණ්ඩුක්‍රම ව්‍යවස්ථාවක් වෙනුවෙන් අපී පෙනී ඉන්නවා. සමහරු අලුත් ආණ්ඩුක්‍රම ව්‍යවස්ථාව ගැන, අපි කරන දේවල් ගැන සම්පූර්ණ අසත්‍ය ජනතාව අතර පතුරුවනවා යැයි ජනපති පැවසීය.
හෙට උපදින දරුවන් වෙනුවෙන් හොද රටක් හැදීමට ද මුළු සමාජ සංස්ථාව තුළම සාමය සමගිය ස්ථාපිත කරන්න කැපවෙමු යැයිද ජනාධිපති මෛත්‍රීපාල සිරිසේන එහිදී වැඩිදුරටත් කියා සිටියේය.
ජන්දයකට ගියේ නොහැකියාවට
අවුරුදු දෙකකට පෙර ජන්දයකට නොයැන්නයි තමන් ඇතුළු සන්ධානයේ බහුතර කියද්දී හිටපු නායකයා ඡන්දයකට ගියේ මෙරට ආර්ථික අර්බුදයට හා මානව හිමිකම් කොමිසමට මුහුණදීමට තිබූ නොහැකියාව නිසා බවයි ජනාධිපතිවරයා පෙන්වා දුන්නේ.
යහපාලන රජය පාර්ලිමේන්තුවේ තුනෙන් දෙකේ බලයක් සහිතව 19 වැනි සංශෝධනය සම්මත කළ බවත්, එක්සත් ජාතීන්ගේ සංවිධානයේ යෝජනාවලට මුහුණදුන් බවත් කෙසේ හෝ දැන් එළඹ ඇත්තේ රට ගොඩනැඟීමට කාලය බවද ඔහු අවධාරණ කළේය.
Facebook Comments
