උතුරේ ධීවරයන්ගේ උද්ඝෝෂණ හමුවේ ඉන්දීය ට්‍රෝලර් යාත්‍රා ගැටලුව විසඳීමට ශ්‍රී ලංකාවේ ඉන්දීය මහ කොමසාරිස් පොරොන්දුවී තිබේ.
ඉන්දීය මහ කොමසාරිස් ගෝපාල් බක්ලේ කොළඹ දී හමුවූ උතුරේ ධීවර සංගම් නායකයන් අවධාරණය කර ඇත්තේ ඉන්දීය ධීවරයන්ගේ නීති විරෝධී ට්‍රෝලර් යාත්‍රා මෙරට මුහුදට පැමිණීම තහනම් කරන බවට
ඉන්දියාව පොරොන්දු වී පස් වසක් ගත වුවද මෙතෙක් එය ඉටු කිරීමට සමත්ව නැති බවයි.
උතුරේ ධීවර සංගම් විසින් ඉකුත් 17 වැනිදා මුලතිව් සිට පේදුරුතුඩුව දක්වා බෝට්ටු පෙළපාලියක් පවත්වා දැක්වූ විරෝධතාවෙන් අනතුරුව දෙමළ ජාතික සන්ධානයේ පාර්ලිමේන්තු මන්ත්‍රී එම්.ඒ.සුමන්තිරන්
ඔවුන් ව මෙරට ඉන්දීය මහ කොමසාරිස්වරයා හමුවට රැගෙන ගොස් තිබේ.
“ට්‍රෝලර් යාත්‍රා එන එක තහනම් කරනවා කියලා පොරොන්දු වෙලා දැන් අවුරුදු පහක් ගෙවිලා ගිහින්, තවත් විනාඩි තුනක් වත් දෙන්න බැහැ,“යැයි ඉන්දිය මහ කොමසාරිස්වරයා හමුවේ උතුරේ ධිවර
සංගම් එකතුවේ නායක ඇම්.පී.සුබ්‍රමානියම් පැවසීය.
ඉන්දියාවේ පොරොන්දු කඩ කිරීම ධීවර නියෝජිතයෝ පෙන්වා දීමත් සමගින් මහ කොමසාරිස් බක්ලේ කියා ඇත්තේ නවදිල්ලියේ ඉන්දීය මධ්‍යම ආණ්ඩුවටත්, තමිල්නාඩු ප්‍රාන්ත ආණ්ඩුවටත් දන්වා වහා මෙම ගැටලුව විසදීමට පිළියම් යොදන බවයි.
ඉන්දීය ධීවරයන් මෙරට මුහුදු සීමාව ආක්‍රමණය කරමින්, මුහුදු සම්පත් විනාශ කිරීම නවතා ලීමට වහා පියවර ගන්නා ලෙස ඉල්ලා ධීවර සංගම් නායකයන්ගේ අත්සනින් යුත් සංදේශ, මිට පෙර අවස්ථා කිහිපයකදීම කොළඹ සහ යාපනේ පිහිටි ඉන්දියානු මහ කොමසාරිස් කාර්යාලවලට බාර දී තිබේ.
Facebook Comments
