ශ්‍රී ලංකා හමුදා විසින් දෙමළ විමුක්ති කොටි සංවිධානයට එරෙහිව දියත් කළ යුද්ධයේදී අපරාධ සිදුවු බවට අවසන් යුද්ධයට නායකත්වයට දුන් ජනාධිපතිවරයා පිළිගෙන තිබේ.
දසදහස් සංඛ්‍යාත ජීවිත විනාශ කරමින් දියත් කෙරුනු යුද්ධය කිසිවකුටත් හානි නොකළ “මානුෂික මෙහෙයුමක්” ලෙස හැඳින්වූ ආණ්ඩුවක නායකත්වය දැරූ මහින්ද රාජපක්ෂ තමන්ගේ සේනාධිනායකත්වය යටතේ වූ හමුදාවලට එරෙහිව දස වසරකට ආසන්න කාලයක පටන් නැගෙන චෝදනාවල සත්‍යයක් ඇතැයි මුල්වරට ප්‍රසිද්ධියේ පිළිගත්තේ දෙමළ මාධ්‍යවේදීන් සමූහයක් සමග පැවති විශේෂ සාකච්ඡාවකදීය.
එම බරපතල අපරාධ වලට සම්බන්ධ හමුදා සාමාජිකයින්ට අධිකරණයට පමුණුවා දඬුවම් කළ යුතු බව විපක්ෂ නායක මහින්ද රාජපක්ෂ 07 අඟහරුවාදා දෙමළ මාධ්‍යවේදීන් හමුවේ කියා සිටියේය.
එක්සත් ජාතීන්ගේ ගණන් බැලීම් වලට අනුව උතුරු යුද්දයෙන් මියිගිය සිවිල් වැසියන් ප්‍රමාණය අවම වශයෙන් හැත්තෑ දහසක් වන අතර යුද්ධයේදී යුද අපරාධ සහ මානව වර්ගයාට එරෙහි අපරාධ සිදුවූ බවට නැගී ඇති චෝදනා විභාග කළ යුතු බවට වර්තමාන රජය ගිවිසගෙන තිබේ.
“දැන් ඒවා උනානේ දෙගොල්ලොන්ගෙන්ම වුනා.” යි කී හිටපු ජනපතිවරයා රජයේ ආරක්ෂක අංශ මෙන්ම කොටි සංවිධානය ද අපරාධ සිදු කල බව පැවසීය.
ස්ත්‍රී දුෂණ සිදු වු බවට විශේෂයෙන් සඳහන් කර සිටි විපක්ෂ නායකවරයා ඒවා යුද්දයට සම්බන්ධ නැති බව ද අවධාරණය කළේය.
“ගෙදරක ගෑනු ළමයෙක් ඉන්නවා නම්, ඒ ලමයව අරං ගිහිල්ලා කවුරු හරි රේප් කරනවානම්, ඒක යුද්දෙට සම්බන්ධයක් නෑනේ. මේ සටනට සම්බන්ධ නෑනේ. එහෙම දේවල් උනානේ. දෙගොල්ලන්ගෙන්ම උනා. එහෙම නම් ඒ දෙගොල්ලන්ටම දඬුවම් කරන්න ඕනේ ඒකට. එක කට්ටියකට දඬුවම් කරන්නයි එක කට්ටියක් නිදහස් කරන්නයි බැහැ, එහෙම උනානම්.”
යෝජිත නව ව්‍යවස්ථාව ගෙන එන බව පවසමින් දෙමළ ජාතික සන්ධානය දෙමළ ඡන්ද ගැනිමේ උප්පරවැටියක් යොදන බවට මහින්ද රාජපක්ෂ චෝදනා කළේය.
ජාතික ප්‍රශ්නය විසඳා ගැනීමට මේතාක් නොහැකි වූයේ රනිල් වික්‍රමසිංහගේ ආණ්ඩුවක් යටතේ තම ඉල්ලීම් ඉටු කර ගත හැකි වෙතැයි විශ්වාසයෙන් යුතුව දෙමළ ජාතික සන්ධානය කටයුතු කළ නිසා යැයි චෝදනා කළ විපක්ෂ නායකයා තමන් බලයට පත් වූ විට TNA නැතිව හෝ විසඳුමක් ගෙන එන බව කියා සිටියේය.
Facebook Comments
