එක්සත් ජාතීන්ගේ තීන්දු ලංකාවේ උසාවි “මායිම් කරන්නේ නෑ” (VIDEO)

0

ශ්‍රී ලංකාවේ සිදුවන මානව හිමිකම් උල්ලංඝන සම්බන්ධයෙන් එක්සත් ජාතීන්ගේ සංවිධානය ගන්නා තීන්දු මෙරට යුක්තිය පසිඳ ලීමේ ඉහළම අධිකරණයක් ගණන් නොගන්නා බව ජගත් මානව හිමිකම් මණ්ඩලය ජිනීවා නුවර රැස්වෙද්දී දිවයිනේ ප්‍රකට නීතිඥයකු විසින් හෙළි කර තිබේ.

“ශ්‍රේෂ්ඨාධිකරණය ලංකාවේ කියනවා, ශ්‍රී ලංකාවේ මේ මානව හිමිකම් උල්ලංඝනය කිරීම සම්බන්ධයෙන් එක්සත් ජාතීන්ගේ සංවිධානය ගන්නා තීන්දු ලංකාවේ ‌ශ්‍රේෂ්ඨාධිකරණය කොහෙත්ම මායිම් කරන්නේ නෑ. කියලා. ඔබට විශ්වාස කරන්න පුළුවන්ද මේක. මෙන්න මේකයි රටේ තත්වය.”

සමාජ මාධ්‍ය ඔස්සේ වීඩියෝවක් නිකුත් කරමින් නීතිඥ නාගානන්ද කොඩිතුවක්කු කියා සිටින්නේ අපරාධ යුක්තිය පසිඳ ලීමේ ක්‍රමවේදයට පටහැනිව ජනාධිපතිගේ නියෝගයෙන් රදවාගෙන සිටින අන්තර් විශ්ව විද්‍යාල ශිෂ්‍ය බලමණ්ඩලයේ කැඳවුම්කරු වසන්ත මුදලිගේ ඇතුළු පිරිස සම්බන්ධයෙන් 23 වැනි සිකුරාදා තමන් අධිකරණය හමුවේ කරුණු දැක්වීමේදී ශ්‍රේෂ්ඨාධිකරණය එසේ සඳහන් කළ බවයි.

යුද අපරාධ හා පැහැරගෙන ගොස් අතුරුදහන් කිරීම් ඇතුළු මානව විරෝධී අපරාධ සම්බන්ධයෙන් රට තුල යුක්තිය ඉටුවීම පිළිබඳ විශ්වාසයක් නැති උතුරු නැගෙනහිර දෙමළ ජනතාව දශකයකට වැඩි කලක පටන් ඉල්ලා සිටින්නේ චූදිත ශ්‍රී ලංකාවේ රජය හා ආරක්ෂක අංශ සම්බන්ධයෙන් ජාත්‍යන්තර යුක්ති විනිශ්චයක් සිදු කරන ලෙසයි.

අන්තර් විශ්ව විද්‍යාලයීය ශිෂ්‍ය බල මණ්ඩලයේ (අවිශිබම) කැඳවුම්කරු වසන්ත මුදලිගේ, අන්තර් විශ්ව විද්‍යාලයීය භික්ෂු බල මණ්ඩලයේ කැඳවුම්කරු ගල්වැව සිරිධම්ම හිමි සහ කැළණිය විශ්ව විද්‍යාලයේ සමාජ විද්‍ය අංශයේ ශිෂ්‍ය ක්‍රියාකාරික හෂාන් ජීවන්ත ගුණතිලක ත්‍රස්ත විරෝධී නීති යොදාගෙන දින 90ක් සිරගත කර සිටී.

ත්‍රස්තවාදය වැළැක්වීමේ පනත යටතේ රඳවාගෙන සිටින අන්තරයේ කැඳවුම්කරු වසන්ත මුදලිගේ ඇතුළු තිදෙනකු නිදහස් කරන ලෙස ඉල්ලමින් ගොනු කර ඇති මූලික අයිතිවාසිකම් පෙත්සම් සලකා බැලීම සඳහා ඔක්තෝබර් මස 18 වැනිදා කැඳවන ලෙස පසුගිය 23 වැනිදා ශ්‍රේෂ්ඨාධිකරණය නියම කර තිබුනි.

අදාළ පෙත්සම් ප්‍රියන්ත ජයවර්ධන ප්‍රමුඛ ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ සලකා බැලීමෙන් අනතුරුව එම නියෝගය නිකුත් කර තිබේ.

වසන්ත මුදලිගේ ඇතුළු තරුණයන් පිරිසක් මීට ඉහතදී අත්අඩංගුවට ගත් අවස්ථාවකදී ඔවුන්ට කෘර ලෙස පහර දුන් වීඩියෝ දර්ශන බැලීමට තරම්වත් ලංකාවේ ශ්‍රේෂ්ඨාධිකරණ සුදානම් නොවු බවටත් නීතිඥ නාගානන්ද සදහන් කළේය.

“මේවා රටේ ජනතාවට අපි හෙළි කළ යුතුයි. මොකද මේ රටේ ජනතාවගේ අධිකරණ බලය බල ගන්වන ඉහළම ආයතනය හැටියට ශ්‍රේෂ්ඨාධිකරණට බරපතල වගකීමක් තියනවා මේ රටේ ජනතාවගේ මුලික අයිතිවාසිකම් වන ජනතා පරමාධිපත්‍යබලය ආරක්ෂා කිරීමට.”

නීතිඥ වෘත්තියට නොගැලපෙන අයුරින් කරුණු දැක්වීමෙන් ශ්‍රේෂ්ඨාධිකරණ රීති දෙකක්උ ල්ලංඝණය කිරීමේ චෝදනාවකට වරදකරුවී ශ්‍රේෂ්ඨාධිකරණය විසින් මීට ඉහතදී නීතිඥභාවය වසර තුනකට අහෝසි කිරීමකටද ලක් වුන නීතීඥ නාගානන්ද කොඩිතුවක්කු කරන අලුත්ම අනාවරණය පහත වීඩියෝවෙන් නරඹන්න,

Facebook Comments

wedding people