රජයේ ආරක්ෂක අංශ විසින් බලහත්කාරයෙන් අතුරුදහන් කරනු ලැබුවන් පිළිබද තොරතුරු හෙළි කරන ලෙස සහ සියලු දේශපාලන සිරකරුවන් නිදහස් කරන මෙන් ඉල්ලා වව්නියාවේදී පවත්වාගෙන යන මාරාන්තික උපවාසයට සහාය පළ කරමින් දෙමළ දේශපාලන සිරකරුවන් අද (26) බ්‍රහස්පතින්දා එක් දින සංකේත උපවාසයක් ආරම්භ කර තිබේ.
කොළඹ මැගසින් බන්ධනාගාරයේ සිටින සිරකරුවන් 80 දෙනෙකුද, අනුරාධපුරය බන්ධනාගාරයේ සිටින 18 දෙනෙකු ද, බෝගම්බර බන්ධනාගාරයේ සිටින 19 දෙනෙක් සහ යාපනය බන්ධනාගාරයේ සිටින 10 දෙනෙක් ඇතුළු අනෙකුත් බන්ධනාගාරවල සිටින දෙමළ දේශපාලන සිරකරුවන් සියළු දෙනා මෙලෙස උපවාසයක් ආරම්භ කර ඇති බව දේශපාලන සිරකරුවන් නිදහස් කර ගැනීමේ ජාතික ව්‍යාපරයෙහි කැඳවුම්කරු සුන්දරම් මහේන්ද්‍රන් සිලෝන් ජර්නල්ස් වෙත පැවැසීය.
අතුරුදහන්වූවන් සහ දේශපාලන සිරකරුවන්ගේ ප්‍රශ්ණයට වසර ගණනක් තිස්සේ කිසිඳු විසඳුමක් නොදීම හේතුවෙන් අද මාරාන්තික උපවාසයක් පැවැත්වීමේ තත්වයට රජය ඔවුන්ව පත්කර ඇති බවයි හෙතෙම වැඩිදුරටත් පවසා සිටියේ.
උපවාසය තවදුරටත්
වව්නියාවේ උපවාස නිරත පිරිස අතර අසනීප තත්ත්වයට පත්වූ සිව්දෙනෙකු තමන්ව රෝහලට ඇතුලත් නොකරන ලෙස ඉල්ලා ඇත.
දින හතරක් තිස්සේ ආහාරද වර්ජනය කරමින් උපවාසයේ නිරතව සිටින අතර ආහාර නොගැනීම හේතුවෙන් අසාධ්‍ය වු පිරිස් සිටින බව මෙන්ම උපවාසයේ නිරතවන පිරිසට සහාය පළ කරමින් ඊයේ දින දිනක සංකේත උපවාසයක නිරතවූ මවකු අසනීපවීම හේතුවෙන් වව්නියාව රෝහලට ඇතුලත් කර ඇති බවද වාර්තා වේ.
ඉල්ලීම් සාධාරණයි
උපවාසයේ නිරත අතුරුදන්වූවන්ගේ ඥාතීන් ඉදිරිපත් කර ඇති ඉල්ලීම සාධාරණීය බව මෙන්ම ඔවුන්ගේ ප්‍රශ්ණයට සාධාරණීය පිළිතුරක් ලබාදිය යුතු බව විපක්ෂ නායක හා දෙමළ ජාතික සන්ධානයේ නායක ආර්. සම්බන්ධන් පවසයි.
යාපනය දිස්ත්‍රික්ක ලේකම් කාර්යාලයේදී අද (26) දින පැවැති විදේශ කටයුතු අමාත්‍යංශයේ කාර්යාලය විවෘත කිරීමේ උත්සවයට සහභාගිවෙමින් විපක්ෂ නායකවරයා මේ බව පැවසීය.
විවිධ බාධා කිරිම් මද්දේ සම්මත වු අතුරුදහන්වුවන් සඳහා වු කාර්යාලය මෙතෙක් ස්ථාපිත කිරීමට රජය අසමත් වු බවට චෝදනා කරන විපක්ෂ නායක සම්බන්ධන් අතුරුදහන් වුවන්ගේ නෑසියන් “තම ඥාතීන්ට සිදුවුයේ කුමක් දැයි දැන ගැනීමට කැමැත්තෙන් සිටිනවා, හමුදාව හා පොලිසිය විසින් අත්අඩංගුවට ගත් තම දරුවන් සහ සැමියන්ට සිදුවුයේ කුමක්ද යැයි දැන ගැනීමට කැමැත්තෙන් සිටිනවා” යැයි වැඩිදුරටත් කියා සිටියේය.
Facebook Comments
