ගුවනින් යාපනයට ගොස් දිලීපන් සමරුව තහනම් කිරීමට ගත් තැත වරදී

දෙමළ විමුක්ති අරගලය වෙනුවෙන් මාරාන්තික උපවාසයක යෙදී ජීවිතය පරිත්‍යාග කළ එල්.ටී.ටී.ඊ සංවිධානයේ හිටපු ප්‍රධානියකු වෙනුවෙන් පවත්වන අනුස්මරණයක් නතර කිරීමට කොළඹ සිට යාපනයට හදිසියේ ගුවනින් ගිය ඉහළ පෙලේ පොලිස් නිලධාරියකු දැරූ උත්සාහයක් අධිකරණය හමුවේ අසාර්ථක වී තිබේ.

යාපනය මහේස්ත්‍රාත් අධිකරණය සැප්තැම්බර් 22 සිකුරාදා පස්වරුවේ දෙවැනි වතාවටත් නියෝගයක් නිකුත් කරමින් අවධාරණය කර ඇත්තේ තිලීපන් අනුස්මරණ උත්සවයට කිසිදු තහනමක් පැනවිය නොහැකි බවයි.

ඉන්දීය හමුදාවට එරෙහිව මාරාන්තික උපවාසයක යෙදී ජීවිතය පරිත්‍යාග කිරීම නිසා ත්‍යාගී දිලීපන් ලෙසින් ගෞරවයට පාත්‍ර වන එල්.ටී.ටී.ඊ සංවිධානයේ ලුතිතන් කර්නල් රාසයියා පාර්තිපන් අනුස්මරණ සිදු කළහොත් ප්‍රදේශයේ කලබලකාරී තත්වයක් ඇති විය හැකි බව පවසමින් යාපනය පොලීසිය විසින් සැප්තැම්බර් 19 වැනිදා ගොනු කළ පෙත්සම සැප්තැම්බර් 20 වැනිදා මහේස්ත්‍රාත් අධිකරණය නිෂ්ප්‍රභ කර තිබුනි.

ඉන් අනතුරුව සැප්තැම්බර් 21 වැනිදා කොළඹ සිට යාපනයට ගිය පොලිස් නීති කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරි කාලිංග ජයසිංහ සහ රජයේ ජ්‍යෙෂ්ඨ නීතිඥ සමින්ද වික්‍රම සැප්තැම්බර් 21 වැනිදා මහේස්ත්‍රාත් අධිකරණයට හදිසි පෙත්සමක් ගොනු කරමින් ඉල්ලා ඇත්තේ තිලීපන් අනුස්මරණය සිදු කළහොත් ප්‍රචණ්ඩකාරී තත්වයක් ඇති විය හැකි බැවින් එය නතර කිරීමට තහනම් නියෝගයක් නිකුත් කරන ලෙසයි.

පළාත් බද වාර්තාකරුවන් පවසන්නේ පෙත්සම ගොනු කිරීම සදහා පොලිස් නීති කොට්ඨාසයේ අධ්‍යක්ෂ ඇතුළු පිරිස යාපනයට පැමිණ තිබුනේ හෙලිකොප්ටරයකින් බවයි.

රාසයියා පාර්තිපන් අනුස්මරණ සතිය නිමිත්තෙන් සැප්තැම්බර් 15 වැනිදා දෙමළ ජාතික ජනතා පෙරමුණ පොතුවිල් වලින් ආරම්භ කළ රථ පෙළපාලිය වව්නියාව පම්පමඩු ප්‍රදේශයෙන් ගමන් කරමින් සිටියදී සිවිල් ඇදුමින් සිටි පොලිස් බුද්ධි අංශ නිලධාරීන් විසින් එම රථය ජංගම දුරකතනවලින් වීඩියෝ ගත කළ අවස්ථාවේ ජනතාව ඔවුන්ගේ දුරකතන උදුරාගෙන ඇති බව පවසන පොලීසිය තමන් ඉල්ලා සිටින වාරණ නියෝගය යුක්ති සහගත කිරීම වෙනුවෙන් එම අවස්ථාවේ ලබාගත් බව පැවසෙන වීඩියෝ දර්ශන කිහිපයක්ද අධිකරණයට ඉදිරිපත් කර තිබේ.

පළාත් බද වාර්තාකරුවන් පවසන පරිදි එම සිදුවිම සහ අනුස්මරණය සිදු කළ හොත් ප්‍රදේශයේ ප්‍රචණ්ඩකාරී තත්වයක් ඇති විය හැකි බවට පොලීසිය පවසන කරුනු අතර ඇති සම්බන්ධය කුමක්දැයි මහේස්ත්‍රාත්වරයා විමසන අවස්ථාවේ එයට පිළිතුරු නොදී පොලීසිය නිහඩව තිබේ.

පසුව පොලීසිය අධිකරණයට පවසා ඇත්තේ පොලිස් බුද්ධි නිලධාරීන්ගේ දුරකතන උදුරා ගැනිම සම්බන්ධයෙන් නීතියට අනුව එම පිරිස් සම්බන්ධයෙන් කටයුතු කරන බවයි.

සිංහල හමුදා කඳවුරු දෙමළ පළාත් වලින් ඉවත් කර ගත යුතුයි, දෙමළ ජනතාවගේ පළාත්වල තාවකාලික දෙමළ ආණ්ඩුවක් පිහිටුවන තෙක් පුනරුත්ථාපන වැඩ තාවකාලිකව අත්හිටවිය යුතුයි, දෙමළ ජනතාවට අයිති ගම් පළාත්වල සිංහලයන් පදිංචි කරවීම කරගෙන යාම නැවැත්විය යුතුයි, දෙමළ පළාත්වල සිංහල පොලිස් ස්ථාන පිහිටුවීම නතර කළ යුතුයි, ත්‍රස්තවාදය වැලැක්වීමේ පනත යටතේ පොලිස් ආරක්ෂක මූලස්ථාන වල සිටින දේශපාලන රැඳවුම්කරුවන් වහා නිදහස් කළ යුතුයි ආදී ඉල්ලිම් ඉදිරිපත් කරමින් 1987 සැප්තැම්බර් 15 වනදා දිලිපන් උපවාසයක් ආරම්භ කළේය.

යාපනය විශ්ව විද්‍යාලය ඉදිරිපිට උපවාසයක යෙදී සිටියදී දිලීපන් මිය ගියේ 1987 සැප්තැම්බර් 26 වැනිදා ය.