දෙමළ මාධ්‍යවේදීන්ට ඉටු නොකළ යුක්තිය ගැන TNA අගමැති ඉදිරියේ විමසයි

0

යුද්ධය පැවති සමයේ සහ ඉන් පසුව මරා දමන ලද දෙමළ මාධ්‍යවේදීන් ගැන සිදු කරන විමර්ශන සම්බන්ධයෙන් දෙමළ සන්ධාන මන්ත්‍රීවරයකු අගමැතිවරයාද සහභාගී වු සභාවක දී ප්‍රශ්න කර තිබේ.

“ඝාතනයට ලක්වූ දමිල ජනමාධ්‍යවේදීන් කිසිවකුත් ගැන අද වනතුරු කිසිදු පරීක්ෂණයක් ආරම්භ වී නැහැ. එය කනගාටුවට සහ ලැජ්ජාවට කරුණක්,” යැයි පාර්ලිමේන්තු මන්ත්‍රී එම්.ඒ. සුමන්තිරන් මාධ්‍ය නිදහස හා සමාජ වගකීම පිළිබඳ කොළඹ ප්‍රකාශනයට වසර 20ක් සපිරීම නිමිත්තෙන් පැවති සමුළුවකදී කියා සිටියේය.

මාධ්‍යවේදීන් පැහැර ගැනීම්, ඝාතනය කිරීම් සහ වධහිංස ගැන පසුගිය වසර තුන හමාරක කාලය තුල වාර්තා නොවුවද ලසන්ත වික්‍රමතුංග ඝාතනය කිරීම, ප්‍රගීත් එක්නැළිගොඩ අතුරුදන් වීම, කීත් නොයාර්ට පහරදීම සම්බන්ධ කෙරෙන පරීක්ෂණ සම්බන්ධව සෑහීමකට පත් විය නොහැකි බවයි මන්ත්‍රීවරයා චෝදනා කරන්නේ.

ගෙවී ගිය විසි වසරක කාලය තුල වැඩිම ජනමාධ්‍යවේදීන් පිරිසක් මරා දමනු ලැබුවේ යාපනය දිස්ත්‍රික්කයේ බව ද දෙමළ ජාතික සන්ධාන මන්ත්‍රීවරයා සිහිපත් කර දුනි.

“එක් පුවත්පත් ආයතනයක පමණක් ජනමාධ්‍යවේදීන් 6 දෙනෙක් ඝාතනයට ලක්වුණා. එම පුවත්පත් ආයතනයට ප්‍රහාර 33ක් එල්ල වුණා. මගේ මතකය නිවැරැදි නම් දමිළ ජනමාධ්‍යවේදීන් 14 දෙනෙක් ඝාතනයට ලක්වුණා.”

JDS ලයිස්තුව

පසුගිය සමයේ ඝාතනයට හා අතුරුදහන් කිරීමට ලක්වූ මාධ්‍යවේදීන් ගේ ලැයිස්තුවක් 2015 දෙසැම්බරයේ ජාත්‍යන්තර මානව හිමිකම් දිනයේ දී මාධ්‍ය සංසදය විසින් අගමැති රනිල් වික්‍රමසිංහ අතට පත් කළ අතර අග්‍රාමාත්‍යවරයා එහිදි සදහන් කර තිබුනේ එම ලේඛනයේ මාධ්‍යවේදීන් 44 දෙනකුගේ නම් ඇතුලත්ව ඇති බවයි.

අගමැතිවරයාට භාර දෙන ලද ලැයිස්තුව සකස් කොට මුල් වතාවට ප්‍රසිද්ධියට පත් කර තිබුනේ ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසිනි.

තෙවසරකට වැඩි කාලයක් ගතව ඇතත් රජය සතුව ඇති එම ලැයිස්තුවේ සඳහන් මාධ්‍යවේදීන් සම්බන්ධයෙන් යුක්තිය ඉටු කිරීමට ගන්නා පියවර තවමත් ප්‍රකාශයට පත් කර නැත.

Facebook Comments

wedding people