දේශිය වශයෙන් යුද අපරාධකරුවන්ට දඬුවම් දෙන බවට ජාත්‍යන්තරය හමුවේ දුන් පොරොන්දු නිසා යහපාලන රජයට හිටපු ජනාධිපති මහින්ද රාජපක්ෂට යුද්ධයේ දී මානව හිමිකම් උල්ලංඝණය කිරීමේ ගැන එල්ල වු චෝදනා වලින් මුදා ගත හැකි වු බවට රජයේ ප්‍රබල අමාත්‍යවරයකු කියා තිබේ.
යුද අපරාධ චෝදනා නිසා ලෝක සිතියමේ ලේ පැල්ලමක් වී තිබු ශ්‍රී ලංකාව ඉන් මුදා ගත හැකි වුයේ යහපාලන රජයට බවයි මුදල් හා ජනමාධ්‍ය අමාත්‍ය මංගල සමරවීර පෙන්වා දෙන්නේ.
“අද ඔය රට රටවල්වල ගිහින් පම්පෝරි ගහන හිටපු ජනාධිපති මහින්ද රාජපක්ෂ මහතාට ජාත්‍යන්තර උසාවියෙන් දඩුවම් කරලා මහින්ද කියන්නෙ ලංකාවෙන් පිටට යන්න බැරි නායකයෙක් බවට පත් වෙනවා. ජාත්‍යන්තරය අපි ගැන විශ්වාසය තියල කටයුතු කළ නිසා තමයි මහින්ද රාජපක්ෂ පාර්ලිමේන්තු මන්ත්‍රීතුමාට රට යන්න පුළුවන් වුණේ.”
“මහින්ද රාජපක්ෂ මහත්තයා අගමැති රනිල් වික්‍රමසිංහ මහතාගේ පිංතූරෙට පහනක් පත්තු කරන්න ඕනෙ. පැත්තකින් මගෙ පිංතූරයක් තියා ගත්තත් කමක් නෑ. එතුමව ජාත්‍යන්තර මිනීමරුවෙක් වෙන එක නැවැත්තුවෙ අපි,” යි අමාත්‍යවරයා 30 ඉරිදා එක්සත් ජාතික පක්ෂයේ මාතර කොට්ඨාස බල මණ්ඩලය පිහිටුවීමේ අවස්ථාවට එක්වෙමින් කියා සිටියේය.
2019 වසරේ මැතිවරණ දෙකක් පැවැත්වීමට නියමිත බව කී අමාත්‍ය මංගල සමරවීර එම මැතිවරණ 2015 වසරේ පැවති මැතිවරණ මෙන්ම වැදගත් බවත් එදා ප්‍රමාණයටම මැතිවරණ වෙනුවෙන් කැප විය යුතු බව ද වැඩි දුරටත් සඳහන් කළේය.
Facebook Comments
