ප්‍රජාතන්ත්‍රවාදය, සංහිඳියාව, නීතියේ ආධිපත්‍ය, මානව හිමිකම් සහ මාධ්‍ය නිදහස පිළිබඳ ශ්‍රී ලංකාව ලබා තිබෙන සාධනීය ප්‍රගතිය එක්සත් ජාතීන්ගේ සංවිධානයේ මහලේකම්වරයාගේ සහ පොදු රාජ්‍ය මණ්ඩලීය මහ ලේකම්වරියගේ ඇගයීමට ලක්ව තිබේ.
එක්සත් ජාතීන්ගේ මහ මණ්ඩලයේ 73 වන සැසිවාරයට සහභාගීවීම සඳහා නිව්යෝර්ක් නුවරට ගිය ජනාධිපති මෛත්‍රීපාල සිරිසේන සහ එක්සත් ජාතීන්ගේ මහලේකම් අන්තෝනියෝ ගුටේරස් අතර හමුව 28දා පස්වරුවේ නිව්යෝර්ක් නුවර එක්සත් ජාතීන්ගේ මහලේකම් කාර්යාලයේ දී සිදු විය.
රජාතන්ත්‍රවාදය, නිදහස, සාමය සහ සංහිඳියාව පිළිබඳ ඉකුත් වසර තුන හමාර තුළ ශ්‍රී ලංකාව ලද සුවිශේෂි අත්දැකීම් උපයෝගි කර ගනිමින් එම ගමන ඉදිරියට තවදුරටත් වේගවත් කරන බවට ජනාධිපතිවරයා විසින් එක්සත් ජතීන්ගේ මහලේකම්වරයා වෙත සහතික වු බවයි ජනාධිපති මාධ්‍ය අංශය පවසන්නේ.
කාලගුණික සහ දේශගුණික විපර්යාස හමුවේ ශ්‍රී ලංකාවට මුහුණදීමට සිදුව තිබෙන අභියෝග ජය ගැනීමට ද ජනපති මහ ලේකම්වරයාගේ සහාය ඉල්ලා තිබේ.
එක්සත් ජාතීන්ගේ සංවිධානයේ සාමාජික රටක් ලෙස එහි ප්‍රඥප්තීන් සහ සම්මුතින්ට අනුගතව ශ්‍රී ලංකාව නිරන්තරයෙන් කටයුතු කරන අතර, පැරිස් සම්මුතියට අත්සන් තැබූ ප්‍රථම දකුණු ආසියානු රට ශ්‍රී ලංකාව බව ද සිහිපත් කළේය.
අසීරුතා රැසක් මධ්‍යයේ වුව ද අද ශ්‍රී ලංකාව ලබා ඇති ප්‍රගතිය අගය කර ඇති එක්සත් ජාතීන්ගේ මහලේකම්වරයා ලංකාවට ලබාදෙන සහය අඛණ්ඩවම ලබාදෙන බවට පොරොන්දු වී ඇත.
ප්‍රජාතන්ත්‍රවාදය, සංහිඳියාව, නීතියේ ආධිපත්‍ය සහ මිනිස් අයිතිවාසිකම් යන ක්ෂේත්‍රවල ශ්‍රී ලංකාව ලබා තිබෙන සුවිශේෂී ප්‍රගතිය පොදු රාජ්‍ය මණ්ඩලයීය මහලේකම්වරියගේ ද පැසසුමට ලක් විය.
සංවර්ධනයත්, සංහිඳියාවත් උදෙසා ශ්‍රී ලංකාව ගෙන යන වැඩපිළිවෙළට උපරිම සහය ලබාදෙන බවට ද ඇය සහතික වු බවයි ජනපති මාධ්‍ය ඒකකය වැඩි දුරටත් නිවේදනය කරන්නේ.
Facebook Comments
