එක්සත් ජාතීන්ගේ මානව හිමිකම් පිළිබඳ මහකොමසාරිස් වාර්තාව දැඩි ලෙස ප්‍රතික්ෂේප කළත්, ජිනීවා යෝජනා ක්‍රියාත්මක කිරීමට ශ්‍රී ලංකාව නැවතත් එකඟවී තිබේ.
ශ්‍රී ලංකාවේ මානව හිමිකම්, සංහිඳියාව සහ වගවීම නගා සිටුවීම සඳහා හතර අවුරුද්දකට ඉහතදී ඇති කරගත් එකඟතා තවත් අවුරුදු දෙකක් තුලදී ක්‍රියාත්මක කිරීමට ශ්‍රී ලංකාවද හවුල් වී 40/1 යනුවෙන් යෝජනාවක් මානව හිමිකම් මණ්ඩලය තුලදී මාර්තු 21 බ්‍රහස්පතින්දා ඒකමතිකව සම්මත කරගන්නා ලදී.
“මානව හිමිකම්, සංහිඳියාව සහ වගවීම නගා සිටුවීම සම්බන්ධයෙන් තව දුරටත් ප්‍රගතියක් අත් කර ගැනීම සඳහා ශ්‍රී ලංකාවට මාර්තු 2021 දක්වා කාල අවකාශයක් ලබා දෙන මෙම යෝජනාව 2015 සිට ශ්‍රී ලංකාවේ දේශපාලන කැපවීම සහ රජය ගෙන ඇති ප්‍රගතිශීලී පියවර පිළිගැනීමක් ලෙස සලකමු,” යි විදේශ අමාත්‍ය තිලක් මාරපන යෝජනාවට ආණ්ඩුවේ එකඟතාව පල කරමින් කියා සිටියේය.
ගතවූ සිව් වසර තුලදී ශ්‍රී ලංකාව විසින් කඩිනමින් කළ යුතු බවට එක්සත් ජාතීන්ගේ සංවිධානය විසින් ලබාදී ඇති නිර්දේශ සංඛ්‍යාව දහසකට වැඩි බව අමාත්‍යවරයා සභාවට සිහිපත් කර දුන්නේය.
ඡන්දයකට යාමෙන් තොරව යෝජනාව ගෙන ඒමට තමන්ද හවුල් කරගැනීම ගැන විදේශ අමාත්‍ය තිලක් මාරපන ඊට මුල්වූ කැනඩාව, බ්‍රිතාන්‍යය, ජර්මනිය, උතුරු මැසඩෝනියාව සහ මොන්ටෙනීග්‍රෝව ට තම ස්තුතිය පුද කළේය.
යුද අපරාධ සම්බන්ධයෙන් යුක්තිය සලසා දීම ඇතුළු මානව හිමිකම් ආරක්ෂා කිරීමට හතර අවුරුද්දකට ඉහතදී දුන් පොරොන්දු ඉටු කිරීම මගහැර යාමට අමතර කල් නොදෙන ලෙස යුද පීඩිතයන් නොකඩවා කරන ආයාචනය නොතකා ශ්‍රී ලංකාවට මෙසේ තවත් දිගුවක් ලැබුණි.
මෙවර පැවැත්වෙන එජා මානව හිමිකම් මණ්ඩලයේ හතලිස් වැනි සැසිවාරය ආරම්භයේදීම අතුරුදහන් වුවන්ගේ මව්වරුන් ප්‍රමුඛ උතුරු නැගෙනහිර සංවිධාන ගණනාවක් මහ කොමසාරිස් මිෂෙල් බැෂලේට සහ විදේශීය දූත මණ්ඩල වෙත යොමු කළ මහජන සංදේශ මගින් මහත් ඕනෑකමින් ඉල්ලා තිබුනේ ආණ්ඩුවට තවත් කල් නොදෙන ලෙසයි.
දස වසරක් තිස්සේ බලා සිටි තමන්ට යුක්තිය සැලසීම සඳහා දුන් පොරොන්දු ඉටු කිරීමට ශ්‍රී ලංකාවට තවත් කල් දීම ලෝකයේ වෙනත් රටවලට බියකින් තොරව යුද අපරාධ කිරීම සඳහා “පාර කපා දීමක්” ලෙස එම සංදේශ අනතුරු අඟවා තිබුනි.
Facebook Comments
