රජයේ හමුදා මුරපොලක් අසලදී වෙඩිතබා මරා දමා දහනව අවුරුද්දක් ගතවීත් යුක්තිය ඉටුනොවුනු දෙමළ මාධ්‍යවේදියකුගේ අනුස්මරණයක් මඩකලපුවේදී පවත්වා තිබේ.
“විමුක්ති කොටි සංවිධානය දෙකඩ කිරීමෙන් පසු ඝාතනය කරපු පළමු මාධ්‍යවේදියා නඩේසන් කියලා සඳහන් කරන්න පුළුවන්. මේ විදිහට ලංකාව පුරාම මාධ්‍යයට සම්බන්ධ අය පනහක් විතර ආණ්ඩුවෙන් මරල දාල තියෙනවා,” යැයි මඩකළපුව දිස්ත්‍රික් හිටපු පාර්ලිමේන්තු මන්ත්‍රී පී. අරියනේන්ද්‍රන් පවසයි.
හිටපු මන්ත්‍රීවරයා මේ බව කියා සිටියේ මඩකළපුව ගාන්ධි උද්‍යානයේ පිහිටි මරා දැමූ ජනමාධ්‍යවේදීන්ගේ ස්මාරකය ඉදිරිපිට මැයි 31 දා පැවති මාධ්‍යවේදී අයියාතුරේ නඩේසන්ගේ සමරුවට එක්වෙමින්.
“ප්‍රේමදාසගේ සිට අද රනිල් වික්‍රමසිංහ දක්වා ආණ්ඩු මාරුවුනත් මේ කිසිදු ඝාතනයක් ගැන විධිමත් පරික්ෂණයක් කරලා නැහැ.”
වසර විසිදෙකක් “ වීරකේසරී “ පුවත් පතට වාර්තා සැපයු අයියාතුරේ නඩේසන් 2000 වසරේදී සියලු දෙමළ දේශපාලන පක්‍ෂ නායකයන් එක් කරගනිමින් දෙමළ ජාතික සන්ධානය බිහි කිරීමට මුල්වූ මාධ්‍යකරුවකු බවද හිටපු මන්ත්‍රී අරියනේන්ද්‍රන් පවසයි.
මඩකලපුවේ මාධ්‍යවේදීන්, බහුජන සංවිධාන ක්‍රියාධරයන් හා ආගමික නායකයන්ගේ සහභාගිත්වයෙන් නඩේසන්ගේ සේයා රුවට මල්දම් පුදා , පහන් දල්වා පැවති ඔහුගේ දහනම වැනි සමරුව සංවිධානය කර තිබුනේ මඩකළපුව මාධ්‍ය සමාජය ප්‍රමුඛ ප්‍රදේශයේ අනෙකුත් මාධ්‍ය සංවිධාන මගිනි.
අයියාතුරේ නඩේසන් ඝාතනය හා එවකට පැවති මඩකලපුවේ මාධ්‍ය භිෂණය ගැන ඉන් දිවි ගලවා ගෙන රටින් පළාගිය නඩේසන්ගේ මාධ්‍ය සගයෙකු වූ ශන් තවරාජා ශ්‍රී ලංකාවේ ප්‍රජාතන්ත්‍රවාදය උදෙසා මාධ්‍යවේදියෝ [JDS] සංවිධානයේ වෙබ් අඩවියට 2014 වසරේදී කියා සිටි පරිදි නඩේසන් මරා දමනු ලැබුවේ රජයේ අතුරු හමුදා කල්ලියක් විසිනි.
“බ්‍රිතාන්‍ය යටත් විජිත යුගයේ පටන්ම සිංහල ජනපදකරණය සඳහා යොදාගත් නැගෙනහිර පළාත දෙමළ ඊලාම් විමුක්ති අරගලය මර්දනය කිරීම සඳහාද සෑම රජයක්ම යොදාගත් දඩබිමකි. 2004 වසර වන විට සටන් විරාම ගිවිසුම යම් අවිනිශ්චිත තත්ත්වයකට මුහුණ දෙමින් පැවති අතර පළාත පුරා රජයේ හමුදා අණසක මෙන්ම හමුදා අනුග්‍රහය නිබඳ ලබන සන්නද්ධ කණ්ඩායම් රැසක් ද ක්‍රියාත්මක වූහ. සටන් විරාම ගිවිසුම විසින් නිර්මාණය කළ වාතාවරණය යොදාගනිමින් දෙමළ විමුක්ති කොටි සංවිධානය කැබලි කිරීම සඳහා තමන් අනුගමනය කළේ යැයි රනිල් වික්‍රමසිංහ ආණ්ඩුව විසින් පසුකාලීනව අනාවරණය කළ සැළසුම් සැළකිය යුතු සාර්ථකත්වයක් ලැබුවේ කොටි සංවිධානයේ නැගෙනහිර සෙන්පති වශයෙන් ක්‍රියාකළ කරුණා අම්මාන් ඉන් බිඳී යාමත් සමග ය. කරුණා පාර්ශවය අතුරු හමුදාවක් ලෙසින් රජයේ හමුදා අනුග්රහ ලබමින් ක්‍රියාකළේ ඉක්බිතිව ය.”
ඒ වන විටත් අතුරු හමුදා කණ්ඩායමක් ලෙස රාජ්‍ය අනුග්රහ ලබමින් ප්ලොට් මෝහන් යටතේ ක්‍රියාත්මක වූ කල්ලියේ හා හමුවේ සෘජු තර්ජන හේතුවෙන් ප්‍රදේශයේ වීරකේසරී වාර්තාකරු ලෙස කටයුතු කළ නිත්‍යා, ඉන් ඉවත්ව විදේශගත විය. වීරකේසරී පත්‍රයේ ඔහුගේ අනුප්‍රාප්තික වාර්තාකරුවා වු කුමාරගුරු ද රජයේ හමුදා වෙතින් එල්ල වූ තර්ජන හේතුවෙන් ප්‍රදේශය හැර දමා විදේශ ගතවූයේ එයින් පසුව ය. අනතුරුව මඩකලපුව වීරකේසරී වාර්තාකරු වුයේ අයියාතුරේ නඩේසන් ය. යාපනේ නෙල්ලිඅඩි ප්‍රදේශයේ උපන් නඩේසන් අදායම් බදු දෙපාර්තමේන්තු නිලධාරියෙකි. යාපන සරසවියේ ආර්ථික විද්‍යාව පිළිබඳ උපාධිධාරියකු වූ ඔහු කලක් උතුරු – නැගෙනහිර පළාත් සභාවේ මාධ්‍ය නිලධාරියා ලෙසද කටයුතු කළේය.
2004 මැයි මස 31 වැනිදා උදෑසන රැකියාව වෙත යමින් සිටියදී රජයේ හමුදා මුර පොළක් සමීපයේ ඔහු පැමිණෙන තෙක් බලා සිටි කරුණා පාර්ශවයේ ඝාතකයෝ ඔහුට වෙඩි තබා මරා දැමුහ. දරුවන් සිව් දෙනෙකුගේ පියෙකු වූ නඩේසන් මඩකළපුව කෙරෙහි වූ අපමණ බැඳීම හේතුවෙන්ම, කෙතරම් තර්ජන එල්ල වුවද මඩකලපුව හැරදමා යෑමට කැමැත්තක් නොදැක්වූ බව ඔහුගේ සමකාලීන මාධ්‍ය සගයකු වූ ශන් තවරාජා පවසයි. නැගෙනහිර ලංකා මාධ්‍යවේදීන්ගේ සංගමයේ ලේකම්වරයා වශයෙන් කලක් ක්‍රියා කළ ශන් තවරාජා JDS සමග නඩේසන් පිළිබඳ ආවර්ජනයේ යෙදුණේ කම්පාවෙනි.
අයියාතුරේ නඩේසන් කවුද?
”නඩේසන් මඩකළපුවට එන්නේ වර්ධරාජා පෙරුමාල් මහ ඇමති වෙලා හිටපු උතුරු නැගෙනහිර පළාත් සභාවේ මාධ්‍ය නිලධාරියා විදිහටයි. ඔහුගේ සරසවි මිතුරෙක් තමයි පළාත් සභාවේ සහානායක වුණේ. එයාගේ ඇරයුම අනුවයි නඩේසන් මාධ්‍ය නිලධාරි තනතුර බාර ගත්තේ. ඒ වෙන කොට එයා මධ්‍යම කඳුකරයේ පාසල් ගුරුවරයෙක් විදිහට වැඩ කරමිනුයි හිටියේ. පස්සේ ප්‍රේමදාස ආණ්ඩුව පළාත් සභාව විසුරුවා දැමීමෙන් පස්සේ නඩේසන් නැවතත් කඳුකරයේ පාසැල් රැකියාවට ගියත් ටික කාලයකින් නැවතත් මඩකළපුවට ආවා. ඒ ආදායම් බදු දෙපාර්තමේන්තු නිලධාරියෙක් විදිහටයි. යාපනයේදී කොමියුනිස්ට් පක්‍ෂ දේශපාලනයට නැඹුරු වෙලා හිටිය නඩේසන්ට මඩකළපුවේ දෙමළ – මුස්ලිම් මිනිස්සුන්ගේ ගැටළු දේශපාලනිකව අවබෝධ කරගන්න හැකියාවක් තිබුණා. අනෙක් අතින් දෙමළ මාධ්‍ය සංගමයේ ක්‍රියාකාරී සාමාජිකයෙක් වගේම නැගෙනහිර ලංකා මාධ්‍යවේදීන්ගේ සංගමය ගොඩ නගන්නත් නඩේසන් පුරෝගාමී වුණා,” ඔහු කියයි.
සිංහල දෙමළ කලා උළෙල
දෙමළ – මුස්ලිම් මෙන්ම දෙමළ – සිංහල සහයෝගිතාවය වෙනුවෙන් නිරන්තරව පෙනී සිටි නඩේසන් ඒ වෙනුවෙන් ක්‍රියාත්මකව මැදිහත් විය. ඒ පිළිබඳව ශන් තවරාජාට ඇත්තේ මකා දැමිය නොහැකි මතකය කි.
”සටන් විරාම කාලේ නැගෙනහිර ලංකා ජනමාධ්‍යවේදීන්ගේ සංගමය හැටියට අපි සංවිධානය කළා සංචාරයක් වන්නිය හා යාපනයට. ප්‍රදේශයේ දෙමළ – මුස්ලිම් මාධ්‍යවේදීන් තිස්පස් දෙනෙක් විතර ඒකට එක් වුණා. මේ වැඩේට පුරෝගාමී වුනේ නඩේසන්. ඒ වගේම ‘හිරු’ කණ්ඩායම කොළඹ සංවිධානය කරපු සිංහල – දෙමළ කලා උළෙලට නඩේසන් එයාගේ දායකත්වය ලබා දුන්නා. පෞද්ගලික දුෂ්කරතාවක් නිසා මට ඒකට යන්න බැරි වුණා. කොළඹ ඉඳන් නඩේසන් මට ටෙලිෆෝන් කරලා කිව්වේ සිංහල උරුමයේ කට්ටිය හා දිවයින පත්තරේට සම්බන්ධ පිරිසක් එකතුවෙලා ඒකට පහර දෙන්න ආවා, ඒත් වැඩේ ඉවරවෙලා මිසක් එන්නේ නැහැ කියලා.”
නඩේසන් විසින් දෙමළ ජනයාගේ ස්වයං නීරණ අයිතිය අරබයා ලියන ලද කෘතිය ඔහුගේ දේශපාලන අවබෝධය පිලිබඳ කදිම සාක්ෂියක් සේ බොහෝදෙනා සළකති. ඔහු සම්මත ප්‍රාදේශීය මාධ්‍යවේදියාගේ රාමුවෙන් ඔබ්බට ගොස් කටයුතු කළ බවට මෙම කෘතිය මගින් ද පෙන්නුම් කරතැයි කියා සිටිනුයේ ශ්‍රී ලංකා දෙමළ මාධ්‍යවේදීන්ගේ සංගමයේ එවකට සභාපතිවරයා වූ රාජ්කුමාර් සුබ්‍රමනියම් ය.
”ප්‍රාදේශීය මාධ්‍යවේදීන් නිතරම ලියන සංවර්ධන පුවත් වාර්තාවලට නඩේසන් සීමා වුනේ නැහැ. ඒ සීමාවන් බිඳ දමා විශේෂයෙන් නැගෙනහිර පළාතේ මිනිස්සු යුද්ධයෙන් විඳින පීඩාව එළියට අරන් ආව ප්‍ර‍මුඛයෙක් තමයි නඩේසන්. දේශපාලන සහ මාධ්‍ය ක්‍රියාධරයෙක් වුණු නඩේසන්ට ජාතික ප්‍රශ්නය ගැන ගැඹුරු අවබෝධයක් තිබුණා. ඒ වගේම දෙමළ මාධ්‍යවේදීන් මුහුණ දෙන ගැටළු විසඳා ගන්න නම් එකාවන්ව සමගිව සංවිධානය වීම ගැන අවධාරනය කරපු ඔහු ඒ වෙනුවෙන් කැපවෙලා වැඩ කළා. කණගාටුවට කරුණ තමයි, අද සංහිඳියාව ගැන කථා කරන මේ ආණ්ඩුව සහ ආණ්ඩුවේ උදව්කරුවන් නඩේසන්ලා මරා දැමීම ගැන සොයා බලා යුක්තිය ඉටුකිරීමට ප්‍රමාණවත් උනන්දුවක් නොපෙන්වීම,” ඔහු කියයි. “
Facebook Comments
