බොන වතුරට වින කළ සමාගමක් වෘත්තීය සමිති සමග ගිවිසුමක්

රතුපස්වල ප්‍රදේශයේ පානිය ජලයට හානිකර ජනතා විරෝධය හමුවේ ඉවත් කෙරුණු ඩි.පී.එල් සමාගම හා එහි වෘත්තීය සමිතිය අතර සාමුහික ගිවිසුමක් අත්සන් කර තිබේ.

නිෂ්පාදන ක්‍රියාවලිය හේතුවෙන් ජල මුලාශ්‍ර වලට වන හානිය සළකා මෙම සමාගම රතුපස්වල ප්‍රදේශයෙන් ඉවත් කරන ලෙස 2013 දී ඉල්ලා සිටි ප්‍රදේශයේ ජනතාවට උණ්ඩයෙන් පිළිතුරු ලබා දුන් රාජපක්‍ෂ ආණ්ඩුව උද්ඝෝෂකයන් තිදෙනකු වෙඩි තබා මරා දමමින් තවත් රැසකට තුවාල සිදු කළේය.

පාර්ලිමේන්තු මන්ත්‍රී ධම්මික පෙරේරාට අයත් සමාගම් ගොන්නේ තවත් එකක් වූ “වෙනිග්රෝස්“ නමින් රබර් අත්වැසුම් නිෂ්පාදනය කළ මෙම සමාගම පසුව “DPL ග්ලවුස්“( DPL PREMIER GLOVES LIMITED ) නමින් බියගම නිදහස් වෙළඳ කලාපය තුල ස්ථාපිත කෙරිණි.

ගිවිසුමේ එකඟතා

2022 වසර සදහා රු.7000 ක වැටුප් වැඩි කිරීමක්. (ඒ අනුව 2022 අගෝස්තු සිට හිග වැටුප් එකවර ලැබෙනු ඇත) , 2023 වසර සදහා රු.6000 ක වැටුප් වැඩි කිරීමක්., 2024 වසර සදහා රු.5000 ක වැටුප් වැඩි කිරීමක්. , දැනට තිබෙන නිවාඩු 21ට අමතරව අසනීප නිවාඩු 7ක්, අලුත් අවුරුද්දට අවම වශයෙන් මාසයකට පෙර (01) සියලුම සේවකයින්ට සිංහල හා දෙමළ අලුත් අවුරුදු නිවාඩු සැලැස්ම නිවේදනය කිරීම, සෑම වසරකම සේවකයන්ට නිල ඇඳුම් කට්ටල තුනක්, සංගම් ශාඛාව සදහා කබඩ් එකක් සහ දැන්වීම් පුවරුවක්, සංගමය විසින් සංවිධානය කරන ලද රැස්වීම් සහ අධ්‍යාපනික වැඩමුළුවලට සහභාගි වීම සඳහා ශාඛා නියෝජිතයින්ට රාජකාරි නිවාඩු, ශාඛාවේ සභාපතිවරයාට සහ ශාඛා ලේකම්වරයාට ජංගම දුරකථන භාවිතයට අවසර දීම හා සංගම් ශාඛාවට ශාඛා කමිටු රැස්වීම් පැවැත්වීම සඳහා සෑම මසකම පැය දෙකක් ලබා දීම ඇතුළු එකඟතා මත නිදහස් වෙළඳ කලාප කම්කරුවන් කෙරෙහි වැඩි දායකත්වයක් දක්වන නිදහස් වෙළඳ කලාප සහ පොදු සේවා සේවක සංගමය හා DPL ග්ලවුස් කළමනාකාරිත්වය අතර සාමුහික ගිවිසුමක් ජුනි පළමුදා අත්සන් කෙරිණි.

වෘත්තීය සමිති නායක ඇන්ටන් මාකස් ගේ නායකත්වයෙන් යුත් නිදහස් වෙළඳ කලාප හා පොදු සේවා සේවක සංගමය මේ වන විට සපුගස්කන්ද හා බියගම නිදහස් වෙළඳ කලාපේ පිහිටි “ටෙලිබෝ“ සමාගම, කළුතර AMW සමාගම, සහ කටුනායක නිදහස් වෙළඳ කලාපයේ පිහිටි “ නෙක්ස්ට් “ සමාගම් අතරත් සාමුහික ගිවිසුම් වලට දැනටමත් එළඹ තිබේ.

මේ අතර අවශ්‍ය සාමජිකත්ව ප්‍රමාණය සපුරා නොමැති බව පවසා කම්කරු ඇමතිවරයා විසින් නිදහස් වෙළඳ කලාප හා පොදු සේවා සේවක සංගමය, ලංකා වෙළඳ, කර්මාන්ත හා පොදු කම්කරු සංගමය, එක්සත් කම්කරු සමේලනය හා ලංකා වතු කාර්‍ය මණ්ඩල සේවක සංගමය ජාතික කම්කරු උපදේශන සභාවෙන් ඉවත් කොට තිබේ.

ජාතික කම්කරු උපදේශන සභාව යනු වැඩපලේ සංහිඳියාව පවත්වාගෙන යනු පිණිස ආණ්ඩුව, හාම්පුතුන් හා වෘත්තීය සමිති එක්කොට සැදුනු ඉහල මට්ටමේ සභාවකි.